Read Roman Urdu Geo 1-samūel 27 Bible Online

1-samūel 27 - Roman Urdu Geo bible

1-samūel 27

¹is tajribe ke bād dāūd sochne lagā, “agar maiṅ yihīṅ ṭhahar jāūṅ to kisī din sāūl mujhe mār ḍālegā. behtar hai ki apnī hifāzat ke lie filistiyoṅ ke mulk meṅ chalā jāūṅ. tab sāūl pūre isrāīl meṅ merā khoj lagāne se bāz āegā, aur maiṅ mahfūz rahūṅgā.”

²chunāṅche wuh apne 600 ādmiyoṅ ko le kar jāt ke bādshāh akīs bin māok ke pās chalā gayā.

³un ke ḳhāndān sāth the. dāūd kī do bīwiyāṅ aḳhīnūsam yazraelī aur nābāl kī bewā abījel karmilī bhī sāth thīṅ. akīs ne unheṅ jāt shahr meṅ rahne kī ijāzat dī.

⁴jab sāūl ko ḳhabar milī ki dāūd ne jāt meṅ panāh lī hai to wuh us kā khoj lagāne se bāz āyā.

⁵ek din dāūd ne akīs se bāt kī, “agar āp kī nazar-e-karm mujh par hai to mujhe dehāt kī kisī ābādī meṅ rahne kī ijāzat deṅ. kyā zarūrat hai ki maiṅ yahāṅ āp ke sāth dār-ul-hukūmat meṅ rahūṅ?”

⁶akīs muttafiq huā. us din us ne use siqlāj shahr de diyā. yih shahr us waqt se yahūdāh ke bādshāhoṅ kī milkiyat meṅ rahā hai.

⁷dāūd ek sāl aur chār mahīne filistī mulk meṅ ṭhahrā rahā.

⁸siqlāj se dāūd apne ādmiyoṅ ke sāth muḳhtalif jaghoṅ par hamlā karne ke lie nikaltā rahā. kabhī wuh jasūriyoṅ par dhāwā bolte, kabhī jirziyoṅ yā amālīqiyoṅ par. yih qabīle qadīm zamāne se yahūdāh ke junūb meṅ shūr aur misr kī sarhad tak rahte the.

⁹jab bhī koī maqām dāūd ke qabze meṅ ā jātā to wuh kisī bhī mard yā aurat ko zindā na rahne detā lekin bheṛ-bakriyoṅ, gāy-bailoṅ, gadhoṅ, ūṅṭoṅ aur kapṛoṅ ko apne sāth siqlāj le jātā. jab bhī dāūd kisī hamle se wāpas ā kar bādshāh akīs se miltā

¹⁰to wuh pūchhtā, “āj āp ne kis par chhāpā mārā?” phir dāūd jawāb detā, “yahūdāh ke junūbī ilāqe par,” yā “yarahmieliyoṅ ke junūbī ilāqe par,” yā “qīniyoṅ ke junūbī ilāqe par.”

¹¹jab bhī dāūd kisī ābādī par hamlā kartā to wuh tamām bāshindoṅ ko maut ke ghāṭ utār detā aur na mard, na aurat ko zindā chhoṛ kar jāt lātā. kyūṅki us ne sochā, “aisā na ho ki filistiyoṅ ko patā chale ki maiṅ asal meṅ isrāīlī ābādiyoṅ par hamlā nahīṅ kar rahā.” jitnā waqt dāūd ne filistī mulk meṅ guzārā wuh aisā hī kartā rahā.

¹²akīs ne dāūd par pūrā bharosā kiyā, kyūṅki us ne sochā, “ab dāūd ko hameshā tak merī ḳhidmat meṅ rahnā paṛegā, kyūṅki aisī harkatoṅ se us kī apnī qaum us se saḳht mutanaffir ho gaī hai.”