Read Roman Urdu Geo 1-samūel 7 Bible Online

1-samūel 7 - Roman Urdu Geo bible

1-samūel 7

¹yih sun kar qiryat-yārīm ke mard āe aur rab kā sandūq apne shahr meṅ le gae. wahāṅ unhoṅ ne use abīnadāb ke ghar meṅ rakh diyā jo pahāṛī par thā. abīnadāb ke beṭe ilīazar ko maḳhsūs kiyā gayā tāki wuh ahd ke sandūq kī pahrādārī kare.

²ahd kā sandūq 20 sāl ke tawīl arse tak qiryat-yārīm meṅ paṛā rahā. is daurān tamām isrāīl mātam kartā rahā, kyūṅki lagtā thā ki rab ne unheṅ tark kar diyā hai.

³phir samūel ne tamām isrāīliyoṅ se kahā, “agar āp wāqaī rab ke pās wāpas ānā chāhte haiṅ to ajnabī mābūdoṅ aur astārāt dewī ke but dūr kar deṅ. pūre dil ke sāth rab ke tābe ho kar usī kī ḳhidmat kareṅ. phir hī wuh āp ko filistiyoṅ se bachāegā.”

⁴isrāīliyoṅ ne us kī bāt mān lī. wuh bāl aur astārāt ke butoṅ ko phaiṅk kar sirf rab kī ḳhidmat karne lage.

⁵tab samūel ne elān kiyā, “pūre isrāīl ko misfāh meṅ jamā kareṅ to maiṅ wahāṅ rab se duā karke āp kī sifārish karūṅga.”

⁶chunāṅche wuh sab misfāh meṅ jamā hue. taubā kā izhār karke unhoṅ ne kueṅ se pānī nikāl kar rab ke huzūr unḍel diyā. sāth sāth unhoṅ ne pūrā din rozā rakhā aur iqrār kiyā, “ham ne rab kā gunāh kiyā hai.” wahāṅ misfāh meṅ samūel ne isrāīliyoṅ ke lie kachahrī lagāī.

⁷filistī hukmrānoṅ ko patā chalā ki isrāīlī misfāh meṅ jamā hue haiṅ to wuh un se laṛne ke lie āe. yih sun kar isrāīlī saḳht ghabrā gae

⁸aur samūel se minnat kī, “duā karte raheṅ! rab hamāre ḳhudā se iltimās karne se na rukeṅ tāki wuh hameṅ filistiyoṅ se bachāe.”

⁹tab samūel ne bheṛ kā dūdh pītā bachchā chun kar rab ko bhasm hone wālī qurbānī ke taur par pesh kiyā. sāth sāth wuh rab se iltimās kartā rahā. aur rab ne us kī sunī.

¹⁰samūel abhī qurbānī pesh kar rahā thā ki filistī wahāṅ pahuṅch kar isrāīliyoṅ par hamlā karne ke lie tayyār hue. lekin us din rab ne zor se kaṛaktī huī āwāz se filistiyoṅ ko itnā dahshatzadā kar diyā ki wuh darham-barham ho gae aur isrāīlī āsānī se unheṅ shikast de sake.

¹¹isrāīliyoṅ ne misfāh se nikal kar bait-kār ke nīche tak dushman kā tāqqub kiyā. rāste meṅ bahut se filistī halāk hue.

¹²is fath kī yād meṅ samūel ne misfāh aur shen ke darmiyān ek baṛā patthar nasab kar diyā. us ne patthar kā nām aban-azar yānī ‘madad kā patthar’ rakhā. kyūṅki us ne kahā, “yahāṅ tak rab ne hamārī madad kī hai.”

¹³is tarah filistiyoṅ ko maġhlūb kiyā gayā, aur wuh dubārā isrāīl ke ilāqe meṅ na ghuse. jab tak samūel jītā rahā filistiyoṅ par rab kā saḳht dabāo rahā.

¹⁴aur aqrūn se le kar jāt tak jitnī isrāīlī ābādiyāṅ filistiyoṅ ke hāth meṅ ā gaī thīṅ wuh sab un kī zamīnoṅ samet dubārā isrāīl ke qabze meṅ ā gaīṅ. amoriyoṅ ke sāth bhī sulah ho gaī.

¹⁵samūel apne jīte jī isrāīl kā qāzī aur rāhnumā rahā.

¹⁶har sāl wuh bait-el, jiljāl aur misfāh kā daurā kartā, kyūṅki in tīn jaghoṅ par wuh isrāīliyoṅ ke lie kachahrī lagāyā kartā thā.

¹⁷is ke bād wuh dubārā rāmā apne ghar wāpas ā jātā jahāṅ mustaqil kachahrī thī. wahāṅ us ne rab ke lie qurbāngāh bhī banāī thī.