Read Roman Urdu Geo 1-samūel 10 Bible Online

1-samūel 10 - Roman Urdu Geo bible

1-samūel 10

¹phir samūel ne kuppī le kar sāūl ke sar par zaitūn kā tel unḍel diyā aur use bosā de kar kahā, “rab ne āp ko apnī ḳhās milkiyat par rāhnumā muqarrar kiyā hai.

²mere pās se chale jāne ke bād jab āp binyamīn kī sarhad ke shahr zilzaḳh ke qarīb rāḳhil kī qabr ke pās se guzareṅge to āp kī mulāqāt do ādmiyoṅ se hogī. wuh āp se kaheṅge, ‘jo gadhiyāṅ āp ḍhūṅḍne gae wuh mil gaī haiṅ. aur ab āp ke bāp gadhiyoṅ kī nahīṅ balki āp kī fikr kar rahe haiṅ. wuh kah rahe haiṅ ki maiṅ kis tarah apne beṭe kā patā karūṅ?’

³āp āge jā kar tabūr ke balūt ke daraḳht ke pās pahuṅcheṅge. wahāṅ tīn ādmī āp se mileṅge jo allāh kī ibādat karne ke lie bait-el jā rahe hoṅge. ek ke pās tīn chhoṭī bakriyāṅ, dūsre ke pās tīn roṭiyāṅ aur tīsre ke pās mai kī mashk hogī.

⁴wuh āp ko salām kah kar do roṭiyāṅ deṅge. un kī yih roṭiyāṅ qabūl kareṅ.

⁵is ke bād āp allāh ke jibiā jāeṅge jahāṅ filistiyoṅ kī chaukī hai. shahr meṅ dāḳhil hote waqt āp kī mulāqāt nabiyoṅ ke ek julūs se hogī jo us waqt pahāṛī kī qurbāngāh se utar rahā hogā. un ke āge āge sitār, daf, bāṅsriyāṅ aur sarod bajāne wāle chaleṅge, aur wuh nabuwwat kī hālat meṅ hoṅge.

⁶rab kā rūh āp par bhī nāzil hogā, aur āp un ke sāth nabuwwat kareṅge. us waqt āp farq shaḳhs meṅ tabdīl ho jāeṅge.

⁷jab yih tamām nishān wujūd meṅ āeṅge to wuh kuchh kareṅ jo āp ke zahan meṅ ā jāe, kyūṅki allāh āp ke sāth hogā.

⁸phir mere āge jiljāl chale jāeṅ. maiṅ bhī āūṅgā aur wahāṅ bhasm hone wālī aur salāmatī kī qurbāniyāṅ pesh karūṅga. lekin āp ko sāt din merā intizār karnā hai. phir maiṅ ā kar āp ko batā dūṅgā ki āge kyā karnā hai.”

⁹sāūl rawānā hone ke lie samūel ke pās se muṛā to allāh ne us kā dil tabdīl kar diyā. jin nishānoṅ kī bhī peshgoī samūel ne kī thī wuh usī din pūrī huī.

¹⁰jab sāūl aur us kā naukar jibiā pahuṅche to wahāṅ un kī mulāqāt mazkūrā nabiyoṅ ke julūs se huī. allāh kā rūh sāūl par nāzil huā, aur wuh un ke darmiyān nabuwwat karne lagā.

¹¹kuchh log wahāṅ the jo bachpan se us se wāqif the. sāūl ko yūṅ nabiyoṅ ke darmiyān nabuwwat karte hue dekh kar wuh āpas meṅ kahne lage, “qīs ke beṭe ke sāth kyā huā? kyā sāūl ko bhī nabiyoṅ meṅ shumār kiyā jātā hai?”

¹²ek maqāmī ādmī ne jawāb diyā, “kaun in kā bāp hai?” bād meṅ yih muhāwarā ban gayā, “kyā sāūl ko bhī nabiyoṅ meṅ shumār kiyā jātā hai?”

