Read Roman Urdu Geo 1-samūel 25 Bible Online

1-samūel 25 - Roman Urdu Geo bible

1-samūel 25

¹un dinoṅ meṅ samūel faut huā. tamām isrāīl rāmā meṅ janāze ke lie jamā huā. us kā mātam karte hue unhoṅ ne use us kī ḳhāndānī qabr meṅ dafn kiyā. un dinoṅ meṅ dāūd dasht-e-fārān meṅ chalā gayā.

²maūn meṅ kālib ke ḳhāndān kā ek ādmī rahtā thā jis kā nām nābāl thā. wuh nihāyat amīr thā. karmil ke qarīb us kī 3,000 bheṛeṅ aur 1,000 bakriyāṅ thīṅ. bīwī kā nām abījel thā. wuh zahīn bhī thī aur ḳhūbsūrat bhī. us ke muqābale meṅ nābāl saḳhtmizāj aur kamīnā thā. ek din nābāl apnī bheṛoṅ ke bāl katarne ke lie karmil āyā. jab dāūd ko ḳhabar milī

⁴

⁵to us ne 10 jawānoṅ ko bhej kar kahā, “karmil jā kar nābāl se mileṅ aur use merā salām deṅ.

⁶use batānā, ‘allāh āp ko tawīl zindagī atā kare. āp kī, āp ke ḳhāndān kī aur āp kī tamām milkiyat kī salāmatī ho.

⁷sunā hai ki bheṛoṅ ke bāl katarne kā waqt ā gayā hai. karmil meṅ āp ke charwāhe hameshā hamāre sāth rahe. us pūre arse meṅ na unheṅ hamārī taraf se koī nuqsān pahuṅchā, na koī chīz chorī huī.

⁸apne logoṅ se ḳhud pūchh leṅ! wuh is kī tasdīq kareṅge. āj āp ḳhushī manā rahe haiṅ, is lie mere jawānoṅ par mehrbānī kareṅ. jo kuchh āp ḳhushī se de sakte haiṅ wuh unheṅ aur apne beṭe dāūd ko de deṅ’.”

⁹dāūd ke ādmī nābāl ke pās gae. use dāūd kā salām de kar unhoṅ ne us kā paiġhām diyā aur phir jawāb kā intizār kiyā.

¹⁰lekin nābāl ne karaḳht lahje meṅ kahā, “yih dāūd kaun hai? kaun hai yassī kā beṭā? ājkal bahut se aise ġhulām haiṅ jo apne mālik se bhāge hue haiṅ.

¹¹maiṅ apnī roṭī, apnā pānī aur katarne wāloṅ ke lie zabah kiyā gayā gosht le kar aise āwārā phirne wāloṅ ko kyūṅ de dūṅ? kyā patā hai ki yih kahāṅ se āe haiṅ.”

¹²dāūd ke ādmī chale gae aur dāūd ko sab kuchh batā diyā.

¹³tab dāūd ne hukm diyā, “apnī talwāreṅ bāndh lo!” sab ne apnī talwāreṅ bāndh līṅ. us ne bhī aisā kiyā aur phir 400 afrād ke sāth karmil ke lie rawānā huā. bāqī 200 mard sāmān ke pās rahe.

¹⁴itne meṅ nābāl ke ek naukar ne us kī bīwī ko ittilā dī, “dāūd ne registān meṅ se apne qāsidoṅ ko nābāl ke pās bhejā tāki use mubārakbād deṅ. lekin us ne jawāb meṅ garaj kar unheṅ gāliyāṅ dī haiṅ,

¹⁵hālāṅki un logoṅ kā hamāre sāth sulūk hameshā achchhā rahā hai. ham aksar rewaṛoṅ ko charāne ke lie un ke qarīb phirte rahe, to bhī unhoṅ ne hameṅ kabhī nuqsān na pahuṅchāyā, na koī chīz chorī kī.

¹⁶jab bhī ham un ke qarīb the to wuh din rāt chārdīwārī kī tarah hamārī hifāzat karte rahe.

¹⁷ab soch leṅ ki kyā kiyā jāe! kyūṅki hamārā mālik aur us ke tamām ghar wāle baṛe ḳhatre meṅ haiṅ. wuh ḳhud itnā sharīr hai ki us se bāt karne kā koī fāidā nahīṅ.”

¹⁸jitnī jaldī ho sakā abījel ne kuchh sāmān ikaṭṭhā kiyā jis meṅ 200 roṭiyāṅ, mai kī do mashkeṅ, khāne ke lie tayyār kī gaī pāṅch bheṛeṅ, bhune hue anāj ke sāṛhe 27 kilogrām, kishmish kī 100 aur anjīr kī 200 ṭikkiyāṅ shāmil thīṅ. sab kuchh gadhoṅ par lād kar

¹⁹us ne apne naukaroṅ ko hukm diyā, “mere āge nikal jāo, maiṅ tumhāre pīchhe pīchhe āūṅgī.” apne shauhar ko us ne kuchh na batāyā.

²⁰jab abījel pahāṛ kī āṛ meṅ utarne lagī to dāūd apne ādmiyoṅ samet us kī taraf baṛhte hue nazar āyā. phir un kī mulāqāt huī.

²¹dāūd to abhī tak baṛe ġhusse meṅ thā, kyūṅki wuh soch rahā thā, “is ādmī kī madad karne kā kyā fāidā thā! ham registān meṅ us ke rewaṛoṅ kī hifāzat karte rahe aur us kī koī bhī chīz gum na hone dī. to bhī us ne hamārī nekī ke jawāb meṅ hamārī be'izzatī kī hai.

²²allāh mujhe saḳht sazā de agar maiṅ kal subh tak us ke ek ādmī ko bhī zindā chhoṛ dūṅ!”

