Read Roman Urdu Geo mukāshafā 9 Bible Online

mukāshafā 9 - Roman Urdu Geo bible

mukāshafā 9

¹phir pāṅchweṅ farishte ne apne turam meṅ phūṅk mārī. is par maiṅ ne ek sitārā dekhā jo āsmān se zamīn par gir gayā thā. is sitāre ko athāh gaṛhe ke rāste kī chābī dī gaī.

²us ne athāh gaṛhe kā rāstā khol diyā to us se dhuāṅ nikal kar ūpar āyā, yūṅ jaise dhuāṅ kisī baṛe bhaṭṭe se nikaltā hai. sūraj aur chāṅd athāh gaṛhe ke is dhueṅ se tārīk ho gae.

³aur dhueṅ meṅ se ṭiḍḍiyāṅ nikal kar zamīn par utar āīṅ. unheṅ zamīn ke bichchhū'oṅ jaisā iḳhtiyār diyā gayā.

⁴unheṅ batāyā gayā, “na zamīn kī ghās, na kisī paude yā daraḳht ko nuqsān pahuṅchāo balki sirf un logoṅ ko jin ke māthoṅ par allāh kī muhr nahīṅ lagī hai.”

⁵ṭiḍḍiyoṅ ko in logoṅ ko mār ḍālne kā iḳhtiyār na diyā gayā balki unheṅ batāyā gayā ki wuh pāṅch mahīnoṅ tak in ko aziyat deṅ. aur yih aziyat us taqlīf kī mānind hai jo tab paidā hotī hai jab bichchhū kisī ko ḍanak mārtā hai.

⁶un pāṅch mahīnoṅ ke daurān log maut kī talāsh meṅ raheṅge, lekin use pāeṅge nahīṅ. wuh mar jāne kī shadīd ārzū kareṅge, lekin maut un se bhāg kar dūr rahegī.

⁷ṭiḍḍiyoṅ kī shakl-o-sūrat jang ke lie tayyār ghoṛoṅ kī mānind thī. un ke saroṅ par sone ke tājoṅ jaisī chīzeṅ thīṅ aur un ke chehre insānoṅ ke chehroṅ kī mānind the.

⁸un ke bāl ḳhawātīn ke bāloṅ kī mānind aur un ke dāṅt sherbabar ke dāṅtoṅ jaise the.

⁹yūṅ lagā jaise un ke sīnoṅ par lohe ke se zirābaktar lage hue the, aur un ke paroṅ kī āwāz beshumār rathoṅ aur ghoṛoṅ ke shor jaisī thī jab wuh muḳhālif par jhapaṭ rahe hote hoṅ.

¹⁰un kī dum par bichchhū kā sā ḍanak lagā thā aur unheṅ in hī dumoṅ se logoṅ ko pāṅch mahīnoṅ tak nuqsān pahuṅchāne kā iḳhtiyār thā.

¹¹un kā bādshāh athāh gaṛhe kā farishtā hai jis kā ibrānī nām abaddon aur yūnānī nām apulliyon (halākū) hai.

¹²yūṅ pahlā afsos guzar gayā, lekin is ke bād do mazīd afsos hone wāle haiṅ.

¹³chhaṭe farishte ne apne turam meṅ phūṅk mārī. is par maiṅ ne ek āwāz sunī jo allāh ke sāmne wāqe sone kī qurbāngāh ke chār konoṅ par lage sīṅgoṅ se āī.

¹⁴is āwāz ne chhaṭā turam pakaṛe hue farishte se kahā, “un chār farishtoṅ ko khulā chhoṛ denā jo baṛe daryā banām furāt ke pās bandhe hue haiṅ.”

¹⁵in chār farishtoṅ ko isī mahīne ke isī din ke isī ghanṭe ke lie tayyār kiyā gayā thā. ab inheṅ khulā chhoṛ diyā gayā tāki wuh insānoṅ kā tīsrā hissā mār ḍāleṅ.

¹⁶mujhe batāyā gayā ki ghoṛoṅ par sawār faujī bīs karoṛ the.

¹⁷royā meṅ ghoṛe aur sawār yūṅ nazar āe: sīnoṅ par lage zirābaktar āg jaise surḳh, nīle aur gandhak jaise pīle the. ghoṛoṅ ke sar sherbabar ke saroṅ se mutābiqat rakhte the aur un ke muṅh se āg, dhuāṅ aur gandhak nikaltī thī.

¹⁸āg, dhueṅ aur gandhak kī in tīn balāoṅ se insānoṅ kā tīsrā hissā halāk huā.

¹⁹har ghoṛe kī tāqat us ke muṅh aur dum meṅ thī, kyūṅki un kī dumeṅ sāṅp kī mānind thīṅ jin ke sar nuqsān pahuṅchāte the.

²⁰jo in balāoṅ se halāk nahīṅ hue the balki abhī bāqī the unhoṅ ne phir bhī apne hāthoṅ ke kāmoṅ se taubā na kī. wuh badrūhoṅ aur sone, chāṅdī, pītal, patthar aur lakaṛī ke butoṅ kī pūjā se bāz na āe hālāṅki aisī chīzeṅ na to dekh saktī haiṅ, na sunane yā chalne ke qābil hotī haiṅ.

²¹wuh qatl-o-ġhārat, jādūgarī, zinākārī aur choriyoṅ se bhī taubā karke bāz na āe.