Read Romanian Cornilescu Reference Bible Cyrillic script – Библия Думитру Корнилеску Жудекэторий 1 Bible Online

Жудекэторий 1 - Romanian Cornilescu Reference Bible Cyrillic script – Библия Думитру Корнилеску bible

Жудекэторий 1

¹யோசுவா இறந்த பின் இஸ்ரயேல் மக்கள் ஆண்டவரிடம், “யார் கானானியருக்கு எதிராகச் சென்று எங்கள் சார்பாக முதலில் அவர்களுடன் போரிடுவர்?” என்று கேட்டனர்.

²ஆண்டவர், “யூதா செல்வான்.இதோ! அவன் கையில் நிலத்தைக் கொடுத்துள்ளேன்” என்றார்.

³யூதாவின் மக்கள் தம் சகோதரராகிய சிமியோனின் மக்களிடம், “எங்களுடன் எங்கள் நிலப்பகுதிக்குள் வாருங்கள்.கானானியருக்கு எதிராக நாம் போரிடுவோம்.நாங்களும் உங்கள் நிலப்பகுதிக்குள் உங்களுடன் வருவோம்” என்றனர்.சிமியோனின் மக்கள் அவர்களுடன் சென்றனர்.

⁴அவ்வாறே யூதா போரிடச் சென்றபொழுது ஆண்டவர் கானானியரையும் பெரிசியரையும் அவர்களிடம் ஒப்படைத்தார்.அவர்கள் பெசக்கில் பத்தாயிரம் பேரைக் கொன்றனர்.

⁵அதோனிபெசக்கைப் பெசக்கில் கண்டுபிடித்து, அவனை எதிர்த்துப் போரிட்டுக் கானானியரையும் பெரிசியரையும் அவர்கள் வீழ்த்தினர்.

⁶தப்பி ஓடிய அதோனிபெசக்கை அவர்கள் துரத்திச் சென்று பிடித்து, அவனுடைய கை, கால்களின் பெருவிரல்களைத் துண்டித்தனர்.

⁷அப்பொழுது, அதோனிபெசக்கு, “கை, கால்களின் பெருவிரல்கள் துண்டிக்கப்பட்ட எழுபது அரசர்கள் என் உணவு மேசையிலிருந்து சிதறியவற்றைப் பொறுக்கினார்கள்.நான் செய்தவாறே, கடவுள் எனக்குச் செய்துள்ளார்” என்றான்.அவனை எருசலேமுக்குக் கொண்டு வந்தனர்.அவன் அங்கே இறந்தான்.

⁸யூதாவின் மக்கள் எருசலேமுக்கு எதிராகப் போரிட்டு அதைக் கைப்பற்றினர்.வாள்முனையால் மக்களை வெட்டிவீழ்த்தி, நகரை நெருப்புக்கு இரையாக்கினர்.

⁹பின்னர் யூதாவின் மக்கள் மலைநாட்டிலும், நெகேபிலும், மலை அடிவாரங்களிலும் வாழும் கானானியருக்கு எதிராகப் போர்புரியச் சென்றனர்.

¹⁰யூதாவின் மக்கள் ‘கிரியத்து அர்பா’ என்று முன்னர் அழைக்கப்பட்ட எபிரோனில் வாழ்ந்த கானானியருக்கு எதிராகச் சென்றனர் என்பதாகும்.அவர்கள் சேசாய், அகிமான், தல்மாய் இனங்களைத் தோற்கடித்தனர்.

¹¹அங்கிருந்து தெபீர்வாழ் மக்களுக்கு எதிராகச் சென்றனர்.தெபீரின் முன்னாள் பெயர் கிரியத்து சேபேர் என்பதாகும்.

¹²காலேபு, கிரியத்து சேபேரைத் தாக்கிக் கைப்பற்றுபவருக்குஎன் மகள் அக்சாவை மனைவியாக அளிப்பேன்” என்றார்.

¹³காலேபின் இளைய சகோதரனும், கெனாசின் மகனுமாகிய ஒத்னியேல் அதைக் கைப்பற்றினார்.எனவே காலேபு அவருக்குத் தம்மகள் அக்சாவை மனைவியாக அளித்தார்.

¹⁴அவள் வந்தபோது, அவளுடைய தந்தையிடமிருந்து ஒரு நிலம் கேட்குமாறு அவர் அவளைத் தூண்டினார்.எனவே அவள் கழுதையைவிட்டு இறங்கியபோது காலேபு அவளிடம், “உனக்கு என்ன வேண்டும்?” என்று அவளைக் கேட்டார்.

¹⁵அவள் அவரிடம், “எனக்கு நீர் ஓர் அன்பளிப்புத் தரவேண்டும்.எனக்கு வறண்ட நிலத்தைத்தான் கொடுத்துள்ளீர்.எனக்கு நீரூற்றுகளையும் தாரும்” என்றாள்.எனவே காலேபு அவளுக்கு மேல் ஊற்றுகளையும் கீழ் ஊற்றுகளையும் கொடுத்தார்.

¹⁶மோசேயின் மாமனாரின் மக்களாகிய கேனியர், பேரீச்ச நகரிலிருந்து யூதா மக்களுடன், யூதா பாலைநிலத்திற்குச் சென்றனர்.அது ஆராத்துக்குத் தெற்கே உள்ளது.அவர்கள் அங்குச் சென்று அங்கிருந்த மக்களுடன் வாழ்ந்தனர்.

¹⁷யூதாவின் மக்கள் தம் சகோதரர் சிமியோனின் மக்களுடன் சென்றனர்.அவர்கள் செப்பாத்தில் வாழும் கானானியரைக் கொன்று அந்நகரை முற்றிலும் அழித்தனர், நகரின் பெயரை ஒர்மா என்று அழைத்தனர்.

