Read Roman Urdu Geo 1-samūel 18 Bible Online

1-samūel 18 - Roman Urdu Geo bible

1-samūel 18

¹is guftgū ke bād dāūd kī mulāqāt bādshāh ke beṭe yūnatan se huī. un meṅ fauran gahrī dostī paidā ho gaī, aur yūnatan dāūd ko apnī jān ke barābar azīz rakhne lagā.

²us din se sāūl ne dāūd ko apne darbār meṅ rakh liyā aur use bāp ke ghar wāpas jāne na diyā.

³aur yūnatan ne dāūd se ahd bāndhā, kyūṅki wuh dāūd ko apnī jān ke barābar azīz rakhtā thā.

⁴ahd kī tasdīq ke lie yūnatan ne apnā choġhā utār kar use apne zirābaktar, talwār, kamān aur peṭī samet dāūd ko de diyā.

⁵jahāṅ bhī sāūl ne dāūd ko laṛne ke lie bhejā wahāṅ wuh kāmyāb huā. yih dekh kar sāūl ne use fauj kā baṛā afsar banā diyā. yih bāt awām aur sāūl ke afsaroṅ ko pasand āī.

⁶jab dāūd filistiyoṅ ko shikast dene se wāpas āyā to tamām shahroṅ se aurateṅ nikal kar sāūl bādshāh se milne āīṅ. daf aur sāz bajāte hue wuh ḳhushī ke gīt gā gā kar nāchne lagīṅ.

⁷aur nāchte nāchte wuh gātī rahīṅ, “sāūl ne to hazār halāk kie jabki dāūd ne das hazār.”

⁸sāūl baṛe ġhusse meṅ ā gayā, kyūṅki auratoṅ kā gīt use nihāyat burā lagā. us ne sochā, “un kī nazar meṅ dāūd ne das hazār halāk kie jabki maiṅ ne sirf hazār. ab sirf yih bāt rah gaī hai ki use bādshāh muqarrar kiyā jāe.”

⁹us waqt se sāūl dāūd ko shak kī nazar se deḳhne lagā.

¹⁰agle din allāh ne dubārā sāūl par burī rūh āne dī, aur wuh ghar ke andar wajd kī hālat meṅ ā gayā. dāūd māmūl ke mutābiq sāz bajāne lagā tāki bādshāh ko sukūn mile. sāūl ke hāth meṅ nezā thā. achānak us ne use phaiṅk kar dāūd ko dīwār ke sāth chhed ḍālne kī koshish kī. lekin dāūd ek taraf haṭ kar bach niklā. ek aur dafā aisā huā, lekin dāūd phir bach gayā.

¹²yih dekh kar sāūl dāūd se ḍarne lagā, kyūṅki us ne jān liyā ki rab mujhe chhoṛ kar dāūd kā hāmī ban gayā hai.

¹³āḳhirkār us ne dāūd ko darbār se dūr karke hazār faujiyoṅ par muqarrar kar diyā. in ādmiyoṅ ke sāth dāūd muḳhtalif jangoṅ ke lie nikaltā rahā.

¹⁴aur jo kuchh bhī wuh kartā us meṅ kāmyāb rahtā, kyūṅki rab us ke sāth thā.

¹⁵jab sāūl ne dekhā ki dāūd ko kitnī zyādā kāmyābī huī hai to wuh us se mazīd ḍar gayā.

¹⁶lekin isrāīl aur yahūdāh ke bāqī log dāūd se bahut muhabbat rakhte the, kyūṅki wuh har jang meṅ nikalte waqt se le kar ghar wāpas āte waqt tak un ke āge āge chaltā thā.

¹⁷ek din sāūl ne dāūd se bāt kī, “maiṅ apnī baṛī beṭī mīrab kā rishtā āp ke sāth bāndhnā chāhtā hūṅ. lekin pahle sābit kareṅ ki āp achchhe faujī haiṅ, jo rab kī jangoṅ meṅ ḳhūb hissā le.” lekin dil hī dil meṅ sāūl ne sochā, “ḳhud to maiṅ dāūd par hāth nahīṅ uṭhāūṅgā, behtar hai ki wuh filistiyoṅ ke hāthoṅ mārā jāe.”

¹⁸lekin dāūd ne etirāz kiyā, “maiṅ kaun hūṅ ki bādshāh kā dāmād banūṅ? isrāīl meṅ to mere ḳhāndān aur ābāī kunbe kī koī haisiyat nahīṅ.”

¹⁹to bhī shādī kī tayyāriyāṅ kī gaīṅ. lekin jab muqarrarā waqt ā gayā to sāūl ne mīrab kī shādī ek aur ādmī banām adrī'el mahūlātī se karwā dī.

²⁰itne meṅ sāūl kī chhoṭī beṭī mīkal dāūd se muhabbat karne lagī. jab sāūl ko is kī ḳhabar milī to wuh ḳhush huā.

²¹us ne sochā, “ab maiṅ beṭī kā rishtā us ke sāth bāndh kar use yūṅ phaṅsā dūṅgā ki wuh filistiyoṅ se laṛte laṛte mar jāegā.” dāūd se us ne kahā, “āj āp ko merā dāmād banane kā dubārā mauqā milegā.”

²²phir us ne apne mulāzimoṅ ko hukm diyā ki wuh chupke se dāūd ko batāeṅ, “suneṅ, āp bādshāh ko pasand haiṅ, aur us ke tamām afsar bhī āp ko pyār karte haiṅ. āp zarūr bādshāh kī peshkash qabūl karke us kā dāmād ban jāeṅ.”

²³lekin dāūd ne etirāz kiyā, “kyā āp kī dānist meṅ bādshāh kā dāmād bananā chhoṭī sī bāt hai? maiṅ to ġharīb ādmī hūṅ, aur merī koī haisiyat nahīṅ.”

²⁴mulāzimoṅ ne bādshāh ke pās wāpas jā kar use dāūd ke alfāz batāe.

²⁵sāūl ne unheṅ phir dāūd ke pās bhej kar use ittilā dī, “bādshāh mahr ke lie paise nahīṅ māṅgtā balki yih ki āp un ke dushmanoṅ se badlā le kar 100 filistiyoṅ ko qatl kar deṅ. sabūt ke taur par āp ko un kā ḳhatnā karke jild kā kaṭā huā hissā bādshāh ke pās lānā paṛegā.” shart kā maqsad yih thā ki dāūd filistiyoṅ ke hāthoṅ mārā jāe.

²⁶jab dāūd ko yih ḳhabar milī to use sāūl kī peshkash pasand āī. muqarrarā waqt se pahle

²⁷us ne apne ādmiyoṅ ke sāth nikal kar 200 filistiyoṅ ko mār diyā. lāshoṅ kā ḳhatnā karke wuh jild ke kul 200 ṭukṛe bādshāh ke pās lāyā tāki bādshāh kā dāmād bane. yih dekh kar sāūl ne us kī shādī mīkal se karwā dī.

²⁸sāūl ko mānanā paṛā ki rab dāūd ke sāth hai aur ki merī beṭī mīkal use bahut pyār kartī hai.

²⁹tab wuh dāūd se aur bhī ḍarne lagā. is ke bād wuh jīte jī dāūd kā dushman banā rahā.

³⁰un dinoṅ meṅ filistī sardār isrāīl se laṛte rahe. lekin jab bhī wuh jang ke lie nikle to dāūd sāūl ke bāqī afsaroṅ kī nisbat zyādā kāmyāb hotā thā. natīje meṅ us kī shohrat pūre mulk meṅ phail gaī.