Read Roman Urdu Geo 1-samūel 17 Bible Online

1-samūel 17 - Roman Urdu Geo bible

1-samūel 17

¹ek din filistiyoṅ ne apnī fauj ko yahūdāh ke shahr sokā ke qarīb jamā kiyā. wuh ifas-dammīm meṅ ḳhaimāzan hue jo sokā aur azīqā ke darmiyān hai.

²jawāb meṅ sāūl ne apnī fauj ko bulā kar wādī-e-ailā meṅ jamā kiyā. wahāṅ isrāīl ke mard jang ke lie tartīb se khaṛe hue.

³yūṅ filistī ek pahāṛī par khaṛe the aur isrāīlī dūsrī pahāṛī par. un ke bīch meṅ wādī thī.

⁴phir filistī safoṅ se jāt shahr kā pahalwān nikal kar isrāīliyoṅ ke sāmne khaṛā huā. us kā nām jālūt thā aur wuh 9 fuṭ se zyādā lambā thā.

⁵us ne hifāzat ke lie pītal kī kaī chīzeṅ pahan rakhī thīṅ: sar par ḳhod, dhaṛ par zirābaktar jo 57 kilogrām waznī thā

⁶aur pinḍliyoṅ par baktar. kandhoṅ par pītal kī shamshīr laṭkī huī thī.

⁷jo nezā wuh pakaṛ kar chal rahā thā us kā dastā khaḍḍī ke shahtīr jaisā moṭā aur lambā thā, aur us ke lohe kī nok kā wazn 7 kilogrām se zyādā thā. jālūt ke āge āge ek ādmī us kī ḍhāl uṭhāe chal rahā thā.

⁸jālūt isrāīlī safoṅ ke sāmne ruk kar garjā, “tum sab kyūṅ laṛne ke lie safārā ho gae ho? kyā maiṅ filistī nahīṅ hūṅ jabki tum sirf sāūl ke naukar-chākar ho? chalo, ek ādmī ko chun kar use yahāṅ nīche mere pās bhej do.

⁹agar wuh mujh se laṛ sake aur mujhe mār de to ham tumhāre ġhulām ban jāeṅge. lekin agar maiṅ us par ġhālib ā kar use mār ḍālūṅ to tum hamāre ġhulām ban jāoge.

¹⁰āj maiṅ isrāīlī safoṅ kī badnāmī karke unheṅ chaileṅj kartā hūṅ ki mujhe ek ādmī do jo mere sāth laṛe.”

¹¹jālūt kī yih bāteṅ sun kar sāūl aur tamām isrāīlī ghabrā gae. aur un par dahshat tārī ho gaī.

¹²us waqt dāūd kā bāp yassī kāfī būṛhā ho chukā thā. us ke kul 8 beṭe the, aur wuh ifrātā ke ilāqe ke bait-laham meṅ rahtā thā.

¹³lekin us ke tīn sab se baṛe beṭe filistiyoṅ se laṛne ke lie sāūl kī fauj meṅ bhartī ho gae the. sab se baṛe kā nām iliyāb, dūsre kā abīnadāb aur tīsre kā sammā thā.

¹⁴dāūd to sab se chhoṭā bhāī thā. wuh dūsroṅ kī tarah pūrā waqt sāūl ke pās na guzār sakā, kyūṅki use bāp kī bheṛ-bakriyoṅ ko saṅbhālne kī zimmādārī dī gaī thī. is lie wuh ātā jātā rahā. chunāṅche wuh maujūd nahīṅ thā

¹⁵

¹⁶jab jālūt 40 din subho-shām isrāīliyoṅ kī safoṅ ke sāmne khaṛe ho kar unheṅ chaileṅj kartā rahā.

¹⁷ek din yassī ne dāūd se kahā, “beṭā, apne bhāiyoṅ ke pās kaimp meṅ jā kar un kā patā karo. bhune hue anāj ke yih 16 kilogrām aur yih das roṭiyāṅ apne sāth le kar jaldī jaldī udhar pahuṅch jāo.

¹⁸panīr kī yih das ṭikkiyāṅ un ke kaptān ko de denā. bhāiyoṅ kā hāl mālūm karke un kī koī chīz wāpas le āo tāki mujhe tasallī ho jāe ki wuh ṭhīk haiṅ.

¹⁹wuh wādī-e-ailā meṅ sāūl aur isrāīlī fauj ke sāth filistiyoṅ se laṛ rahe haiṅ.”

²⁰agle din subhsawere dāūd ne rewaṛ ko kisī aur ke sapurd karke sāmān uṭhāyā aur yassī kī hidāyat ke mutābiq chalā gayā. jab wuh kaimp ke pās pahuṅch gayā to isrāīlī faujī nāre lagā lagā kar maidān-e-jang ke lie nikal rahe the.

