Read Roman Urdu Geo 1-samūel 15 Bible Online

1-samūel 15 - Roman Urdu Geo bible

1-samūel 15

¹ek din samūel ne sāūl ke pās ā kar us se bāt kī, “rab hī ne mujhe āp ko masah karke isrāīl par muqarrar karne kā hukm diyā thā. ab rab kā paiġhām sun leṅ!

²rabb-ul-afwāj farmātā hai, ‘maiṅ amālīqiyoṅ kā merī qaum ke sāth sulūk nahīṅ bhūl saktā. us waqt jab isrāīlī misr se nikal kar kan'ān kī taraf safar kar rahe the to amālīqiyoṅ ne rāstā band kar diyā thā.

³ab waqt ā gayā hai ki tū un par hamlā kare. sab kuchh tabāh karke mere hawāle kar de. kuchh bhī bachne na de, balki tamām mardoṅ, auratoṅ, bachchoṅ shīrḳhwāroṅ samet, gāy-bailoṅ, bheṛ-bakriyoṅ, ūṅṭoṅ aur gadhoṅ ko maut ke ghāṭ utār de.’”

⁴sāūl ne apne faujiyoṅ ko bulā kar talāim meṅ un kā jāizā liyā. kul 2,00,000 piyāde faujī the, nīz yahūdāh ke 10,000 afrād.

⁵amālīqiyoṅ ke shahr ke pās pahuṅch kar sāūl wādī meṅ tāk meṅ baiṭh gayā.

⁶lekin pahle us ne qīniyoṅ ko ḳhabar bhejī, “amālīqiyoṅ se alag ho kar un ke pās se chale jāeṅ, warnā āp un ke sāth halāk ho jāeṅge. kyūṅki jab isrāīlī misr se nikal kar registān meṅ safar kar rahe the to āp ne un par mehrbānī kī thī.” yih ḳhabar milte hī qīnī amālīqiyoṅ se alag ho kar chale gae.

⁷tab sāūl ne amālīqiyoṅ par hamlā karke unheṅ hawīlā se le kar misr kī mashriqī sarhad shūr tak shikast dī.

⁸pūrī qaum ko talwār se mārā gayā, sirf un kā bādshāh ajāj zindā pakaṛā gayā.

⁹sāūl aur us ke faujiyoṅ ne use zindā chhoṛ diyā. isī tarah sab se achchhī bheṛ-bakriyoṅ, gāy-bailoṅ, moṭe-tāze bachhṛoṅ aur chīdā bheṛ ke bachchoṅ ko bhī chhoṛ diyā gayā. jo bhī achchhā thā bach gayā, kyūṅki isrāīliyoṅ kā dil nahīṅ kartā thā ki tandurust aur moṭe-tāze jānwaroṅ ko halāk kareṅ. unhoṅ ne sirf un tamām kamzor jānwaroṅ ko ḳhatm kiyā jin kī qadar-o-qīmat na thī.

¹⁰phir rab samūel se hamkalām huā,

¹¹“mujhe dukh hai ki maiṅ ne sāūl ko bādshāh banā liyā hai, kyūṅki us ne mujh se dūr ho kar merā hukm nahīṅ mānā.” samūel ko itnā ġhussā āyā ki wuh pūrī rāt buland āwāz se rab se faryād kartā rahā.

¹²agle din wuh uṭh kar sāūl se milne gayā. kisī ne use batāyā, “sāūl karmil chalā gayā. wahāṅ apne lie yādgār khaṛā karke wuh āge jiljāl chalā gayā hai.”

¹³jab samūel jiljāl pahuṅchā to sāūl ne kahā, “mubārak ho! maiṅ ne rab kā hukm pūrā kar diyā hai.”

¹⁴samūel ne pūchhā, “jānwaroṅ kā yih shor kahāṅ se ā rahā hai? bheṛ-bakriyāṅ mamyā rahī aur gāy-bail ḍakrā rahe haiṅ.”

¹⁵sāūl ne jawāb diyā, “yih amālīqiyoṅ ke hāṅ se lāe gae haiṅ. faujiyoṅ ne sab se achchhe gāy-bailoṅ aur bheṛ-bakriyoṅ ko zindā chhoṛ diyā tāki unheṅ rab āp ke ḳhudā ke huzūr qurbān kareṅ. lekin ham ne bāqī sab ko rab ke hawāle karke mār diyā.”

¹⁶samūel bolā, “ḳhāmosh! pahle wuh bāt sun leṅ jo rab ne mujhe pichhlī rāt farmāī.” sāūl ne jawāb diyā, “batāeṅ.”

¹⁷samūel ne kahā, “jab āp tamām qaum ke rāhnumā ban gae to ehsās-e-kamtarī kā shikār the. to bhī rab ne āp ko masah karke isrāīl kā bādshāh banā diyā.

