Read Roman Urdu Geo mukāshafā 22 Bible Online

mukāshafā 22 - Roman Urdu Geo bible

mukāshafā 22

¹phir farishte ne mujhe zindagī ke pānī kā daryā dikhāyā. wuh billaur jaisā sāf-shaffāf thā aur allāh aur lele ke taḳht se nikal kar

²shahr kī baṛī saṛak ke bīch meṅ se bah rahā thā. daryā ke donoṅ kināroṅ par zindagī kā daraḳht thā. yih daraḳht sāl meṅ bārah dafā phal lātā thā, har mahīne meṅ ek bār. aur daraḳht ke patte qaumoṅ kī shifā ke lie istemāl hote the.

³wahāṅ koī bhī malaūn chīz nahīṅ hogī. allāh aur lele kā taḳht shahr meṅ hoṅge aur us ke ḳhādim us kī ḳhidmat kareṅge.

⁴wuh us kā chehrā dekheṅge, aur us kā nām un ke māthoṅ par hogā.

⁵wahāṅ rāt nahīṅ hogī aur unheṅ kisī charāġh yā sūraj kī raushnī kī zarūrat nahīṅ hogī, kyūṅki rab ḳhudā unheṅ raushnī degā. wahāṅ wuh abad tak hukūmat kareṅge.

⁶farishte ne mujh se kahā, “yih bāteṅ qābil-e-etimād aur sachchī haiṅ. rab ne jo nabiyoṅ kī rūhoṅ kā ḳhudā hai apne farishte ko bhej diyā tāki apne ḳhādimoṅ ko wuh kuchh dikhāe jo jald hone wālā hai.”

⁷īsā farmātā hai, “dekho, maiṅ jald āūṅgā. mubārak hai wuh jo is kitāb kī peshgoiyoṅ ke mutābiq zindagī guzārtā hai.”

⁸maiṅ yūhannā ne ḳhud yih kuchh sunā aur dekhā hai. aur use sunane aur deḳhne ke bād maiṅ us farishte ke pāoṅ meṅ gir gayā jis ne mujhe yih dikhāyā thā aur use sijdā karnā chāhtā thā.

⁹lekin us ne mujh se kahā, “aisā mat kar! maiṅ bhī usī kā ḳhādim hūṅ jis kā tū, tere bhāī nabī aur kitāb kī pairawī karne wāle haiṅ. ḳhudā hī ko sijdā kar!”

¹⁰phir us ne majhe batāyā, “is kitāb kī peshgoiyoṅ par muhr mat lagānā, kyūṅki waqt qarīb ā gayā hai.

¹¹jo ġhalat kām kar rahā hai wuh ġhalat kām kartā rahe. jo ghinaunā hai wuh ghinaunā hotā jāe. jo rāstbāz hai wuh rāstbāzī kartā rahe. jo muqaddas hai wuh muqaddas hotā jāe.”

¹²īsā farmātā hai, “dekho, maiṅ jald āne ko hūṅ. maiṅ ajr le kar āūṅgā aur maiṅ har ek ko us ke kāmoṅ ke muwāfiq ajr dūṅgā.

¹³maiṅ alif aur ye, awwal aur āḳhir, ibtidā aur intihā hūṅ.”

¹⁴mubārak haiṅ wuh jo apne libās ko dhote haiṅ. kyūṅki wuh zindagī ke daraḳht ke phal se khāne aur darwāzoṅ ke zarī'e shahr meṅ dāḳhil hone kā haq rakhte haiṅ.

¹⁵lekin bāqī sab shahr ke bāhar raheṅge. kutte, zinākār, qātil, butparast aur tamām wuh log jo jhūṭ ko pyār karte aur us par amal karte haiṅ sab ke sab bāhar raheṅge.

¹⁶“maiṅ īsā ne apne farishte ko tumhāre pās bhejā hai tāki wuh jamā'atoṅ ke lie tumheṅ in bātoṅ kī gawāhī de. maiṅ dāūd kī jaṛ aur aulād hūṅ, maiṅ hī chamaktā huā subh kā sitārā hūṅ.”

¹⁷rūh aur dulhan kahtī haiṅ, “ā!” har sunane wālā bhī yihī kahe, “ā!” jo pyāsā ho wuh āe aur jo chāhe wuh zindagī kā pānī muft le le.

¹⁸maiṅ, yūhannā har ek ko jo is kitāb kī peshgoiyāṅ suntā hai āgāh kartā hūṅ, agar koī is kitāb meṅ kisī bhī bāt kā izāfā kare to allāh us kī zindagī meṅ un balāoṅ kā izāfā karegā jo is kitāb meṅ bayān kī gaī haiṅ.

¹⁹aur agar koī nabuwwat kī is kitāb se bāteṅ nikāle to allāh us se kitāb meṅ mazkūr zindagī ke daraḳht ke phal se khāne aur muqaddas shahr meṅ rahne kā haq chhīn legā.

²⁰jo in bātoṅ kī gawāhī detā hai wuh farmātā hai, “jī hāṅ! maiṅ jald hī āne ko hūṅ.” “āmīn! ai ḳhudāwand īsā ā!”

²¹ḳhudāwand īsā kā fazl sab ke sāth rahe.