Read Roman Urdu Geo 1-samūel 2 Bible Online

1-samūel 2 - Roman Urdu Geo bible

1-samūel 2

¹wahāṅ hannā ne yih gīt gāyā, “merā dil rab kī ḳhushī manātā hai, kyūṅki us ne mujhe quwwat atā kī hai. merā muṅh dilerī se apne dushmanoṅ ke ḳhilāf bāt kartā hai, kyūṅki maiṅ terī najāt ke bāis bāġh bāġh hūṅ.

²rab jaisā quddūs koī nahīṅ hai, tere siwā koī nahīṅ hai. hamāre ḳhudā jaisī koī chaṭān nahīṅ hai.

³ḍīṅgeṅ mārne se bāz āo! gustāḳh bāteṅ mat bako! kyūṅki rab aisā ḳhudā hai jo sab kuchh jāntā hai, wuh tamām āmāl ko tol kar parakhtā hai.

⁴ab baṛoṅ kī kamāneṅ ṭūṭ gaī haiṅ jabki girne wāle quwwat se kamarbastā ho gae haiṅ.

⁵jo pahle ser the wuh roṭī milne ke lie mazdūrī karte haiṅ jabki jo pahle bhūke the wuh ser ho gae haiṅ. beaulād aurat ke sāt bachche paidā hue haiṅ jabki wāfir bachchoṅ kī māṅ murjhā rahī hai.

⁶rab ek ko marne detā aur dūsre ko zindā hone detā hai. wuh ek ko pātāl meṅ utarne detā aur dūsre ko wahāṅ se nikal āne detā hai.

⁷rab hī ġharīb aur amīr banā detā hai, wuhī past kartā aur wuhī sarfarāz kartā hai.

⁸wuh ḳhāk meṅ dabe ādmī ko khaṛā kartā hai aur rākh meṅ leṭe zarūratmand ko sarfarāz kartā hai, phir unheṅ raīsoṅ ke sāth izzat kī kursī par biṭhā detā hai. kyūṅki duniyā kī bunyādeṅ rab kī haiṅ, aur usī ne un par zamīn rakhī hai.

⁹wuh apne wafādār pairokāroṅ ke pāoṅ mahfūz rakhegā jabki sharīr tārīkī meṅ chup ho jāeṅge. kyūṅki insān apnī tāqat se kāmyāb nahīṅ hotā.

¹⁰jo rab se laṛne kī jur'at kareṅ wuh pāsh pāsh ho jāeṅge. rab āsmān se un ke ḳhilāf garaj kar duniyā kī intihā tak sab kī adālat karegā. wuh apne bādshāh ko taqwiyat aur apne masah kie hue ḳhādim ko quwwat atā karegā.”

¹¹phir ilqānā aur hannā rāmā meṅ apne ghar wāpas chale gae. lekin un kā beṭā elī imām ke pās rahā aur maqdis meṅ rab kī ḳhidmat karne lagā.

¹²lekin elī ke beṭe badmāsh the. na wuh rab ko jānte the,

¹³na imām kī haisiyat se apne farāiz sahīh taur par adā karte the. kyūṅki jab bhī koī ādmī apnī qurbānī pesh karke rifāqatī khāne ke lie gosht ubāltā to elī ke beṭe apne naukar ko wahāṅ bhej dete. yih naukar sihshāḳhā kāṅṭā

¹⁴deg meṅ ḍāl kar gosht kā har wuh ṭukṛā apne mālikoṅ ke pās le jātā jo kāṅṭe se lag jātā. yihī un kā tamām isrāīliyoṅ ke sāth sulūk thā jo sailā meṅ qurbāniyāṅ chaṛhāne āte the.

¹⁵na sirf yih balki kaī bār naukar us waqt bhī ā jātā jab jānwar kī charbī abhī qurbāngāh par jalānī hotī thī. phir wuh taqāzā kartā, “mujhe imām ke lie kachchā gosht de do! use ublā gosht manzūr nahīṅ balki sirf kachchā gosht, kyūṅki wuh use bhūnanā chāhtā hai.”

¹⁶qurbānī pesh karne wālā etirāz kartā, “pahle to rab ke lie charbī jalānā hai, is ke bād hī jo jī chāhe le leṅ.” phir naukar badtamīzī kartā, “nahīṅ, use abhī de do, warnā maiṅ zabardastī le lūṅgā.”

¹⁷in jawān imāmoṅ kā yih gunāh rab kī nazar meṅ nihāyat sangīn thā, kyūṅki wuh rab kī qurbāniyāṅ haqīr jānte the.

¹⁸lekin chhoṭā samūel rab ke huzūr ḳhidmat kartā rahā. use bhī dūsre imāmoṅ kī tarah katān kā bālāposh diyā gayā thā.

¹⁹har sāl jab us kī māṅ ḳhāwand ke sāth qurbānī pesh karne ke lie sailā ātī to wuh nayā choġhā sī kar use de detī.

²⁰aur rawānā hone se pahle elī samūel ke māṅ-bāp ko barkat de kar ilqānā se kahtā, “hannā ne rab se bachchā māṅg liyā aur jab milā to use rab ko wāpas kar diyā. ab rab āp ko is bachche kī jagah mazīd bachche de.” is ke bād wuh apne ghar chale jāte.