¹⁸aur us ne āp ko bhej kar hukm diyā, ‘jā aur amālīqiyoṅ ko pūre taur par halāk karke mere hawāle kar. us waqt tak in sharīr logoṅ se laṛtā rah jab tak wuh sab ke sab miṭ na jāeṅ.’

¹⁹ab mujhe batāeṅ ki āp ne rab kī kyūṅ na sunī? āp lūṭe hue māl par kyūṅ ṭūṭ paṛe? yih to rab ke nazdīk gunāh hai.”

²⁰sāūl ne etirāz kiyā, “lekin maiṅ ne zarūr rab kī sunī. jis maqsad ke lie rab ne mujhe bhejā wuh maiṅ ne pūrā kar diyā hai, kyūṅki maiṅ amālīq ke bādshāh ajāj ko giriftār karke yahāṅ le āyā aur bāqī sab ko maut ke ghāṭ utār kar rab ke hawāle kar diyā.

²¹mere faujī lūṭe hue māl meṅ se sirf sab se achchhī bheṛ-bakriyāṅ aur gāy-bail chun kar le āe, kyūṅki wuh unheṅ yahāṅ jiljāl meṅ rab āp ke ḳhudā ke huzūr qurbān karnā chāhte the.”

²²lekin samūel ne jawāb diyā, “rab ko kyā bāt zyādā pasand hai, āp kī bhasm hone wālī aur zabah kī qurbāniyāṅ yā yih ki āp us kī sunte haiṅ? sunanā qurbānī se kahīṅ behtar aur dhyān denā menḍhe kī charbī se kahīṅ umdā hai.

²³sarkashī ġhaibdānī ke gunāh ke barābar hai aur ġhurūr butparastī ke gunāh se kam nahīṅ hotā. āp ne rab kā hukm radd kiyā hai, is lie us ne āp ko radd karke bādshāh kā uhdā āp se chhīn liyā hai.”

²⁴tab sāūl ne iqrār kiyā, “mujh se gunāh huā hai. maiṅ ne āp kī hidāyat aur rab ke hukm kī ḳhilāfwarzī kī hai. maiṅ ne logoṅ se ḍar kar un kī bāt mān lī.

²⁵lekin ab mehrbānī karke mujhe muāf kareṅ aur mere sāth wāpas āeṅ tāki maiṅ āp kī maujūdagī meṅ rab kī parastish kar sakūṅ.”

²⁶lekin samūel ne jawāb diyā, “maiṅ āp ke sāth wāpas nahīṅ chalūṅgā. āp ne rab kā kalām radd kiyā hai, is lie rab ne āp ko radd karke bādshāh kā uhdā āp se chhīn liyā hai.”

²⁷samūel muṛ kar wahāṅ se chalne lagā, lekin sāūl ne us ke choġhe kā dāman itne zor se pakaṛ liyā ki wuh phaṭ kar us ke hāth meṅ rah gayā.

²⁸samūel bolā, “jis tarah kapṛā phaṭ kar āp ke hāth meṅ rah gayā bilkul usī tarah rab ne āj hī isrāīl par āp kā iḳhtiyār āp se chhīn kar kisī aur ko de diyā hai, aise shaḳhs ko jo āp se kahīṅ behtar hai.

²⁹jo isrāīl kī shān-o-shaukat hai wuh na jhūṭ boltā, na kabhī apnī soch ko badaltā hai, kyūṅki wuh insān nahīṅ ki ek bāt kah kar bād meṅ use badle.”

³⁰sāūl ne dubārā minnat kī, “beshak maiṅ ne gunāh kiyā hai. lekin barāh-e-karm kam az kam merī qaum ke buzurgoṅ aur isrāīl ke sāmne to merī izzat kareṅ. mere sāth wāpas āeṅ tāki maiṅ āp kī maujūdagī meṅ rab āp ke ḳhudā kī parastish kar sakūṅ.”

³¹tab samūel mān gayā aur sāūl ke sāth dūsroṅ ke pās wāpas āyā. sāūl ne rab kī parastish kī,

³²phir samūel ne elān kiyā, “amālīq ke bādshāh ajāj ko mere pās le āo!” ajāj itmīnān se samūel ke pās āyā, kyūṅki us ne sochā, “beshak maut kā ḳhatrā ṭal gayā hai.”

³³lekin samūel bolā, “terī talwār se beshumār māeṅ apne bachchoṅ se mahrūm ho gaī haiṅ. ab terī māṅ bhī beaulād ho jāegī.” yih kah kar samūel ne wahīṅ jiljāl meṅ rab ke huzūr ajāj ko talwār se ṭukṛe ṭukṛe kar diyā.

³⁴phir wuh rāmā wāpas chalā gayā, aur sāūl apne ghar gayā jo jibiā meṅ thā.

³⁵is ke bād samūel jīte jī sāūl se kabhī na milā, kyūṅki wuh sāūl kā mātam kartā rahā. lekin rab ko dukh thā ki maiṅ ne sāūl ko isrāīl par kyūṅ muqarrar kiyā.