Read Roman Urdu Geo mukāshafā 8 Bible Online

mukāshafā 8 - Roman Urdu Geo bible

mukāshafā 8

¹jab lele ne sātwīṅ muhr kholī to āsmān par ḳhāmoshī chhā gaī. yih ḳhāmoshī taqrīban ādhe ghanṭe tak rahī.

²phir maiṅ ne allāh ke sāmne khaṛe sāt farishtoṅ ko dekhā. unheṅ sāt turam die gae.

³ek aur farishtā jis ke pās sone kā baḳhūrdān thā ā kar qurbāngāh ke pās khaṛā ho gayā. use bahut sā baḳhūr diyā gayā tāki wuh use muqaddasīn kī duāoṅ ke sāth taḳht ke sāmne kī sone kī qurbāngāh par pesh kare.

⁴baḳhūr kā dhuāṅ muqaddasīn kī duāoṅ ke sāth farishte ke hāth se uṭhte uṭhte allāh ke sāmne pahuṅchā.

⁵phir farishte ne baḳhūrdān ko liyā aur use qurbāngāh kī āg se bhar kar zamīn par phaiṅk diyā. tab kaṛaktī aur garajtī āwāzeṅ sunāī dīṅ, bijlī chamakne lagī aur zalzalā ā gayā.

⁶phir jin sāt farishtoṅ ke pās sāt turam the wuh unheṅ bajāne ke lie tayyār hue.

⁷pahle farishte ne apne turam ko bajā diyā. is par ole aur ḳhūn ke sāth milāī gaī āg paidā ho kar zamīn par barsāī gaī. is se zamīn kā tīsrā hissā, daraḳhtoṅ kā tīsrā hissā aur tamām harī ghās bhasm ho gaī.

⁸phir dūsre farishte ne apne turam meṅ phūṅk mārī. is par jaltī huī ek baṛī pahāṛnumā chīz ko samundar meṅ phaiṅkā gayā. samundar kā tīsrā hissā ḳhūn meṅ badal gayā,

⁹samundar meṅ maujūd zindā maḳhlūqāt kā tīsrā hissā halāk aur bahrī jahāzoṅ kā tīsrā hissā tabāh ho gayā.

¹⁰phir tīsre farishte ne apne turam meṅ phūṅk mārī. is par mash'al kī tarah bhaṛaktā huā ek baṛā sitārā āsmān se daryāoṅ ke tīsre hisse aur pānī ke chashmoṅ par gir gayā.

¹¹is sitāre kā nām afsantīn thā aur is se pānī kā tīsrā hissā afsantīn jaisā kaṛwā ho gayā. bahut se log yih kaṛwā pānī pīne se mar gae.

¹²phir chauthe farishte ne apne turam meṅ phūṅk mārī. is par sūraj kā tīsrā hissā, chāṅd kā tīsrā hissā aur sitāroṅ kā tīsrā hissā raushnī se mahrūm ho gayā. din kā tīsrā hissā raushnī se mahrūm huā aur isī tarah rāt kā tīsrā hissā bhī.

¹³phir deḳhte deḳhte maiṅ ne ek uqāb ko sunā jis ne mere sar ke ūpar hī bulandiyoṅ par uṛte hue ūṅchī āwāz se pukārā, “afsos! afsos! zamīn ke bāshindoṅ par afsos! kyūṅki tīn farishtoṅ ke turamoṅ kī āwāzeṅ abhī bāqī haiṅ.”