Read Romanian Cornilescu Reference Bible Cyrillic script – Библия Думитру Корнилеску Ӂенеза 1 Bible Online

Ӂенеза 1 - Romanian Cornilescu Reference Bible Cyrillic script – Библия Думитру Корнилеску bible

Ӂенеза 1

¹தொடக்கத்தில் கடவுள் விண்ணுலகையும், மண்ணுலகையும் படைத்தபொழுது,

²மண்ணுலகு உருவற்று வெறுமையாக இருந்தது.ஆழத்தின் மீது இருள் பரவியிருந்தது.நீர்த்திரளின்மேல் கடவுளின் ஆவி அசைந்தாடிக் கொண்டிருந்தது.

³அப்பொழுது கடவுள், “ஒளி தோன்றுக!” என்றார்: ஒளி தோன்றிற்று. கடவுள் ஒளி நல்லது என்று கண்டார்.

⁴கடவுள் ஒளியையும் இருளையும் வெவ்வேறாகப் பிரித்தார்.

⁵கடவுள் ஒளிக்குப்‘பகல்’ என்றும் இருளுக்கு‘இரவு’ என்றும் பெயரிட்டார்.மாலையும் காலையும் நிறைவுற்று முதல் நாள் முடிந்தது.

⁶அப்பொழுது கடவுள், “நீர்த்திரளுக்கு இடையில், வானம் தோன்றுக! அது நீரினின்று நீரைப் பிரிக்கட்டும்” என்றார்.

⁷கடவுள் வானத்தை உருவாக்கி வானத்திற்குக் கீழுள்ள நீரையும் வானத்திற்கு மேலுள்ள நீரையும் பிரித்தார்.அது அவ்வாறே ஆயிற்று.

⁸கடவுள் வானத்திற்கு ‘விண்ணுலகம்’ என்று பெயரிட்டார்.மாலையும் காலையும் நிறைவுற்று இரண்டாம் நாள் முடிந்தது.

⁹அப்பொழுது கடவுள், “விண்ணுலகுக்குக் கீழுள்ள நீர் எல்லாம் ஓரிடத்தில் ஒன்றுசேர உலர்ந்த தரை தோன்றுக!” என்றார்.அது அவ்வாறே ஆயிற்று.

¹⁰கடவுள் உலர்ந்த தரைக்கு ‘நிலம்’ என்றும் ஒன்றுதிரண்ட நீருக்குக் ‘கடல்’ என்றும் பெயரிட்டார்.கடவுள் அது நல்லது என்று கண்டார்.

¹¹அப்பொழுது கடவுள், “புற்பூண்டுகளையும் விதை தரும் செடிகளையும், கனி தரும் பழமரங்களையும் அந்த அந்த இனத்தின்படியே நிலம் விளைவிக்கட்டும்” என்றார்.அது அவ்வாறே ஆயிற்று.

¹²புற்பூண்டுகளையும் விதையைப் பிறப்பிக்கும் செடிகளையும் கனிதரும் மரங்களையும் அந்த அந்த இனத்தின்படி நிலம் விளைவித்தது. கடவுள் அது நல்லது என்று கண்டார்.

¹³மாலையும், காலையும் நிறைவுற்று மூன்றாம் நாள் முடிந்தது.

¹⁴அப்பொழுது கடவுள்,“பகலையும் இரவையும் வெவ்வேறாகப் பிரிப்பதற்கும் காலங்கள், நாள்கள், ஆண்டுகள் ஆகியவற்றைக் குறிப்பதற்கும் விண்விரிவினில் ஒளிப்பிழம்புகள் தோன்றுக!

¹⁵அவை மண்ணுலகிற்கு ஒளிதர விண்விரிவினில் ஒளிப்பிழம்புகளாக இருக்கட்டும்” என்றார்.அது அவ்வாறே ஆயிற்று.

¹⁶கடவுள் இருபெரும் ஒளிப்பிழம்புகளை உருவாக்கினார்.பகலை ஆள்வதற்குப் பெரிய ஒளிப்பிழம்பையும், இரவை ஆள்வதற்குச் சிறிய ஒளிப்பிழம்பையும் மற்றும் விண்மீன்களையும் அவர் உருவாக்கினார்.

