Read Roman Urdu Geo rūt 1 Bible Online

rūt 1 - Roman Urdu Geo bible

rūt 1

¹un dinoṅ jab qāzī qaum kī rāhnumāī kiyā karte the to isrāīl meṅ kāl paṛā. yahūdāh ke shahr bait-laham meṅ ek ifrātī ādmī rahtā thā jis kā nām ilīmalik thā. kāl kī wajah se wuh apnī bīwī naomī aur apne do beṭoṅ mahlon aur kilyon ko le kar mulk-e-moāb meṅ jā basā.

³lekin kuchh der ke bād ilīmalik faut ho gayā, aur naomī apne do beṭoṅ ke sāth akelī rah gaī.

⁴mahlon aur kilyon ne moāb kī do auratoṅ se shādī kar lī. ek kā nām urfā thā aur dūsrī kā rūt. lekin taqrīban das sāl ke bād

⁵donoṅ beṭe bhī jāṅ-ba-haq ho gae. ab naomī kā na shauhar aur na beṭe hī rahe the.

⁶ek din naomī ko mulk-e-moāb meṅ ḳhabar milī ki rab apnī qaum par rahm karke use dubārā achchhī fasleṅ de rahā hai. tab wuh apne watan yahūdāh ke lie rawānā huī. urfā aur rūt bhī sāth chalīṅ. jab wuh us rāste par ā gaīṅ jo yahūdāh tak pahuṅchātā hai

⁸to naomī ne apnī bahū'oṅ se kahā, “ab apne māṅ-bāp ke ghar wāpas chalī jāeṅ. rab āp par utnā rahm kare jitnā āp ne marhūmoṅ aur mujh par kiyā hai.

⁹wuh āp ko nae ghar aur nae shauhar muhayyā karke sukūn de.” yih kah kar us ne unheṅ bosā diyā. donoṅ ro paṛīṅ

¹⁰aur etirāz kiyā, “hargiz nahīṅ, ham āp ke sāth āp kī qaum ke pās jāeṅgī.”

¹¹lekin naomī ne isrār kiyā, “beṭiyo, bas kareṅ aur apne apne ghar wāpas chalī jāeṅ. ab mere sāth jāne kā kyā fāidā? mujh se to mazīd koī beṭā paidā nahīṅ hogā jo āp kā shauhar ban sake.

¹²nahīṅ beṭiyo, wāpas chalī jāeṅ. maiṅ to itnī būṛhī ho chukī hūṅ ki dubārā shādī nahīṅ kar saktī. aur agar is kī ummīd bhī hotī balki merī shādī āj rāt ko hotī aur mere hāṅ beṭe paidā hote

¹³to kyā āp un ke bāliġh ho jāne tak intizār kar saktīṅ? kyā āp us waqt tak kisī aur se shādī karne se inkār kartīṅ? nahīṅ, beṭiyo. rab ne apnā hāth mere ḳhilāf uṭhāyā hai, to āp is lānat kī zad meṅ kyūṅ āeṅ?”

¹⁴tab urfā aur rūt dubārā ro paṛīṅ. urfā ne apnī sās ko chūm kar alwidā kahā, lekin rūt naomī ke sāth lipṭī rahī.

¹⁵naomī ne use samjhāne kī koshish kī, “dekheṅ, urfā apnī qaum aur apne dewatāoṅ ke pās wāpas chalī gaī hai. ab āp bhī aisā hī kareṅ.”

¹⁶lekin rūt ne jawāb diyā, “mujhe āp ko chhoṛ kar wāpas jāne par majbūr na kījie. jahāṅ āp jāeṅgī maiṅ jāūṅgī. jahāṅ āp raheṅgī wahāṅ maiṅ bhī rahūṅgī. āp kī qaum merī qaum aur āp kā ḳhudā merā ḳhudā hai.

¹⁷jahāṅ āp mareṅgī wahīṅ maiṅ marūṅgī aur wahīṅ dafn ho jāūṅgī. sirf maut hī mujhe āp se alag kar saktī hai. agar merā yih wādā pūrā na ho to allāh mujhe saḳht sazā de!”

¹⁸naomī ne jān liyā ki rūt kā sāth jāne kā pakkā irādā hai, is lie wuh ḳhāmosh ho gaī aur use samjhāne se bāz āī.

¹⁹wuh chal paṛīṅ aur chalte chalte bait-laham pahuṅch gaīṅ. jab dāḳhil huīṅ to pūre shahr meṅ halchal mach gaī. aurateṅ kahne lagīṅ, “kyā yih naomī nahīṅ hai?”

²⁰naomī ne jawāb diyā, “ab mujhe naomī [1] mat kahnā balki mārā, [2] kyūṅki qādir-e-mutlaq ne mujhe saḳht musībat meṅ ḍāl diyā hai.

²¹yahāṅ se jāte waqt mere hāth bhare hue the, lekin ab rab mujhe ḳhālī hāth wāpas le āyā hai. chunāṅche mujhe naomī mat kahnā. rab ne ḳhud mere ḳhilāf gawāhī dī hai, qādir-e-mutlaq ne mujhe is musībat meṅ ḍālā hai.”

²²jab naomī apnī moābī bahū ke sāth bait-laham pahuṅchī to jau kī fasal kī kaṭāī shurū ho chukī thī.