Read Roman Urdu Geo mukāshafā 3 Bible Online

mukāshafā 3 - Roman Urdu Geo bible

mukāshafā 3

¹sardīs meṅ maujūd jamā'at ke farishte ko yih likh denā: yih us kā farmān hai jo allāh kī sāt rūhoṅ aur sāt sitāroṅ ko apne hāth meṅ thāme rakhtā hai. maiṅ tere kāmoṅ ko jāntā hūṅ. tū zindā to kahlātā hai lekin hai murdā.

²jāg uṭh. jo bāqī rah gayā hai aur marne wālā hai use mazbūt kar. kyūṅki maiṅ ne tere kām apne ḳhudā kī nazar meṅ mukammal nahīṅ pāe.

³chunāṅche jo kuchh tujhe milā hai aur jo tū ne sunā hai use yād rakhnā. use mahfūz rakh aur taubā kar. agar tū bedār na ho to maiṅ chor kī tarah āūṅgā aur tujhe mālūm nahīṅ hogā ki maiṅ kab tujh par ān paṛūṅgā.

⁴lekin sardīs meṅ tere kuchh aise log haiṅ jinhoṅ ne apne libās ālūdā nahīṅ kie. wuh safed kapṛe pahne hue mere sāth chaleṅ phireṅge, kyūṅki wuh is ke lāiq haiṅ.

⁵jo ġhālib āegā wuh bhī un kī tarah safed kapṛe pahne hue phiregā. maiṅ us kā nām kitāb-e-hayāt se nahīṅ miṭāūṅgā balki apne bāp aur us ke farishtoṅ ke sāmne iqrār karūṅga ki yih merā hai.

⁶jo sun saktā hai wuh sun le ki rūh-ul-quds jamā'atoṅ ko kyā kuchh batā rahā hai.

⁷filadilfiyā meṅ maujūd jamā'at ke farishte ko yih likh denā: yih us kā farmān hai jo quddūs aur sachchā hai, jis ke hāth meṅ dāūd kī chābī hai. jo kuchh wuh kholtā hai use koī band nahīṅ kar saktā, aur jo kuchh wuh band kar detā hai use koī khol nahīṅ saktā.

⁸maiṅ tere kāmoṅ ko jāntā hūṅ. dekh, maiṅ ne tere sāmne ek aisā darwāzā khol rakhā hai jise koī band nahīṅ kar saktā. mujhe mālūm hai ki terī tāqat kam hai. lekin tū ne mere kalām ko mahfūz rakhā hai aur mere nām kā inkār nahīṅ kiyā.

⁹dekh, jahāṅ tak un kā tālluq hai jo iblīs kī jamā'at se haiṅ, wuh jo yahūdī hone kā dāwā karte haiṅ hālāṅki wuh jhūṭ bolte haiṅ, maiṅ unheṅ tere pās āne dūṅgā, unheṅ tere pāoṅ meṅ jhuk kar yih taslīm karne par majbūr karūṅga ki maiṅ ne tujhe pyār kiyā hai.

¹⁰tū ne merā sābitqadam rahne kā hukm pūrā kiyā, is lie maiṅ tujhe āzmāish kī us ghaṛī se bachāe rakhūṅgā jo pūrī duniyā par ā kar us meṅ basne wāloṅ ko āzmāegī.

¹¹maiṅ jald ā rahā hūṅ. jo kuchh tere pās hai use mazbūtī se thāme rakhnā tāki koī tujh se terā tāj chhīn na le.

¹²jo ġhālib āegā use maiṅ apne ḳhudā ke ghar meṅ satūn banāūṅgā, aisā satūn jo use kabhī nahīṅ chhoṛegā. maiṅ us par apne ḳhudā kā nām aur apne ḳhudā ke shahr kā nām likh dūṅgā, us nae yarūshalam kā nām jo mere ḳhudā ke hāṅ se utarne wālā hai. hāṅ, maiṅ us par apnā nayā nām bhī likh dūṅgā.

¹³jo sun saktā hai wuh sun le ki rūh-ul-quds jamā'atoṅ ko kyā kuchh batā rahā hai.

¹⁴laudīkiyā meṅ maujūd jamā'at ke farishte ko yih likh denā: yih us kā farmān hai jo āmīn hai, wuh jo wafādār aur sachchā gawāh aur allāh kī kāināt kā mambā hai.

¹⁵maiṅ tere kāmoṅ ko jāntā hūṅ. tū na to sard hai, na garm. kāsh tū in meṅ se ek hotā!

¹⁶lekin chūṅki tū nīmgarm hai, na garm, na sard, is lie maiṅ tujhe qai karke apne muṅh se nikāl phaiṅkūṅgā.

¹⁷tū kahtā hai, ‘maiṅ amīr hūṅ, maiṅ ne bahut daulat hāsil kar lī hai aur mujhe kisī bhī chīz kī zarūrat nahīṅ.’ aur tū nahīṅ jāntā ki tū asal meṅ badbaḳht, qābil-e-rahm, ġharīb, andhā aur nangā hai.

¹⁸maiṅ tujhe mashwarā detā hūṅ ki mujh se āg meṅ ḳhālis kiyā gayā sonā ḳharīd le. tab hī tū daulatmand banegā. aur mujh se safed libās ḳharīd le jis ko pahnane se tere nangepan kī sharm zāhir nahīṅ hogī. is ke ilāwā mujh se āṅkhoṅ meṅ lagāne ke lie marham ḳharīd le tāki tū dekh sake.

¹⁹jin ko maiṅ pyār kartā hūṅ un kī maiṅ sazā de kar tarbiyat kartā hūṅ. ab sanjīdā ho jā aur taubā kar.

²⁰dekh, maiṅ darwāze par khaṛā khaṭkhaṭā rahā hūṅ. agar koī merī āwāz sun kar darwāzā khole to maiṅ andar ā kar us ke sāth khānā khāūṅgā aur wuh mere sāth.

²¹jo ġhālib āe use maiṅ apne sāth apne taḳht par baiṭhne kā haq dūṅgā, bilkul usī tarah jis tarah maiṅ ḳhud bhī ġhālib ā kar apne bāp ke sāth us ke taḳht par baiṭh gayā.

²²jo sun saktā hai wuh sun le ki rūh-ul-quds jamā'atoṅ ko kyā kuchh batā rahā hai.”