Read Romanian Cornilescu Reference Bible Cyrillic script – Библия Думитру Корнилеску Матей 9 Bible Online

Матей 9 - Romanian Cornilescu Reference Bible Cyrillic script – Библия Думитру Корнилеску bible

Матей 9

¹இயேசு படகேறி மறு கரைக்குச் சென்று தம் சொந்த நகரை அடைந்தார்.

²அப்பொழுது சிலர் முடக்குவாதமுற்ற ஒருவரைக் கட்டிலில் கிடத்தி அவரிடம் கொண்டு வந்தனர். இயேசு அவர்களுடைய நம்பிக்கையைக் கண்டு முடக்குவாதமுற்றவரிடம், “ மகனே, துணிவோடிரு, உன் பாவங்கள் மன்னிக்கப்பட்டன “ என்றார்.

³அப்பொழுது மறைநூல் அறிஞர்கள் சிலர், “ இவன் கடவுளைப் பழிக்கிறான் “ என்று தமக்குள் சொல்லிக் கொண்டனர்.

⁴அவர்களுடைய சிந்தனைகளை இயேசு அறிந்து அவர்களை நோக்கி, “ உங்கள் உள்ளங்களில் நீங்கள் தீயன சிந்திப்பதேன்?

⁵“ உன் பாவங்கள் மன்னிக்கப்பட்டன “ என்பதா, “ எழுந்து நட “ என்பதா, எது எளிது?

⁶மண்ணுலகில் பாவங்களை மன்னிக்க மானிட மகனுக்கு அதிகாரம் உண்டு என்பதை நீங்கள் அறிந்துகொள்ள வேண்டும் “ என்றார். பின்பு அவர் முடக்குவாதமுற்றவரை நோக்கி, “நீ எழுந்து உன்னுடைய கட்டிலைத் தூக்கிக்கொண்டு வீட்டுக்குப் போ “ என்றார்.

⁷அவரும் எழுந்து தமது வீட்டுக்குப் போனார்.

⁸இதைக் கண்ட மக்கள் கூட்டத்தினர் அச்சமுற்றனர். இத்தகைய அதிகாரத்தை மனிதருக்கு அளித்த கடவுளைப் போற்றிப் புகழ்ந்தனர்.

⁹இயேசு அங்கிருந்து சென்ற போது மத்தேயு என்பவர் சுங்கச்சாவடியில் அமர்ந்திருந்ததைக் கண்டார்: அவரிடம், “ என்னைப் பின்பற்றி வா “ என்றார். அவரும் எழுந்து இயேசுவைப் பின்பற்றிச் சென்றார்.

¹⁰பின்பு அவருடைய வீட்டில் பந்தியில் அமர்ந்திருந்தபோது வரி தண்டுபவர்கள், பாவிகள் ஆகிய பலர் வந்து இயேசுவோடும் அவருடைய சீடரோடும் விருந்துண்டனர்.

¹¹இதைக் கண்ட பரிசேயர் அவருடைய சீடரிடம், “ உங்கள் போதகர் வரிதண்டுபவர்களோடும் பாவிகளோடும் சேர்ந்து உண்பது ஏன்? “ என்று கேட்டனர்.

¹²இயேசு இதைக் கேட்டவுடன், “ நோயற்றவர்க்கு அல்ல, நோயுற்றவர்க்கே மருத்துவர் தேவை.

¹³“ பலியை அல்ல, இரக்கத்தையே விரும்புகிறேன் “ என்பதன் கருத்தை நீங்கள் போய்க் கற்றுக் கொள்ளுங்கள்: ஏனெனில் நேர்மையாளரை அல்ல, பாவிகளையே அழைக்க வந்தேன் “ என்றார்.

¹⁴பின்பு யோவானின் சீடர் இயேசுவிடம் வந்து, “ நாங்களும் பரிசேயரும் அதிகமாக நோன்பு இருக்க, உம்முடைய சீடர்கள் ஏன் நோன்பு இருப்பதில்லை? “ என்றனர்.

¹⁵அதற்கு இயேசு அவர்களை நோக்கி, “மணமகன் தங்களோடு இருக்கும்வரை மணவிருந்தினர்கள் துக்கம் கொண்டாட முடியுமா? மணமகன் அவர்களை விட்டுப் பிரியவேண்டிய காலம் வரும். அப்போது அவர்களும் நோன்பு இருப்பார்கள்.

¹⁶மேலும் எவரும் பழைய ஆடையில் புதிய துணியை ஒட்டுப் போடுவதில்லை. ஏனெனில் அந்த ஒட்டு ஆடையைக் கிழித்துவிடும்: கிழிசலும் பெரிதாகும்.

¹⁷அதுபோலப் பழைய தோற்பைகளில் புதிய திராட்சை மதுவை ஊற்றி வைப்பதில்லை. ஊற்றி வைத்தால் தோற்பைகள் வெடிக்கும்: மதுவும் சிந்திப்போகும்: தோற்பைகளும் பாழாகும். புதிய மதுவைப் புதிய தோற்பைகளில்தான் ஊற்றி வைப்பர். அப்போது இரண்டும் வீணாய்ப் போகா “ என்றார்.