¹⁸யூதாவின் மக்கள் காசாவையும் அதன் எல்லைக்குட்பட்டவற்றையும் அஸ்கலோனையும் அதன் எல்லைக்குட்பட்டவற்றையும் எக்ரோனையும் அதன் எல்லைக்குட்பட்டவற்றையும் கைப்பற்றினர்.

¹⁹ஆண்டவர் யூதாவின் மக்களுடன் இருந்தார்.அவர்கள் மலைப்பகுதியை உரிமையாக்கிக் கொண்டனர்.ஆனால் சமவெளியில் வாழ்ந்தவர்களை அவர்களால் விரட்ட முடியவில்லை.ஏனெனில் அவர்களிடம் இரும்புத் தேர்கள் இருந்தன.

²⁰ஆனாக்கின் மூன்று புதல்வர்களை விரட்டியடித்த காலேபுக்கு மோசே கூறியிருந்தவாறு, எபிரோன் கொடுக்கப்பட்டது.

²¹எருசலேமில் வாழ்ந்த எபூசியரைப் பென்யமின் மக்கள் விரட்டவில்லை.இந்நாள்வரை எபூசியர் பென்யமின் மக்களுடன் எருசலேமில் வாழ்கின்றனர்.

²²யோசேப்பின் வீட்டார் பெத்தேலுக்கு எதிராகச் சென்றனர்.ஆண்டவர் அவர்களுடன் இருந்தார்.

²³யோசேப்பின் வீட்டார் பெத்தேலை உளவு பார்த்தனர்.இந்நகரின் முன்னாள் பெயர் ‘லூசு’ என்பதாகும்.

²⁴ஒற்றர்கள், ஓர் ஆள் நகரிலிருந்து வெளியே வருவதைக் கண்டனர்.அவர்கள் அவனிடம், “தயவு செய்து நகரின் நுழைவாயிலைக் காட்டு.நாங்கள் உனக்குக் கருணை காட்டுவோம்” என்றனர்.

²⁵அவனும் அவர்களுக்கு நகரின் நுழைவாயிலைக் காட்டினான்.அவர்கள் நகரை வாள்முனையில் தாக்கினர்.ஆனால் அவர்கள் அந்த ஆளையும் அவன் குடம்பம் முழுவதையும் தப்பிச்செல்ல விட்டுவிட்டனர்.

²⁶அந்த ஆள் இத்தியரின் நாட்டுக்குச் சென்று ஒரு நகரைக் கட்டி எழுப்பினான்.அதற்கு ‘லூசு’ என்று பெயரிட்டான்.அப்பெயர் இந்நாள்வரை நிலவி வருகின்றது.

²⁷பெத்சானையும், அதன் சிற்றூர்களையும், தனாக்கையும், அதன் சிற்றூர்களையும், தோர்வாழ் மக்களையும், அவர்களின் சிற்றூர்களையும், இபிலயாம்வாழ் மக்களையும், அவர்களின் சிற்றூர்களையும், மெகிதோ வாழ் மக்களையும், அவர்களின் சிற்றூர்களையும் மனாசேயின் மக்கள் முறியடிக்கவில்லை.கானானியர் அந்நிலத்தில் தொடர்ந்து வாழ்வதில் உறுதியாக இருந்தனர்.

²⁸இஸ்ரயேலர் வலிமை பெற்றதும், கானானியரை அடிமை வேலைக்கு அமர்த்தினர்.ஆனால் அவர்களை முற்றிலும் விரட்டவில்லை.

²⁹எப்ராயிமின் மக்கள் கெசேரில் வாழ்ந்த கானானியரை விரட்டவில்லை.கானானியர் கெசேரில் அவர்களிடையே வாழ்ந்தனர்.

³⁰கிற்றரோன்வாழ் மக்களையோ, நகலோல் வாழ் மக்களையோ செபுலோனின் மக்கள் விரட்டவில்லை.கானானியர் அவர்களிடையே வாழ்ந்தனர்.அவர்கள் அடிமைகள் ஆயினர்.

³¹அக்கோ வாழ் மக்களையும், சீதோன், அக்லாபு, அக்சீபு, எல்பா, அப்பீகு, இரகோபு வாழ் மக்களையும் ஆசேரின் மக்கள் விரட்டவில்லை.

³²ஆசேரின் மக்கள் அந்நாட்டில் வாழும் கானானியரிடையே வாழ்கின்றனர்.ஏனெனில் அவர்கள் அவர்களை விரட்டவில்லை.

³³நப்தலியின் மக்கள் பெத்சமேசுவாழ் மக்களையும், பெத்தனாத்து வாழ் மக்களையும் விரட்டவில்லை.அந்நாட்டில் வாழும் கானானியர், பெத்சமேசுவாழ் மக்கள், பெத்தனாத்துவாழ் மக்கள் ஆகியோரிடையே வாழ்கின்றனர்.

³⁴எமோரியர், தாண் மக்களைச் சமவெளிக்கு இறங்கவிடாமல் தடுத்து, மலைநோக்கிச் செல்லுமாறு நெருக்கினார்கள்.

³⁵எமோரியர் கர்கரேசிலும், அய்யலோனிலிருந்த சாலபிமிலும் தொடர்ந்து வாழ்வதில் உறுதியாக இருந்தனர்.யோசேப்பு வீட்டாரின் கை ஓங்கியது.எமோரியர் அடிமைகள் ஆயினர்.

³⁶எமோரியரின் எல்லை அக்ரபிம் ஏற்றத்திலிருந்து, சேலாவுக்கு வடக்கே மேல் நோக்கிச் சென்றது.