²¹wuh laṛne ke lie tartīb se khaṛe ho gae. aur dūsrī taraf filistī safeṅ bhī tayyār huīṅ.

²²yih dekh kar dāūd ne apnī chīzeṅ us ādmī ke pās chhoṛ dīṅ jo lashkar ke sāmān kī nigarānī kar rahā thā, phir bhāg kar maidān-e-jang meṅ bhāiyoṅ se milne chalā gayā. wuh abhī un kā hāl pūchh hī rahā thā

²³ki jātī jālūt māmūl ke mutābiq filistiyoṅ kī safoṅ se nikal kar isrāīliyoṅ ke sāmne wuhī tanz kī bāteṅ bakne lagā. dāūd ne bhī us kī bāteṅ sunīṅ.

²⁴jālūt ko deḳhte hī isrāīliyoṅ ke roṅgṭe khaṛe ho gae. aur wuh bhāg kar

²⁵āpas meṅ kahne lage, “kyā āp ne is ādmī ko hamārī taraf baṛhte hue dekhā? suneṅ ki wuh kis tarah hamārī badnāmī karke hameṅ chaileṅj kar rahā hai. bādshāh ne elān kiyā hai ki jo shaḳhs ise mār de use baṛā ajr milegā. shahzādī se us kī shādī hogī, aur āindā us ke bāp ke ḳhāndān ko ṭaiks nahīṅ denā paṛegā.”

²⁶dāūd ne sāth wāle faujiyoṅ se pūchhā, “kyā kah rahe haiṅ? us ādmī ko kyā in'ām milegā jo is filistī ko mār kar hamārī qaum kī ruswāī dūr karegā? yih nāmaḳhtūn filistī kaun hai ki zindā ḳhudā kī fauj kī badnāmī karke use chaileṅj kare!”

²⁷logoṅ ne dubārā dāūd ko batāyā ki bādshāh us ādmī ko kyā degā jo jālūt ko mār ḍālegā.

²⁸jab dāūd ke baṛe bhāī iliyāb ne dāūd kī bāteṅ sunīṅ to use ġhussā āyā aur wuh use jhiṛakne lagā, “tū kyūṅ āyā hai? bayābān meṅ apnī chand ek bheṛ-bakriyoṅ ko kis ke pās chhoṛ āyā hai? maiṅ terī shoḳhī aur dil kī sharārat ḳhūb jāntā hūṅ. tū sirf jang kā tamāshā deḳhne āyā hai!”

²⁹dāūd ne pūchhā, “ab mujh se kyā ġhaltī huī? maiṅ ne to sirf sawāl pūchhā.”

³⁰wuh us se muṛ kar kisī aur ke pās gayā aur wuhī bāt pūchhne lagā. wuhī jawāb milā.

³¹dāūd kī yih bāteṅ sun kar kisī ne sāūl ko ittilā dī. sāūl ne use fauran bulāyā.

³²dāūd ne bādshāh se kahā, “kisī ko is filistī kī wajah se himmat nahīṅ hārnā chāhie. maiṅ us se laṛūṅgā.”

³³sāūl bolā, “āp? āp jaisā laṛkā kis tarah us kā muqābalā kar saktā hai? āp to abhī bachche se ho jabki wuh tajribākār jangjū hai jo jawānī se hathiyār istemāl kartā āyā hai.”

³⁴lekin dāūd ne isrār kiyā, “maiṅ apne bāp kī bheṛ-bakriyoṅ kī nigarānī kartā hūṅ. jab kabhī koī sherbabar yā rīchh rewaṛ kā jānwar chhīn kar bhāg jātā

³⁵to maiṅ us ke pīchhe jātā aur use mār mār kar bheṛ ko us ke muṅh se chhuṛā letā thā. agar sher yā rīchh jawāb meṅ mujh par hamlā kartā to maiṅ us ke sar ke bāloṅ ko pakaṛ kar use mār detā thā.

³⁶is tarah āp ke ḳhādim ne kaī sheroṅ aur rīchhoṅ ko mār ḍālā hai. yih nāmaḳhtūn bhī un kī tarah halāk ho jāegā, kyūṅki us ne zindā ḳhudā kī fauj kī badnāmī karke use chaileṅj kiyā hai.

³⁷jis rab ne mujhe sher aur rīchh ke panje se bachā liyā hai wuh mujhe is filistī ke hāth se bhī bachāegā.” sāūl bolā, “ṭhīk hai, jāeṅ aur rab āp ke sāth ho.”

³⁸us ne dāūd ko apnā zirābaktar aur pītal kā ḳhod pahnāyā.

