Read Roman Urdu Geo mukāshafā 17 Bible Online

mukāshafā 17 - Roman Urdu Geo bible

mukāshafā 17

¹phir sāt pyāle apne pās rakhne wāle in sāt farishtoṅ meṅ se ek mere pās āyā. us ne kahā, “ā, maiṅ tujhe us baṛī kasbī kī sazā dikhā dūṅ jo gahre pānī ke pās baiṭhī hai.

²zamīn ke bādshāhoṅ ne us ke sāth zinā kiyā. hāṅ, us kī zinākārī kī mai se zamīn ke bāshinde mast ho gae.”

³phir farishtā mujhe rūh meṅ ek registān meṅ le gayā. wahāṅ maiṅ ne ek aurat ko dekhā. wuh ek qirmizī rang ke haiwān par sawār thī jis ke pūre jism par kufr ke nām likhe the aur jis ke sāt sar aur das sīṅg the.

⁴yih aurat arġhawānī aur qirmizī rang ke kapṛe pahne aur sone, beshqīmat jawāhir aur motiyoṅ se sajī huī thī. us ke hāth meṅ sone kā ek pyālā thā jo ghinaunī chīzoṅ aur us kī zinākārī kī gandagī se bharā huā thā.

⁵us ke māthe par yih nām likhā thā, jo ek bhed hai, “azīm bābal, kasbiyoṅ aur zamīn kī ghinaunī chīzoṅ kī māṅ.”

⁶aur maiṅ ne dekhā ki yih aurat un muqaddasīn ke ḳhūn se mast ho gaī thī jinhoṅ ne īsā kī gawāhī dī thī. use dekh kar maiṅ nihāyat hairān huā.

⁷farishte ne mujh se pūchhā, “tū kyūṅ hairān hai? maiṅ tujh par aurat aur us haiwān kā bhed khol dūṅgā jis par aurat sawār hai aur jis ke sāt sar aur das sīṅg haiṅ.

⁸jis haiwān ko tū ne dekhā wuh pahle thā, is waqt nahīṅ hai aur dubārā athāh gaṛhe meṅ se nikal kar halākat kī taraf baṛhegā. zamīn ke jin bāshindoṅ ke nām duniyā kī taḳhlīq se hī kitāb-e-hayāt meṅ darj nahīṅ haiṅ wuh haiwān ko dekh kar hairatzadā ho jāeṅge. kyūṅki wuh pahle thā, is waqt nahīṅ hai lekin dubārā āegā.

⁹yahāṅ samajhdār zahan kī zarūrat hai. sāt saroṅ se murād sāt pahāṛ haiṅ jin par yih aurat baiṭhī hai. yih sāt bādshāhoṅ kī numāindagī bhī karte haiṅ.

¹⁰in meṅ se pāṅch gir gae haiṅ, chhaṭā maujūd hai aur sātwāṅ abhī āne wālā hai. lekin jab wuh āegā to use thoṛī der ke lie rahnā hai.

¹¹jo haiwān pahle thā aur is waqt nahīṅ hai wuh āṭhwāṅ bādshāh hai, go wuh sāt bādshāhoṅ meṅ se bhī ek hai. wuh halākat kī taraf baṛh rahā hai.

¹²jo das sīṅg tū ne dekhe wuh das bādshāh haiṅ jinheṅ abhī koī bādshāhī nahīṅ milī. lekin unheṅ ghanṭe bhar ke lie haiwān ke sāth bādshāh kā iḳhtiyār milegā.

¹³yih ek hī soch rakh kar apnī tāqat aur iḳhtiyār haiwān ko de deṅge aur lele se jang kareṅge,

¹⁴lekin lelā apne bulāe gae. chune hue aur wafādār pairokāroṅ ke sāth un par ġhālib āegā, kyūṅki wuh rabboṅ kā rab aur bādshāhoṅ kā bādshāh hai.”

¹⁵phir farishte ne mujh se kahā, “jis pānī ke pās tū ne kasbī ko baiṭhī dekhā wuh ummateṅ, hujūm, qaumeṅ aur zabāneṅ hai.

¹⁶jo haiwān aur das sīṅg tū ne dekhe wuh kasbī se nafrat kareṅge. wuh use wīrān karke nangā chhoṛ deṅge aur us kā gosht khā kar use bhasm kareṅge.

¹⁷kyūṅki allāh ne un ke diloṅ meṅ yih ḍāl diyā hai ki wuh us kā maqsad pūrā kareṅ aur us waqt tak hukūmat karne kā apnā iḳhtiyār haiwān ke sapurd kar deṅ jab tak allāh ke farmān takmīl tak na pahuṅch jāeṅ.

¹⁸jis aurat ko tū ne dekhā wuh wuhī baṛā shahr hai jo zamīn ke bādshāhoṅ par hukūmat kartā hai.”