¹³nabuwwat karne ke iḳhtitām par sāūl pahāṛī par chaṛh gayā jahāṅ qurbāngāh thī.

¹⁴jab sāūl naukar samet wahāṅ pahuṅchā to us ke chachā ne pūchhā, “āp kahāṅ the?” sāūl ne jawāb diyā, “ham gumshudā gadhiyoṅ ko ḍhūṅḍne ke lie nikle the. lekin jab wuh na milīṅ to ham samūel ke pās gae.”

¹⁵chachā bolā, “achchhā? us ne āp ko kyā batāyā?”

¹⁶sāūl ne jawāb diyā, “ḳhair, us ne kahā ki gadhiyāṅ mil gaī haiṅ.” lekin jo kuchh samūel ne bādshāh banane ke bāre meṅ batāyā thā us kā zikr us ne na kiyā.

¹⁷kuchh der ke bād samūel ne awām ko bulā kar misfāh meṅ rab ke huzūr jamā kiyā.

¹⁸us ne kahā, “rab isrāīl kā ḳhudā farmātā hai, ‘maiṅ isrāīl ko misr se nikāl lāyā. maiṅ ne tumheṅ misriyoṅ aur un tamām saltanatoṅ se bachāyā jo tum par zulm kar rahī thīṅ.

¹⁹lekin go maiṅ ne tumheṅ tumhārī tamām musībatoṅ aur tangiyoṅ se chhuṭkārā diyā to bhī tum ne apne ḳhudā ko mustarad kar diyā. kyūṅki tum ne isrār kiyā ki ham par bādshāh muqarrar karo! ab apne apne qabīloṅ aur ḳhāndānoṅ kī tartīb ke mutābiq rab ke huzūr khaṛe ho jāo’.”

²⁰yih kah kar samūel ne tamām qabīloṅ ko rab ke huzūr pesh kiyā. qur'ā ḍālā gayā to binyamīn ke qabīle ko chunā gayā.

²¹phir samūel ne binyamīn ke qabīle ke sāre ḳhāndānoṅ ko rab ke huzūr pesh kiyā. matrī ke ḳhāndān ko chunā gayā. yūṅ qur'ā ḍālte ḍālte sāūl bin qīs ko chunā gayā. lekin jab sāūl ko ḍhūnḍā gayā to wuh ġhāib thā.

²²unhoṅ ne rab se daryāft kiyā, “kyā sāūl yahāṅ pahuṅch chukā hai?” rab ne jawāb diyā, “wuh sāmān ke bīch meṅ chhup gayā hai.”

²³kuchh log dauṛ kar use sāmān meṅ se nikāl kar awām ke pās le āe. jab wuh logoṅ meṅ khaṛā huā to itnā lambā thā ki bāqī sab log sirf us ke kandhoṅ tak āte the.

²⁴samūel ne kahā, “yih ādmī dekho jise rab ne chun liyā hai. awām meṅ us jaisā koī nahīṅ hai!” tamām log ḳhushī ke māre “bādshāh zindābād!” kā nārā lagāte rahe.

²⁵samūel ne bādshāh ke huqūq tafsīl se sunāe. us ne sab kuchh kitāb meṅ likh diyā aur use rab ke maqdis meṅ mahfūz rakhā. phir us ne awām ko ruḳhsat kar diyā.

²⁶sāūl bhī apne ghar chalā gayā jo jibiā meṅ thā. kuchh faujī us ke sāth chale jin ke diloṅ ko allāh ne chhū diyā thā.

²⁷lekin aise sharīr log bhī the jinhoṅ ne us kā mazāq uṛā kar pūchhā, “bhalā yih kis tarah hameṅ bachā saktā hai?” wuh use haqīr jānte the aur use tohfe pesh karne ke lie bhī tayyār na hue. lekin sāūl un kī bāteṅ nazarandāz karke ḳhāmosh hī rahā.