Read Romanian Cornilescu Reference Bible Cyrillic script – Библия Думитру Корнилеску Жудекэторий 4 Bible Online

Жудекэторий 4 - Romanian Cornilescu Reference Bible Cyrillic script – Библия Думитру Корнилеску bible

Жудекэторий 4

¹ஏகூது இறந்தபின், இஸ்ரயேல் மக்கள் ஆண்டவரின் பார்வையில் தீயதெனப்பட்டதை மீண்டும் செய்தனர்.

²ஆட்சோரை ஆண்ட கானானிய மன்னன் யாபினிடம் ஆண்டவர் அவர்களை ஒப்படைத்தார்.அவனுடைய படைத்தலைவன் சீசரா அரோசத்கோயிமில் வாழ்ந்து வந்தான்.

³இஸ்ரயேலர் ஆண்டவரை நோக்கிக் கூக்குரலிட்டனர்.ஏனெனில் அவனிடம் தொள்ளாயிரம் இரும்புத் தேர்கள் இருந்தன.அவன் இருபது ஆண்டுகள் இஸ்ரயேலரைக் கடுமையாக ஒடுக்கினான்.

⁴அச்சமயத்தில் இஸ்ரயேலருக்கு இறைவாக்கினரும் இலப்பிதோத்தின் மனைவியுமான தெபோரா நீதித் தலைவியாக இருந்தார்.

⁵அவர் எப்ராயிம் மலைநாட்டில் இராமாவுக்கும் பெத்தேலுக்கும் இடையில்”தெபோராப் பேரீச்சை” என்ற மரத்தின் அடியில் அமர்ந்திருப்பார்.தீர்ப்புப் பெறுதற்காக இஸ்ரயேலர் அவரிடம் செல்வர்.

⁶நப்தலியில் இருந்த கெதேசில் வாழ்ந்த அபினொவாமின் மகன் பாராக்கை அவர் ஆளனுப்பிக் கூப்பிட்டார்.அவர் அவரிடம்,”இஸ்ரயேலின் கடவுளாகிய ஆண்டவர் உமக்குக் கட்டளையிடுகிறார்: நீர் போய் நப்தலி, செபுலோன் மக்களைத் தாபோர் மலையில் ஒன்று கூட்டி அவர்களிலிருந்து பத்தாயிரம் பேரைச் சேர்த்துக்கொள்ளும்.

⁷யாபினின் படைத்தலைவன் சீசராவையம் அவன் தேர்களையும் படையையும் கீசோன் ஆற்றின் அருகே இழுத்து வந்து உம் கையில் கொடுப்பேன்” என்றார்.

⁸பாராக்கு அவரிடம்,”நீர் என்னுடன் வந்தால் நான் செல்வேன்.நீர் என்னுடன் வராவிடில் நான் செல்லமாட்டேன்” என்றார்.

⁹அவர் அவரிடம்,”நான் உம்முடன் உறுதியாக வருவேன்.ஆயினும், நீர் செல்லும் வழி உமக்குப் பெருமை தராது.ஏனெனில், ஆண்டவர் ஒரு பெண்ணிடம் சீசராவை ஒப்படைப்பார்” என்றார்.பின்பு தெபோரா எழுந்து பாராக்குடன் கெதேசு நோக்கிச் சென்றார்.

¹⁰பாராக்கு செபுலோனையும் நப்தலியையும் கெதேசில் ஒன்று கூட்டினார்.பத்தாயிரம் பேர் அவர்பின் அணிவகுத்துச் சென்றனர்.தெபோராவும் அவருடன் சென்றார்.

¹¹கேனியரான எபேர், மோசேயின் மாமனார் ஒபாபின் மக்களான கேனியரிடமிருந்து பிரிந்து, வாழ்ந்து வந்தார்.அவர் கெதேசுக்கு அருகில் சானானிமிலிருந்த கருவாலி மரத்திற்கு அருகில் தம் கூடாரத்தை அமைத்திருந்தார்.

¹²அபினோவாமின் மகன் பாராக்கு தாபோர் மலைமீது ஏறிவிட்டதைச் சீசராவுக்கு அறிவித்தனர்.