³⁹phir dāūd ne sāūl kī talwār bāndh kar chalne kī koshish kī. lekin use bahut mushkil lag rahā thā. us ne sāūl se kahā, “maiṅ yih chīzeṅ pahan kar nahīṅ laṛ saktā, kyūṅki maiṅ in kā ādī nahīṅ hūṅ.” unheṅ utār kar

⁴⁰us ne nadī se pāṅch chikne chikne patthar chun kar unheṅ apnī charwāhe kī thailī meṅ ḍāl liyā. phir charwāhe kī apnī lāṭhī aur falāḳhan pakaṛ kar wuh filistī se laṛne ke lie isrāīlī safoṅ se niklā.

⁴¹jālūt dāūd kī jānib baṛhā. ḍhāl ko uṭhāne wālā us ke āge āge chal rahā thā.

⁴²us ne hiqāratāmez nazaroṅ se dāūd kā jāizā liyā, kyūṅki wuh gorā aur ḳhūbsūrat naujawān thā.

⁴³wuh garjā, “kyā maiṅ kuttā hūṅ ki tū lāṭhī le kar merā muqābalā karne āyā hai?” apne dewatāoṅ ke nām le kar wuh dāūd par lānat bhej kar

⁴⁴chillāyā, “idhar ā tāki maiṅ terā gosht parindoṅ aur janglī jānwaroṅ ko khilāūṅ.”

⁴⁵dāūd ne jawāb diyā, “āp talwār, nezā aur shamshīr le kar merā muqābalā karne āe haiṅ, lekin maiṅ rabb-ul-afwāj kā nām le kar ātā hūṅ, usī kā nām jo isrāīlī fauj kā ḳhudā hai. kyūṅki āp ne usī ko chaileṅj kiyā hai.

⁴⁶āj hī rab āp ko mere hāth meṅ kar degā, aur maiṅ āp kā sar qalam kar dūṅgā. isī din maiṅ filistī faujiyoṅ kī lāsheṅ parindoṅ aur janglī jānwaroṅ ko khilā dūṅgā. tab tamām duniyā jān legī ki isrāīl kā ḳhudā hai.

⁴⁷sab jo yahāṅ maujūd haiṅ jān leṅge ki rab ko hameṅ bachāne ke lie talwār yā neze kī zarūrat nahīṅ hotī. wuh ḳhud hī jang kar rahā hai, aur wuhī āp ko hamāre qabze meṅ kar degā.”

⁴⁸jālūt dāūd par hamlā karne ke lie āge baṛhā, aur dāūd bhī us kī taraf dauṛā.

⁴⁹chalte chalte us ne apnī thailī se patthar nikālā aur use falāḳhan meṅ rakh kar zor se chalāyā. patthar uṛtā uṛtā filistī ke māthe par jā lagā. wuh khopaṛī meṅ dhaṅs gayā, aur pahalwān muṅh ke bal gir gayā.

⁵⁰yūṅ dāūd falāḳhan aur patthar se filistī par ġhālib āyā. us ke hāth meṅ talwār nahīṅ thī. tab us ne jālūt kī taraf dauṛ kar usī kī talwār miyān se khaiṅch kar filistī kā sar kāṭ ḍālā. jab filistiyoṅ ne dekhā ki hamārā pahalwān halāk ho gayā hai to wuh bhāg nikle.

⁵¹

⁵²isrāīl aur yahūdāh ke mard fath ke nāre lagā lagā kar filistiyoṅ par ṭūṭ paṛe. un kā tāqqub karte karte wuh jāt aur aqrūn ke darwāzoṅ tak pahuṅch gae. jo rāstā shāraim se jāt aur aqrūn tak jātā hai us par har taraf filistiyoṅ kī lāsheṅ nazar āīṅ.

⁵³phir isrāīliyoṅ ne wāpas ā kar filistiyoṅ kī chhoṛī huī lashkargāh ko lūṭ liyā.

⁵⁴bād meṅ dāūd jālūt kā sar yarūshalam ko le āyā. filistī ke hathiyār us ne apne ḳhaime meṅ rakh lie.

⁵⁵jab dāūd jālūt se laṛne gayā to sāūl ne fauj ke kamānḍar abinair se pūchhā, “is jawān ādmī kā bāp kaun hai?” abinair ne jawāb diyā, “āp kī hayāt kī qasam, mujhe mālūm nahīṅ.”

⁵⁶bādshāh bolā, “phir patā kareṅ!”

⁵⁷jab dāūd filistī kā sar qalam karke wāpas āyā to abinair use bādshāh ke pās lāyā. dāūd abhī jālūt kā sar uṭhāe phir rahā thā.

⁵⁸sāūl ne pūchhā, “āp kā bāp kaun hai?” dāūd ne jawāb diyā, “maiṅ bait-laham ke rahne wāle āp ke ḳhādim yassī kā beṭā hūṅ.”