²³dāūd ko dekh kar abījel jaldī se gadhe par se utar kar us ke sāmne muṅh ke bal jhuk gaī. us ne kahā, “mere āqā, mujhe hī qusūrwār ṭhahrāeṅ. mehrbānī karke apnī ḳhādimā ko bolne deṅ aur us kī bāt suneṅ.

²⁴

²⁵mere mālik us sharīr ādmī nābāl par zyādā dhyān na deṅ. us ke nām kā matlab ahmaq hai aur wuh hai hī ahmaq. afsos, merī un ādmiyoṅ se mulāqāt nahīṅ huī jo āp ne hamāre pās bheje the.

²⁶lekin rab kī aur āp kī hayāt kī qasam, rab ne āp ko apne hāthoṅ se badlā lene aur qātil banane se bachāyā hai. aur allāh kare ki jo bhī āp se dushmanī rakhte aur āp ko nuqsān pahuṅchānā chāhte haiṅ unheṅ nābāl kī sī sazā mil jāe.

²⁷ab guzārish hai ki jo barkat hameṅ milī hai us meṅ āp bhī sharīk hoṅ. jo chīzeṅ āp kī ḳhādimā lāī hai unheṅ qabūl karke un jawānoṅ meṅ taqsīm kar deṅ jo mere āqā ke pīchhe ho lie haiṅ.

²⁸jo bhī ġhaltī huī hai apnī ḳhādimā ko muāf kījie. rab zarūr mere āqā kā gharānā hameshā tak qāim rakhegā, kyūṅki āp rab ke dushmanoṅ se laṛte haiṅ. wuh āp ko jīte jī ġhaltiyāṅ karne se bachāe rakhe.

²⁹jab koī āp kā tāqqub karke āp ko mār dene kī koshish kare to rab āp kā ḳhudā āp kī jān jāndāroṅ kī thailī meṅ mahfūz rakhegā. lekin āp ke dushmanoṅ kī jān wuh falāḳhan ke patthar kī tarah dūr phaiṅk kar halāk kar degā.

³⁰jab rab apne tamām wāde pūre karke āp ko isrāīl kā bādshāh banā degā

³¹to koī aisī bāt sāmne nahīṅ āegī jo ṭhokar kā bāis ho. mere āqā kā zamīr sāf hogā, kyūṅki āp badlā le kar qātil nahīṅ bane hoṅge. guzārish hai ki jab rab āp ko kāmyābī de to apnī ḳhādimā ko bhī yād kareṅ.”

³²dāūd bahut ḳhush huā. “rab isrāīl ke ḳhudā kī tārīf ho jis ne āj āp ko mujh se milne ke lie bhej diyā.

³³āp kī basīrat mubārak hai! āp mubārak haiṅ, kyūṅki āp ne mujhe is din apne hāthoṅ se badlā le kar qātil banane se rok diyā hai.

³⁴rab isrāīl ke ḳhudā kī qasam jis ne mujhe āp ko nuqsān pahuṅchāne se rok diyā, kal subh nābāl ke tamām ādmī halāk hote agar āp itnī jaldī se mujh se milne na ātīṅ.”

³⁵dāūd ne abījel kī peshkardā chīzeṅ qabūl karke use ruḳhsat kiyā aur kahā, “salāmatī se jāeṅ. maiṅ ne āp kī sunī aur āp kī bāt manzūr kar lī hai.”

³⁶jab abījel apne ghar pahuṅchī to dekhā ki bahut raunaq hai, kyūṅki nābāl bādshāh kī sī ziyāfat karke ḳhushiyāṅ manā rahā thā. chūṅki wuh nashe meṅ dhut thā is lie abījel ne use us waqt kuchh na batāyā.

³⁷aglī subh jab nābāl hosh meṅ ā gayā to abījel ne use sab kuchh kah sunāyā. yih sunte hī nābāl ko daurā paṛ gayā, aur wuh patthar sā ban gayā.

³⁸das din ke bād rab ne use marne diyā.

³⁹jab dāūd ko nābāl kī maut kī ḳhabar mil gaī to wuh pukārā, “rab kī tārīf ho jis ne mere lie nābāl se laṛ kar merī be'izzatī kā badlā liyā hai. us kī mehrbānī hai ki maiṅ ġhalat kām karne se bach gayā hūṅ jabki nābāl kī burāī us ke apne sar par ā gaī hai.” kuchh der ke bād dāūd ne apne logoṅ ko abījel ke pās bhejā tāki wuh dāūd kī us ke sāth shādī kī darḳhwāst pesh kareṅ.

⁴⁰chunāṅche us ke mulāzim karmil meṅ abījel ke pās jā kar bole, “dāūd ne hameṅ shādī kā paiġhām de kar bhejā hai.”

⁴¹abījel khaṛī huī, phir muṅh ke bal jhuk kar bolī, “maiṅ un kī ḳhidmat meṅ hāzir hūṅ. maiṅ apne mālik ke ḳhādimoṅ ke pāoṅ dhone tak tayyār hūṅ.”

⁴²wuh jaldī se tayyār huī aur gadhe par baiṭh kar dāūd ke mulāzimoṅ ke sāth rawānā huī. pāṅch naukarāniyāṅ us ke sāth chalī gaīṅ. yūṅ abījel dāūd kī bīwī ban gaī.

⁴³ab dāūd kī do bīwiyāṅ thīṅ, kyūṅki pahle us kī shādī aḳhīnūsam se huī thī jo yazrael se thī.

⁴⁴jahāṅ tak sāūl kī beṭī mīkal kā tālluq thā sāūl ne use dāūd se le kar us kī dubārā shādī faltī'el bin lais se karwāī thī jo jallīm kā rahne wālā thā.