Read Roman Urdu Geo mukāshafā 21 Bible Online

mukāshafā 21 - Roman Urdu Geo bible

mukāshafā 21

¹phir maiṅ ne ek nayā āsmān aur ek naī zamīn dekhī. kyūṅki pahlā āsmān aur pahlī zamīn ḳhatm ho gae the aur samundar bhī nest thā.

²maiṅ ne nae yarūshalam ko bhī dekhā. yih muqaddas shahr dulhan kī sūrat meṅ allāh ke pās se āsmān par se utar rahā thā. aur yih dulhan apne dūlhe ke lie tayyār aur sajī huī thī.

³maiṅ ne ek āwāz sunī jis ne taḳht par se kahā, “ab allāh kī sukūnatgāh insānoṅ ke darmiyān hai. wuh un ke sāth sukūnat karegā aur wuh us kī qaum hoṅge. allāh ḳhud un kā ḳhudā hogā.

⁴wuh un kī āṅkhoṅ se tamām āṅsū poṅchh ḍālegā. ab se na maut hogī na mātam, na ronā hogā na dard, kyūṅki jo bhī pahle thā wuh jātā rahā hai.”

⁵jo taḳht par baiṭhā thā us ne kahā, “maiṅ sab kuchh nae sire se banā rahā hūṅ.” us ne yih bhī kahā, “yih likh de, kyūṅki yih alfāz qābil-e-etimād aur sachche haiṅ.”

⁶phir us ne kahā, “kām mukammal ho gayā hai! maiṅ alif aur ye, awwal aur āḳhir hūṅ. jo pyāsā hai use maiṅ zindagī ke chashme se muft pānī pilāūṅgā.

⁷jo ġhālib āegā wuh yih sab kuchh wirāsat meṅ pāegā. maiṅ us kā ḳhudā hūṅgā aur wuh merā farzand hogā.

⁸lekin buzdiloṅ, ġhairīmāndāroṅ, ghinaunoṅ, qātiloṅ, zinākāroṅ, jādūgaroṅ, butparastoṅ aur tamām jhūṭe logoṅ kā anjām jaltī huī gandhak kī sholāḳhez jhīl hai. yih dūsrī maut hai.”

⁹jin sāt farishtoṅ ke pās sāt āḳhirī balāoṅ se bhare pyāle the un meṅ se ek ne mere pās ā kar kahā, “ā, maiṅ tujhe dulhan yānī lele kī bīwī dikhāūṅ.”

¹⁰wuh mujhe rūh meṅ uṭhā kar ek baṛe aur ūṅche pahāṛ par le gayā. wahāṅ se us ne mujhe muqaddas shahr yarūshalam dikhāyā jo allāh kī taraf se āsmān par se utar rahā thā.

¹¹use allāh kā jalāl hāsil thā aur wuh anmol jauhar balki billaur jaise sāf-shaffāf yashab kī tarah chamak rahā thā.

¹²us kī baṛī aur ūṅchī fasīl meṅ bārah darwāze the, aur har darwāze par ek farishtā khaṛā thā. darwāzoṅ par isrāīl ke bārah qabīloṅ ke nām likhe the.

¹³tīn darwāze mashriq kī taraf the, tīn shimāl kī taraf, tīn junūb kī taraf aur tīn maġhrib kī taraf.

¹⁴shahr kī fasīl kī bārah bunyādeṅ thīṅ jin par lele ke bārah rasūloṅ ke nām likhe the.

¹⁵jis farishte ne mujh se bāt kī thī us ke pās sone kā gaz thā tāki shahr, us ke darwāzoṅ aur us kī fasīl kī paimāish kare.

¹⁶shahr chaukor thā. us kī lambāī utnī hī thī jitnī us kī chauṛāī. farishte ne gaz se shahr kī paimāish kī to patā chalā ki us kī lambāī, chauṛāī aur ūṅchāī 2,400 kilomīṭar hai.

¹⁷jab us ne fasīl kī paimāish kī to chauṛāī 60 mīṭar thī yānī us paimāne ke hisāb se jo wuh istemāl kar rahā thā.

¹⁸fasīl yashab kī thī jabki shahr ḳhālis sone kā thā, yānī sāf-shaffāf shīshe jaise sone kā.

¹⁹shahr kī bunyādeṅ har qism ke qīmtī jawāhir se sajī huī thīṅ: pahlī yashab [2] se, dūsrī sang-e-lājaward [3] se, tīsrī sang-e-yamānī [4] se, chauthī zumurrad se,

²⁰pāṅchwīṅ sang-e-sulaimānī [5] se, chhaṭī aqīq-e-ahmar [6] se, sātwīṅ zabarjad [7] se, āṭhwīṅ āb-e-bahr [8] se, nawwīṅ pukhrāj [9] se, daswīṅ aqīq-e-sabz [10] se, gyārhwīṅ nīle rang ke zarqon [11] se aur bārhwīṅ yāqūt-e-arġhawānī [12] se.

²¹bārah darwāze bārah motī the aur har darwāzā ek motī kā thā. shahr kī baṛī saṛak ḳhālis sone kī thī, yānī sāf-shaffāf shīshe jaise sone kī.

²²maiṅ ne shahr meṅ allāh kā ghar na dekhā, kyūṅki rab qādir-e-mutlaq ḳhudā aur lelā hī us kā maqdis haiṅ.

²³shahr ko sūraj yā chāṅd kī zarūrat nahīṅ jo use raushan kare, kyūṅki allāh kā jalāl use raushan kar detā hai aur lelā us kā charāġh hai.

²⁴qaumeṅ us kī raushnī meṅ chaleṅgī, aur zamīn ke bādshāh apnī shān-o-shaukat us meṅ lāeṅge.

²⁵us ke darwāze kisī bhī din band nahīṅ hoṅge kyūṅki wahāṅ kabhī bhī rāt kā waqt nahīṅ āegā.

²⁶qaumoṅ kī shān-o-shaukat us meṅ lāī jāegī.

²⁷koī nāpāk chīz us meṅ dāḳhil nahīṅ hogī, na wuh jo ghinaunī harkateṅ kartā aur jhūṭ boltā hai. sirf wuh dāḳhil hoṅge jin ke nām lele kī kitāb-e-hayāt meṅ darj haiṅ.