Read Roman Urdu Geo mukāshafā 19 Bible Online

mukāshafā 19 - Roman Urdu Geo bible

mukāshafā 19

¹is ke bād maiṅ ne āsmān par ek baṛe hujūm kī sī āwāz sunī jis ne kahā, “allāh kī tamjīd ho! najāt, jalāl aur qudrat hamāre ḳhudā ko hāsil hai.

²kyūṅki us kī adālateṅ sachchī aur rāst haiṅ. us ne us baṛī kasbī ko mujrim ṭhahrāyā hai jis ne zamīn ko apnī zinākārī se bigāṛ diyā. us ne us se apne ḳhādimoṅ kī qatl-o-ġhārat kā badlā le liyā hai.”

³aur wuh dubārā bol uṭhe, “allāh kī tamjīd ho! is shahr kā dhuāṅ abad tak chaṛhtā rahtā hai.”

⁴chaubīs buzurgoṅ aur chār jāndāroṅ ne gir kar taḳht par baiṭhe allāh ko sijdā kiyā. unhoṅ ne kahā, “āmīn, allāh kī tamjīd ho.”

⁵phir taḳht kī taraf se ek āwāz sunāī dī. us ne kahā, “ai us ke tamām ḳhādimo, hamāre ḳhudā kī tamjīd karo. ai us kā ḳhauf mānane wālo, ḳhwāh baṛe ho yā chhoṭe us kī satāish karo.”

⁶phir maiṅ ne ek baṛe hujūm kī sī āwāz sunī, jo baṛī ābshār ke shor aur garajte bādaloṅ kī kaṛak kī mānind thī. in logoṅ ne kahā, “allāh kī tamjīd ho! kyūṅki hamārā rab qādir-e-mutlaq ḳhudā taḳhtnashīn ho gayā hai.

⁷āo, ham masrūr hoṅ, ḳhushī manāeṅ aur use jalāl deṅ, kyūṅki lele kī shādī kā waqt ā gayā hai. us kī dulhan ne apne āp ko tayyār kar liyā hai,

⁸aur use pahnane ke lie bārīk katān kā chamaktā aur pāk-sāf libās de diyā gayā.” (bārīk katān se murād muqaddasīn ke rāst kām haiṅ.)

⁹phir farishte ne mujh se kahā, “likh, mubārak haiṅ wuh jinheṅ lele kī shādī kī ziyāfat ke lie dāwat mil gaī hai.” us ne mazīd kahā, “yih allāh ke sachche alfāz haiṅ.”

¹⁰is par maiṅ use sijdā karne ke lie us ke pāoṅ meṅ gir gayā. lekin us ne mujh se kahā, “aisā mat kar! maiṅ bhī terā aur tere un bhāiyoṅ kā hamḳhidmat hūṅ jo īsā kī gawāhī dene par qāim haiṅ. sirf allāh ko sijdā kar. kyūṅki jo īsā ke bāre meṅ gawāhī detā hai wuh yih nabuwwat kī rūh meṅ kartā hai.”

¹¹phir maiṅ ne āsmān ko khulā dekhā. ek safed ghoṛā nazar āyā jis ke sawār kā nām “wafādār aur sachchā” hai, kyūṅki wuh insāf se adālat aur jang kartā hai.

¹²us kī āṅkheṅ bhaṛakte shole kī mānind haiṅ aur us ke sar par bahut se tāj haiṅ. us par ek nām likhā hai jise sirf wuhī jāntā hai, koī aur use nahīṅ jāntā.

¹³wuh ek libās se mulabbas thā jise ḳhūn meṅ ḍuboyā gayā thā. us kā nām “allāh kā kalām” hai.

¹⁴āsmān kī faujeṅ us ke pīchhe pīchhe chal rahī thīṅ. sab safed ghoṛoṅ par sawār the aur bārīk katān ke chamakte aur pāk-sāf kapṛe pahne hue the.

¹⁵us ke muṅh se ek tez talwār nikaltī hai jis se wuh qaumoṅ ko mār degā. wuh lohe ke shāhī asā se un par hukūmat karegā. hāṅ, wuh angūr kā ras nikālne ke hauz meṅ unheṅ kuchal ḍālegā. yih hauz kyā hai? allāh qādir-e-mutlaq kā saḳht ġhazab.

¹⁶us ke libās aur rān par yih nām likhā hai, “bādshāhoṅ kā bādshāh aur rabboṅ kā rab.”

¹⁷phir maiṅ ne ek farishtā sūraj par khaṛā dekhā. us ne ūṅchī āwāz se pukār kar un tamām parindoṅ se jo mere sar par manḍlā rahe the kahā, “āo, allāh kī baṛī ziyāfat ke lie jamā ho jāo.

¹⁸phir tum bādshāhoṅ, jarnailoṅ, baṛe baṛe afsaroṅ, ghoṛoṅ aur un ke sawāroṅ kā gosht khāoge, hāṅ tamām logoṅ kā gosht, ḳhwāh āzād hoṅ yā ġhulām, chhoṭe hoṅ yā baṛe.”

¹⁹phir maiṅ ne haiwān aur bādshāhoṅ ko un kī faujoṅ samet dekhā. wuh ghoṛe par “allāh kā kalām” nāmī sawār aur us kī fauj se jang karne ke lie jamā hue the.

²⁰lekin haiwān ko giriftār kiyā gayā. us ke sāth us jhūṭe nabī ko bhī giriftār kiyā gayā jis ne haiwān kī ḳhātir mojizānā nishān dikhāe the. in mojizoṅ ke wasīle se us ne un ko fareb diyā thā jinheṅ haiwān kā nishān mil gayā thā aur jo us ke mujassame ko sijdā karte the. donoṅ ko jaltī huī gandhak kī sholāḳhez jhīl meṅ phaiṅkā gayā.

²¹bāqī logoṅ ko us talwār se mār ḍālā gayā jo ghoṛe par sawār ke muṅh se nikaltī thī. aur tamām parinde lāshoṅ kā gosht khā kar ser ho gae.