Read Roman Urdu Geo mukāshafā 5 Bible Online

mukāshafā 5 - Roman Urdu Geo bible

mukāshafā 5

¹phir maiṅ ne taḳht par baiṭhne wāle ke dahne hāth meṅ ek tūmār dekhā jis par donoṅ taraf likhā huā thā aur jis par sāt muhreṅ lagī thīṅ.

²aur maiṅ ne ek tāqatwar farishtā dekhā jis ne ūṅchī āwāz se elān kiyā, “kaun muhroṅ ko toṛ kar tūmār ko kholne ke lāiq hai?”

³lekin na āsmān par, na zamīn par aur na zamīn ke nīche koī thā jo tūmār ko khol kar us meṅ nazar ḍāl saktā.

⁴maiṅ ḳhūb ro paṛā, kyūṅki koī is lāiq na pāyā gayā ki wuh tūmār ko khol kar us meṅ nazar ḍāl saktā.

⁵lekin buzurgoṅ meṅ se ek ne mujh se kahā, “mat ro. dekh, yahūdāh qabīle ke sherbabar aur dāūd kī jaṛ ne fath pāī hai, aur wuhī tūmār kī sāt muhroṅ ko khol saktā hai.”

⁶phir maiṅ ne ek lelā dekhā jo taḳht ke darmiyān khaṛā thā. wuh chār jāndāroṅ aur buzurgoṅ se ghirā huā thā aur yūṅ lagtā thā ki use zabah kiyā gayā ho. us ke sāt sīṅg aur sāt āṅkheṅ thīṅ. in se murād allāh kī wuh sāt rūh haiṅ jinheṅ duniyā kī har jagah bhejā gayā hai.

⁷lele ne ā kar taḳht par baiṭhne wāle ke dahne hāth se tūmār ko le liyā.

⁸aur lete waqt chār jāndār aur 24 buzurg lele ke sāmne muṅh ke bal gir gae. har ek ke pās ek sarod aur baḳhūr se bhare sone ke pyāle the. in se murād muqaddasīn kī duāeṅ haiṅ.

⁹sāth sāth wuh ek nayā gīt gāne lage, “tū tūmār ko le kar us kī muhroṅ ko kholne ke lāiq hai. kyūṅki tujhe zabah kiyā gayā, aur apne ḳhūn se tū ne logoṅ ko har qabīle, har ahl-e-zabān, har millat aur har qaum se allāh ke lie ḳharīd liyā hai.

¹⁰tū ne unheṅ shāhī iḳhtiyār de kar hamāre ḳhudā ke imām banā diyā hai. aur wuh duniyā meṅ hukūmat kareṅge.”

¹¹maiṅ ne dubārā dekhā to beshumār farishtoṅ kī āwāz sunī. wuh taḳht, chār jāndāroṅ aur buzurgoṅ ke irdgird khaṛe

¹²ūṅchī āwāz se kah rahe the, “lāiq hai wuh lelā jo zabah kiyā gayā hai. wuh qudrat, daulat, hikmat aur tāqat, izzat, jalāl aur satāish pāne ke lāiq hai.”

¹³phir maiṅ ne āsmān par, zamīn par, zamīn ke nīche aur samundar kī har maḳhlūq kī āwāzeṅ sunīṅ. hāṅ, kāināt kī sab maḳhlūqāt yih gā rahe the, “taḳht par baiṭhne wāle aur lele kī satāish aur izzat, jalāl aur qudrat azal se abad tak rahe.”

¹⁴chār jāndāroṅ ne jawāb meṅ “āmīn” kahā, aur buzurgoṅ ne gir kar sijdā kiyā.