Read Roman Urdu Geo 1-samūel 21 Bible Online

1-samūel 21 - Roman Urdu Geo bible

1-samūel 21

¹dāūd nob meṅ aḳhīmalik imām ke pās gayā. aḳhīmalik kāṅpte hue us se milne ke lie āyā aur pūchhā, “āp akele kyūṅ āe haiṅ? koī āp ke sāth nahīṅ.”

²dāūd ne jawāb diyā, “bādshāh ne mujhe ek ḳhās zimmādārī dī hai jis kā zikr tak karnā manā hai. kisī ko bhī is ke bāre meṅ jānanā nahīṅ chāhie. maiṅ ne apne ādmiyoṅ ko hukm diyā hai ki fulāṅ fulāṅ jagah par merā intizār kareṅ.

³ab mujhe zarā batāeṅ ki khāne ke lie kyā mil saktā hai? mujhe pāṅch roṭiyāṅ de deṅ, yā jo kuchh bhī āp ke pās hai.”

⁴imām ne jawāb diyā, “mere pās ām roṭī nahīṅ hai. maiṅ āp ko sirf rab ke lie maḳhsūsshudā roṭī de saktā hūṅ. shart yih hai ki āp ke ādmī pichhle dinoṅ meṅ auratoṅ se hambistar na hue hoṅ.”

⁵dāūd ne use tasallī de kar kahā, “fikr na kareṅ. pahle kī tarah hameṅ is muhimm ke daurān bhī auratoṅ se dūr rahnā paṛā hai. mere faujī ām muhimmoṅ ke lie bhī apne āp ko pāk rakhte haiṅ, to is dafā wuh kahīṅ zyādā pāk-sāf haiṅ.”

⁶phir imām ne dāūd ko maḳhsūsshudā roṭiyāṅ dīṅ yānī wuh roṭiyāṅ jo mulāqāt ke ḳhaime meṅ rab ke huzūr rakhī jātī thīṅ aur usī din tāzā roṭiyoṅ se tabdīl huī thīṅ.

⁷us waqt sāūl ke charwāhoṅ kā adomī inchārj doeg wahāṅ thā. wuh kisī majbūrī ke bāis rab ke huzūr ṭhahrā huā thā. us kī maujūdagī meṅ

⁸dāūd ne aḳhīmalik se pūchhā, “kyā āp ke pās koī nezā yā talwār hai? mujhe bādshāh kī muhimm ke lie itnī jaldī se nikalnā paṛā ki apnī talwār yā koī aur hathiyār sāth lāne ke lie fursat na milī.”

⁹aḳhīmalik ne jawāb diyā, “jī hai. wādī-e-ailā meṅ āp ke hāthoṅ māre gae filistī mard jālūt kī talwār mere pās hai. wuh ek kapṛe meṅ lipṭī mere bālāposh ke pīchhe paṛī hai. agar āp use apne sāth le jānā chāheṅ to le jāeṅ. mere pās koī aur hathiyār nahīṅ hai.” dāūd ne kahā, “is qism kī talwār kahīṅ aur nahīṅ miltī. mujhe de deṅ.”

¹⁰usī din dāūd āge niklā tāki sāūl se bach sake. isrāīl ko chhoṛ kar wuh filistī shahr jāt ke bādshāh akīs ke pās gayā.

¹¹lekin akīs ke mulāzimoṅ ne bādshāh ko āgāh kiyā, “kyā yih mulk kā bādshāh dāūd nahīṅ hai? isī ke bāre meṅ isrāīlī nāch kar gīt gāte haiṅ, ‘sāūl ne hazār halāk kie jabki dāūd ne das hazār’.”

¹²yih sun kar dāūd ghabrā gayā aur jāt ke bādshāh akīs se bahut ḍarne lagā.

¹³achānak wuh pāgal ādmī kā rūp bhar kar un ke darmiyān ajīb ajīb harkateṅ karne lagā. shahr ke darwāze ke pās jā kar us ne us par betuke se nishān lagāe aur apnī dāṛhī par rāl ṭapakne dī.

¹⁴yih dekh kar akīs ne apne mulāzimoṅ ko jhiṛkā, “tum is ādmī ko mere pās kyūṅ le āe ho? tum ḳhud dekh sakte ho ki yih pāgal hai.

¹⁵kyā mere pās pāgaloṅ kī kamī hai ki tum is ko mere sāmne le āe ho tāki is tarah kī harkateṅ kare? kyā mujhe aise mehmān kī zarūrat hai?”