Read Roman Urdu Geo 1-samūel 3 Bible Online

1-samūel 3 - Roman Urdu Geo bible

1-samūel 3

¹chhoṭā samūel elī ke zer-e-nigarānī rab ke huzūr ḳhidmat kartā thā. un dinoṅ meṅ rab kī taraf se bahut kam paiġhām yā royāeṅ miltī thīṅ.

²ek rāt elī jis kī āṅkheṅ itnī kamzor ho gaī thīṅ ki deḳhnā taqrīban nāmumkin thā māmūl ke mutābiq so gayā thā.

³samūel bhī leṭ gayā thā. wuh rab ke maqdis meṅ so rahā thā jahāṅ ahd kā sandūq paṛā thā. shamādān ab tak rab ke huzūr jal rahā thā

⁴ki achānak rab ne āwāz dī, “samūel!” samūel ne jawāb diyā, “jī, maiṅ abhī ātā hūṅ.” wuh bhāg kar elī ke pās gayā aur kahā, “jī janāb, maiṅ hāzir hūṅ. āp ne mujhe bulāyā?” elī bolā, “nahīṅ, maiṅ ne tumheṅ nahīṅ bulāyā. wāpas jā kar dubārā leṭ jāo.” chunāṅche samūel dubārā leṭ gayā.

⁶lekin rab ne ek bār phir āwāz dī, “samūel!” laṛkā dubārā uṭhā aur elī ke pās jā kar bolā, “jī janāb, maiṅ hāzir hūṅ. āp ne mujhe bulāyā?” elī ne jawāb diyā, “nahīṅ beṭā, maiṅ ne tumheṅ nahīṅ bulāyā. dubārā so jāo.”

⁷us waqt samūel rab kī āwāz nahīṅ pahchān saktā thā, kyūṅki abhī use rab kā koī paiġhām nahīṅ milā thā.

⁸chunāṅche rab ne tīsrī bār āwāz dī, “samūel!” ek aur martabā samūel uṭh khaṛā huā aur elī ke pās jā kar bolā, “jī janāb, maiṅ hāzir hūṅ. āp ne mujhe bulāyā?” yih sun kar elī ne jān liyā ki rab samūel se hamkalām ho rahā hai.

⁹is lie us ne laṛke ko batāyā, “ab dubārā leṭ jāo, lekin aglī dafā jab āwāz sunāī de to tumheṅ kahnā hai, ‘ai rab, farmā. terā ḳhādim sun rahā hai’.” samūel ek bār phir apne bistar par leṭ gayā.

¹⁰rab ā kar wahāṅ khaṛā huā aur pahle kī tarah pukārā, “samūel! samūel!” laṛke ne jawāb diyā, “ai rab, farmā. terā ḳhādim sun rahā hai.”

¹¹phir rab samūel se hamkalām huā, “dekh, maiṅ isrāīl meṅ itnā haulnāk kām karūṅga ki jise bhī is kī ḳhabar milegī us ke kān bajne lageṅge.

¹²us waqt maiṅ shurū se le kar āḳhir tak wuh tamām bāteṅ pūrī karūṅga jo maiṅ ne elī aur us ke gharāne ke bāre meṅ kī haiṅ.

¹³maiṅ elī ko āgāh kar chukā hūṅ ki us kā gharānā hameshā tak merī adālat kā nishānā banā rahegā. kyūṅki go use sāf mālūm thā ki us ke beṭe apnī ġhalat harkatoṅ se merā ġhazab apne āp par lāeṅge to bhī us ne unheṅ karne diyā aur na rokā.

¹⁴maiṅ ne qasam khāī hai ki elī ke gharāne kā qusūr na zabah aur na ġhallā kī kisī qurbānī se dūr kiyā jā saktā hai balki is kā kaffārā kabhī bhī nahīṅ diyā jā sakegā!”

¹⁵is ke bād samūel subh tak apne bistar par leṭā rahā. phir wuh māmūl ke mutābiq uṭhā aur rab ke ghar ke darwāze khol die. wuh elī ko apnī royā batāne se ḍartā thā,

¹⁶lekin elī ne use bulā kar kahā, “samūel, mere beṭe!” samūel ne jawāb diyā, “jī, maiṅ hāzir hūṅ.”

¹⁷elī ne pūchhā, “rab ne tumheṅ kyā batāyā hai? koī bhī bāt mujh se mat chhupānā! allāh tumheṅ saḳht sazā de agar tum ek lafz bhī mujh se poshīdā rakho.”

¹⁸phir samūel ne use khul kar sab kuchh batā diyā aur ek bāt bhī na chhupāī. elī ne kahā, “wuhī rab hai. jo kuchh us kī nazar meṅ ṭhīk hai use wuh kare.”

¹⁹samūel jawān hotā gayā, aur rab us ke sāth thā. us ne samūel kī har bāt pūrī hone dī.

²⁰pūre isrāīl ne dān se le kar bair-sabā tak jān liyā ki rab ne apne nabī samūel kī tasdīq kī hai.

²¹agle sāloṅ meṅ bhī rab sailā meṅ apne kalām se samūel par zāhir hotā rahā.