¹⁷கடவுள் மண்ணுலகிற்கு ஒளிதர விண்ணுலக வானத்தில் அவற்றை அமைத்தார்:

¹⁸பகலையும் இரவையும் ஆள்வதற்கும் ஒளியையும் இருளையும் வௌவேறாகப் பிரிப்பதற்கும் அவற்றை அமைத்தார்.கடவுள் அது நல்லது என்று கண்டார்.

¹⁹மாலையும் காலையும் நிறைவுற்று நான்காம் நாள் முடிந்தது.

²⁰அப்பொழுது கடவுள்,“திரளான உயிரினங்களைத் தண்ணீர் தோற்றுவிப்பதாக! விண்ணுலக வானத்தில் நிலத்திற்கு மேலே பறவைகள் பறப்பனவாக!” என்றார்.

²¹இவ்வாறு, கடலின பெரும் பாம்புகளையும், திரள் திரளாக நீரில் நீந்திவாழும் உயிரினங்களையும், இறக்கையுள்ள எல்லாவிதப் பறவைகளையும் அவ்வவற்றின் இனத்தின்படி கடவுள் படைத்தார்.கடவுள் அது நல்லது என்று கண்டார்.

²²கடவுள் அவற்றிற்கு ஆசி வழங்கி “பலுகிப் பெருகிக் கடல் நீரை நிரப்புங்கள். பறவைகளும் மண்ணுலகில் பெருகட்டும்” என்றுரைத்தார்.

²³மாலையும் காலையும் நிறைவுற்று, ஐந்தாம் நாள் முடிந்தது.

²⁴அப்பொழுது கடவுள்,“கால்நடைகள், ஊர்வன, காட்டுவிலங்குகள் ஆகியவற்றை அவ்வவற்றின் இனத்தின்படி நிலம் தோற்றுவிப்பதாக” என்றார்.

²⁵கடவுள் காட்டு விலங்குகளையும் கால்நடைகளையும் நிலத்தில் ஊர்வன யாவற்றையும் அவ்வவற்றின் இனத்தின்படி உருவாக்கினார்.கடவுள் அது நல்லது என்று கண்டார்.

²⁶அப்பொழுது கடவுள்,“மானிடரை நம் உருவிலும், நம் சாயலிலும் உண்டாக்குவோம்.அவர்கள் கடல் மீன்களையும், வானத்துப் பறவைகளையும், கால்நடைகளையும், மண்ணுலகு முழுவதையும், நிலத்தில் ஊர்வன யாவற்றையும் ஆளட்டும்” என்றார்.

²⁷கடவுள் தம் உருவில் மானிடரைப் படைத்தார்: கடவுளின் உருவிலேயே அவர்களைப் படைத்தார்: ஆணும் பெண்ணுமாக அவர்களைப் படைத்தார்.

²⁸கடவுள் அவர்களுக்கு ஆசி வழங்கி,“பலுகிப் பெருகி மண்ணுலகை நிரப்புங்கள்: அதை உங்கள் ஆற்றலுக்கு உட்படுத்துங்கள்: கடல் மீன்கள், வானத்துப் பறவைகள், நிலத்தில் ஊர்ந்து உயிர் வாழ்வன அனைத்தையும் ஆளுங்கள்” என்றார்.

²⁹அப்பொழுது கடவுள்,“மண்ணுலகெங்கும் உள்ள விதை தரும் செடிகள், பழமரங்கள், அனைத்தையும் உங்களுக்கு நான் கொடுத்துள்ளேன்: இவை உங்களுக்கு உணவாகட்டும்.

³⁰எல்லாக் காட்டுவிலங்குகள், வானத்துப் பறவைகள், நிலத்தில் ஊர்வன ஆகிய அனைத்து உயிரினங்களுக்கும் பசுமையான செடிகள் அனைத்தையும் நான் உணவாகத் தந்துள்ளேன்” என்றார்.அது அவ்வாறே ஆயிற்று.

³¹கடவுள் தாம் உருவாக்கிய அனைத்தையும் நோக்கினார்.அவை மிகவும் நன்றாய் இருந்தன.மாலையும் காலையும் நிறைவுற்று ஆறாம் நாள் முடிந்தது.