¹⁸அவர்களுடன் இவ்வாறு இயேசு பேசிக்கொண்டிருந்தபொழுது, தொழுகைக் கூடத் தலைவர் ஒருவர் அவரிடம் வந்து பணிந்து, “ என் மகள் இப்பொழுதுதான் இறந்தாள். ஆயினும் நீர் வந்து அவள் மீது உம் கையை வையும். அவள் உடனே உயிர் பெறுவாள் “ என்றார்.

¹⁹இயேசு எழுந்து அவர் பின்னே சென்றார். இயேசுவின் சீடர்களும் அவரைப் பின் தொடர்ந்தனர்.

²⁰அப்பொழுது பன்னிரு ஆண்டுகளாய் இரத்தப்போக்கினால் வருந்திய ஒரு பெண் அவருக்குப்பின்னால் வந்து அவரது மேலுடையின் ஓரத்தைத் தொட்டார்.

²¹ஏனெனில் அப்பெண், “ நான் அவருடைய ஆடையைத் தொட்டாலே போதும், நலம்பெறுவேன் “ எனத் தமக்குள் சொல்லிக்கொண்டார்.

²²இயேசு அவரைத் திரும்பிப் பார்த்து, “ மகளே, துணிவோடிரு: உனது நம்பிக்கை உன்னைக் குணமாக்கிற்று “ என்றார். அந்நேரத்திலிருந்தே அப்பெண் நலம் அடைந்திருந்தார்.

²³இயேசு அத்தலைவருடைய வீட்டிற்குச் சென்றார். அங்கே குழல் ஊதுவோரையும் கூட்டத்தினரின் அமளியையும் கண்டார்.

²⁴அவர், “ விலகிப் போங்கள்: சிறுமி இறக்கவில்லை, உறங்குகிறாள் “ என்றார். அவர்களோ அவரைப் பார்த்து நகைத்தார்கள்.

²⁵அக்கூட்டத்தினரை வெளியேற்றிய பின் அவர் உள்ளே சென்று சிறுமியின் கையைப் பிடித்தார் அவளும் உயிர்பெற்று எழுந்தாள்.

²⁶இச்செய்தி அந்நாடெங்கும் பரவியது.

²⁷இயேசு அங்கிருந்து சென்றபோது பார்வையற்றோர் இருவர், “ தாவீதின் மகனே, எங்களுக்கு இரங்கும் “ என்று கத்திக்கொண்டே அவரைப் பின்தொடர்ந்தனர்.

²⁸அவர் வீடு வந்து சேர்ந்ததும் அந்தப் பார்வையற்றோரும் அவரிடம் வந்தனர். இயேசு அவர்களைப் பார்த்து, “ நான் இதைச் செய்ய முடியும் என நம்புகிறீர்களா ? “ என்று கேட்டார். அதற்கு அவர்கள், “ ஆம், ஐயா “ என்றார்கள்.

²⁹பின்பு அவர் அவர்களின் கண்களைத் தொட்டு, “நீங்கள் நம்பியபடியே உங்களுக்கு நிகழட்டும் “ என்றார்.

³⁰உடனே அவர்களின் கண்கள் திறந்தன. இயேசு அவர்களை நோக்கி. “ யாரும் இதை அறியாதபடி பார்த்துக் கொள்ளுங்கள் “ என்று மிகக் கண்டிப்பாகக் கூறினார்.

³¹ஆனால் அவர்கள் வெளியேபோய் நாடெங்கும் அவரைப் பற்றிய செய்தியைப் பரப்பினார்கள்.

³²அவர்கள் சென்றபின் பேய் பிடித்துப் பேச்சிழந்த ஒருவரைச் சிலர் அவரிடம் கொண்டு வந்தனர்.

³³பேயை அவர் ஓட்டியதும் பேச இயலாத அவர் பேசினார். மக்கள் கூட்டத்தினர் வியப்புற்று, “இஸ்ரயேலில் இப்படி ஒருபோதும் கண்டதில்லை “ என்றனர்.

³⁴ஆனால் பரிசேயர், “ இவன் பேய்களின் தலைவனைக் கொண்டு பேய்களை ஓட்டுகிறான் “ என்றனர்.

³⁵இயேசு நகர்கள், சிற்றூர்கள் எல்லாம் சுற்றிவந்தார். எங்கும் அவர்களுடைய தொழுகைக்கூடங்களில் கற்பித்தார்: விண்ணரசைப்பற்றிய நற்செய்தியைப் பறைசாற்றினார்: நோய் நொடிகள் அனைத்தையும் குணமாக்கினார்.

³⁶திரண்டிருந்த மக்களை அவர் கண்டபோது அவர்கள் மேல் பரிவுகொண்டார்: அவர்கள் ஆயர் இல்லா ஆடுகளைப்போல அலைக்கழிக்கப்பட்டு சோர்ந்து காணப்பட்டார்கள்.

³⁷அப்பொழுது அவர் தம் சீடரை நோக்கி, “அறுவடை மிகுதி: வேலையாள்களோ குறைவு.

³⁸ஆகையால் தேவையான வேலையாள்களைத் தமது அறுவடைக்கு அனுப்பும்படி அறுவடையின் உரிமையாளரிடம் மன்றாடுங்கள் “ என்றார்.