²¹aur wāqaī, rab ne hannā ko mazīd tīn beṭe aur do beṭiyāṅ atā kīṅ. yih bachche ghar meṅ rahe, lekin samūel rab ke huzūr ḳhidmat karte karte jawān ho gayā.

²²elī us waqt bahut būṛhā ho chukā thā. beṭoṅ kā tamām isrāīl ke sāth burā sulūk us ke kānoṅ tak pahuṅch gayā thā, balki yih bhī ki beṭe un auratoṅ se nājāiz tālluqāt rakhte haiṅ jo mulāqāt ke ḳhaime ke darwāze par ḳhidmat kartī haiṅ.

²³us ne unheṅ samjhāyā bhī thā, “āp aisī harkateṅ kyūṅ kar rahe haiṅ? mujhe tamām logoṅ se āp ke sharīr kāmoṅ kī ḳhabreṅ miltī rahtī haiṅ.

²⁴beṭo, aisā mat karnā! jo bāteṅ āp ke bāre meṅ rab kī qaum meṅ phail gaī haiṅ wuh achchhī nahīṅ.

²⁵dekheṅ, agar insān kisī dūsre insān kā gunāh kare to ho saktā hai allāh donoṅ kā darmiyānī ban kar qusūrwār shaḳhs par rahm kare. lekin agar koī rab kā gunāh kare to phir kaun us kā darmiyānī ban kar use bachāegā?” lekin elī ke beṭoṅ ne bāp kī na sunī, kyūṅki rab kī marzī thī ki unheṅ sazā-e-maut mil jāe.

²⁶lekin samūel un se farq thā. jitnā wuh baṛā hotā gayā utnī us kī rab aur insān ke sāmne qabūliyat baṛhtī gaī.

²⁷ek din ek nabī elī ke pās āyā aur kahā, “rab farmātā hai, ‘kyā jab terā bāp hārūn aur us kā gharānā misr ke bādshāh ke ġhulām the to maiṅ ne apne āp ko us par zāhir na kiyā?

²⁸go isrāīl ke bārah qabīle the lekin maiṅ ne muqarrar kiyā ki usī ke gharāne ke mard mere imām ban kar qurbāngāh ke sāmne ḳhidmat kareṅ, baḳhūr jalāeṅ aur mere huzūr imām kā bālāposh pahneṅ. sāth sāth maiṅ ne unheṅ qurbāngāh par jalne wālī qurbāniyoṅ kā ek hissā milne kā haq de diyā.

²⁹to phir tum log zabah aur ġhallā kī wuh qurbāniyāṅ haqīr kyūṅ jānte ho jo mujhe hī pesh kī jātī haiṅ aur jo maiṅ ne apnī sukūnatgāh ke lie muqarrar kī thīṅ? elī, tū apne beṭoṅ kā mujh se zyādā ehtirām kartā hai. tum to merī qaum isrāīl kī har qurbānī ke behtarīn hisse khā khā kar moṭe ho gae ho.’

³⁰chunāṅche rab jo isrāīl kā ḳhudā hai farmātā hai, wādā to maiṅ ne kiyā thā ki lāwī ke qabīle kā terā gharānā hameshā hī imām kī ḳhidmat saranjām degā. lekin ab maiṅ elān kartā hūṅ ki aisā kabhī nahīṅ hogā! kyūṅki jo merā ehtirām karte haiṅ un kā maiṅ ehtirām karūṅga, lekin jo mujhe haqīr jānte haiṅ unheṅ haqīr jānā jāegā.

³¹is lie sun! aise din ā rahe haiṅ jab maiṅ terī aur tere gharāne kī tāqat yūṅ toṛ ḍālūṅgā ki ghar kā koī bhī buzurg nahīṅ pāyā jāegā.

³²aur tū maqdis meṅ musībat dekhegā hālāṅki maiṅ isrāīl ke sāth bhalāī kartā rahūṅgā. tere ghar meṅ kabhī bhī buzurg nahīṅ pāyā jāegā.

³³maiṅ tum meṅ se har ek ko to apnī ḳhidmat se nikāl kar halāk nahīṅ karūṅga jab terī āṅkheṅ dhundlī sī paṛ jāeṅgī aur terī jān halkān ho jāegī. lekin terī tamām aulād ġhairtabaī maut maregī.

³⁴tere beṭe hufnī aur fīnhās donoṅ ek hī din halāk ho jāeṅge. is nishān se tujhe yaqīn āegā ki jo kuchh maiṅ ne farmāyā hai wuh sach hai.

³⁵tab maiṅ apne lie ek imām khaṛā karūṅga jo wafādār rahegā. jo bhī merā dil aur merī jān chāhegī wuhī wuh karegā. maiṅ us ke ghar kī mazbūt bunyādeṅ rakhūṅgā, aur wuh hameshā tak mere masah kie hue ḳhādim ke huzūr ātā jātā rahegā.

³⁶us waqt tere ghar ke bache hue tamām afrād us imām ke sāmne jhuk jāeṅge aur paise aur roṭī māṅg kar iltimās kareṅge, ‘mujhe imām kī koī na koī zimmādārī deṅ tāki roṭī kā ṭukṛā mil jāe’.”