Read Roman Urdu Geo mukāshafā 18 Bible Online

mukāshafā 18 - Roman Urdu Geo bible

mukāshafā 18

¹is ke bād maiṅ ne ek aur farishtā dekhā jo āsmān par se utar rahā thā. use bahut iḳhtiyār hāsil thā aur zamīn us ke jalāl se raushan ho gaī.

²us ne ūṅchī āwāz se pukār kar kahā, “wuh gir gaī hai! hāṅ, azīm kasbī bābal gir gaī hai! ab wuh shayātīn kā ghar aur har badrūh kā baserā ban gaī hai, har nāpāk aur ghinaune parinde kā baserā.

³kyūṅki tamām qaumoṅ ne us kī harāmkārī aur mastī kī mai pī lī hai. zamīn ke bādshāhoṅ ne us ke sāth zinā kiyā aur zamīn ke saudāgar us kī belagām ayyāshī se amīr ho gae haiṅ.”

⁴phir maiṅ ne ek aur āwāz sunī. us ne āsmān kī taraf se kahā, “ai merī qaum, us meṅ se nikal ā, tāki tum us ke gunāhoṅ meṅ sharīk na ho jāo aur us kī balāeṅ tum par na āeṅ.

⁵kyūṅki us ke gunāh āsmān tak pahuṅch gae haiṅ, aur allāh un kī badiyoṅ ko yād kartā hai.

⁶us ke sāth wuhī sulūk karo jo us ne tumhāre sāth kiyā hai. jo kuchh us ne kiyā hai us kā dugnā badlā use denā. jo sharāb us ne dūsroṅ ko pilāne ke lie tayyār kī hai us kā dugnā badlā use de denā.

⁷use utnī hī aziyat aur ġham pahuṅchā do jitnā us ne apne āp ko shāndār banāyā aur ayyāshī kī. kyūṅki apne dil meṅ wuh kahtī hai, ‘maiṅ yahāṅ apne taḳht par rānī hūṅ. na maiṅ bewā hūṅ, na maiṅ kabhī mātam karūṅgī.’

⁸is wajah se ek din yih balāeṅ yānī maut, mātam aur kāl us par ān paṛeṅgī. wuh bhasm ho jāegī, kyūṅki us kī adālat karne wālā rab ḳhudā qawī hai.”

⁹aur zamīn ke jin bādshāhoṅ ne us ke sāth zinā aur ayyāshī kī wuh us ke jalne kā dhuāṅ dekh kar ro paṛeṅge aur āh-o-zārī kareṅge.

¹⁰wuh us kī aziyat ko dekh kar ḳhauf khāeṅge aur dūr dūr khaṛe ho kar kaheṅge, “afsos! tujh par afsos, ai azīm aur tāqatwar shahr bābal! ek hī ghanṭe ke andar andar allāh kī adālat tujh par ā gaī hai.”

¹¹zamīn ke saudāgar bhī use dekh kar ro paṛeṅge aur āh-o-zārī kareṅge, kyūṅki koī nahīṅ rahā hogā jo un kā māl ḳharīde:

¹²un kā sonā, chāṅdī, beshqīmat jawāhir, motī, bārīk katān, arġhawānī aur qirmizī rang kā kapṛā, resham, har qism kī ḳhushbūdār lakaṛī, hāthīdāṅt kī har chīz aur qīmtī lakaṛī, pītal, lohe aur sang-e-marmar kī har chīz,

¹³dārchīnī, masālā, agarbattī, mur, baḳhūr, mai, zaitūn kā tel, behtarīn maidā, gandum, gāy-bail, bheṛeṅ, ghoṛe, rath aur ġhulām yānī insān.

¹⁴saudāgar us se kaheṅge, “jo phal tū chāhtī thī wuh tujh se dūr ho gayā hai. terī tamām daulat aur shān-o-shaukat ġhāib ho gaī hai aur āindā kabhī bhī tere pās pāī nahīṅ jāegī.”

¹⁵jo saudāgar use yih chīzeṅ faroḳht karne se daulatmand hue wuh us kī aziyat dekh kar ḳhauf ke māre dūr dūr khaṛe ho jāeṅge. wuh ro ro kar mātam kareṅge

¹⁶aur kaheṅge, “hāy! tujh par afsos, ai azīm shahr, ai ḳhātūn jo pahle bārīk katān, arġhawānī aur qirmizī rang ke kapṛe pahne phirtī thī aur jo sone, qīmtī jawāhir aur motiyoṅ se sajī huī thī.

¹⁷ek hī ghanṭe ke andar andar sārī daulat tabāh ho gaī hai!” har bahrī jahāz kā kaptān, har samundarī musāfir, har mallāh aur wuh tamām log jo samundar par safar karne se apnī rozī kamāte haiṅ wuh sab dūr dūr khaṛe ho jāeṅge.

¹⁸us ke jalne kā dhuāṅ dekh kar wuh kaheṅge, “kyā kabhī koī itnā azīm shahr thā?”

¹⁹wuh apne saroṅ par ḳhāk ḍāl leṅge aur chillā chillā kar roeṅge aur āh-o-zārī kareṅge. wuh kaheṅge, “hāy! tujh par afsos, ai azīm shahr, jis kī daulat se tamām bahrī jahāzoṅ ke mālik amīr hue. ek hī ghanṭe ke andar andar wuh wīrān ho gayā hai.”

²⁰ai āsmān, use dekh kar ḳhushī manā! ai muqaddaso, rasūlo aur nabiyo, ḳhushī manāo! kyūṅki allāh ne tumhārī ḳhātir us kī adālat kī hai.

²¹phir ek tāqatwar farishte ne baṛī chakkī ke pāṭ kī mānind ek baṛe patthar ko uṭhā kar samundar meṅ phaiṅk diyā. us ne kahā, “azīm shahr bābal ko itnī hī zabardastī se paṭak diyā jāegā. bād meṅ use kahīṅ nahīṅ pāyā jāegā.

²²ab se na mausīqāroṅ kī āwāzeṅ tujh meṅ kabhī sunāī deṅgī, na sarod, bāṅsrī yā turam bajāne wāloṅ kī. ab se kisī bhī kām kā kārīgar tujh meṅ pāyā nahīṅ jāegā. hāṅ, chakkī kī āwāz hameshā ke lie band ho jāegī.

²³ab se charāġh tujhe raushan nahīṅ karegā, dulhan-dūlhe kī āwāz tujh meṅ sunāī nahīṅ degī. hāy, tere saudāgar duniyā ke baṛe baṛe afsar the, aur terī jādūgarī se tamām qaumoṅ ko bahkāyā gayā.”

²⁴hāṅ, bābal meṅ nabiyoṅ, muqaddasīn aur un tamām logoṅ kā ḳhūn pāyā gayā hai jo zamīn par shahīd ho gae haiṅ.