¹³சீசரா தன்னிடமிருந்த மொத்தம் தொள்ளாயிரம் இரும்புத்தேர்களையும், தன்னுடன் இருந்த மக்கள் எல்லாரையும் அரோசத்கோயிமிலிருந்து கீசோன் ஆற்றின் அருகே ஒன்று திரட்டினான்.

¹⁴தெபோரா பாராக்கிடம்,”எழுந்திரும்: இந்நாளில் ஆண்டவர் சீசராவை உம்மிடம் ஒப்படைப்பார்.ஆண்டவர் உம்முன் செல்லவில்லையா?” என்றார்.பாராக்கு தாபோர் மலையிலிருந்து இறங்கினார்.பத்தாயிரம் பேர் அவரைப் பின்தொடர்ந்தனர்.

¹⁵ஆண்டவர் சீசராவையும் அவனுடைய தேர்கள் அனைத்தையும் படை முழுவதையும் வாள் முனையில் பாராக்கின் முன்னால் சிதறடித்தார்.சீசரா தன் தேரிலிருந்து இறங்கித் தப்பி ஓடினான்.

¹⁶பாராக்கு தேர்களையும், படையையும் அரோசத்கோயிம் வரை துரத்தினார்.சீசராவின் படை முழுவதும் வாள்முனைக்கு இரையாயிற்று.ஒருவர்கூட தப்பவில்லை.

¹⁷சீசரா கேனியரான எபேரின் மனைவி யாவேலின் கூடாரத்திற்கு ஓடினான்.ஏனெனில் ஆட்சோர் மன்னன் யாபினுக்கும் கேனியரான எபேரின் வீட்டுக்கும் இடையே நல்லிணக்கம் நிலவி இருந்தது.

¹⁸யாவேல் சீசராவைச் சந்திக்க வெளியே வந்து”இங்கே திரும்பும், என் தலைவரே! என்னிடம் திரும்பும்: அஞ்ச வேண்டாம்” என்றார்.அவன் அவரோடு கூடாரத்திற்குச் சென்றான்.அவர் அவனை ஒரு போர்வையால் மூடினார்.

¹⁹அவன் அவரிடம்,”எனக்குச் சிறிது தண்ணீர் கொடு.நான் தாகமாயிருக்கிறேன்” என்றான்.பால் வைக்கும் தோற்பையைத் திறந்து அவர் அவனுக்குக் குடிக்கக் கொடுத்தார்.பின் அவனை மூடினார்.

²⁰அவன் அவரிடம்,”கூடாரத்தின் வாயிலில் நின்று கொள், எவனாவது வந்து,”இங்கு ஓர் ஆள் இருக்கின்றானா?” என்று உன்னைக் கேட்டால் நீ இல்லை” என்று சொல்” என்றான்.

²¹அவன் களைப்பால் அயர்ந்து தூங்கிக் கொண்டிருந்தான்.அப்பொழுது, எபேரின் மனைவி யாவேல் கூடார முளை ஒன்றையும் கத்தியல் ஒன்றையும் தம் கையில் எடுத்துக் கொண்டு ஓசைப்படாமல் அவனிடம் வந்து அவன் நெற்றிப் பொட்டில் முளைதரையில் இறங்கும்வரை அடிக்க, அவன் மடிந்தான்.

²²இதோ! பாராக்கு சீசராவைத் துரத்திக் கொண்டு வந்தார்.யாவேல் அவரைச் சந்திக்க வெளியே வந்தார்.யாவேல் அவரிடம்,”வாரும்! நீர் தேடும் ஆளை நான் உமக்குக் காட்டுகிறேன்” என்றார்.அவரும் அவருடன் உள்ளே செல்ல, இதோ! சீசரா இறந்து கிடந்தான்.கூடார முளை அவன் நெற்றிப் பொட்டில் அடிக்கப்பட்டு இருந்தது.

²³இவ்வாறு அந்நாளில் கடவுள் கானானிய மன்னன் யாபினை இஸ்ரயேல் மக்களின் முன் ஒடுக்கினார்.

²⁴இஸ்ரயேல் மக்களின் கை மேன்மேலும் வலுவடைந்து, கானானிய மன்னன் யாபினை நசுக்கி அழித்தது.