Read Rongmei Naga THAUREYMEI 11 Bible Online

THAUREYMEI 11 - Rongmei Naga bible

THAUREYMEI 11

¹Thaurey khou kandih kapwm khou lat akhat na sa bam khwan e.

²Kaniw rui neihpat biak thangc rui kalaic guangna Sinar twna kawmei ramv nzaengc baek khou lungc the.

³Kaniw khat khat khou kumna sa the, “Guang tho! Aniu taniangtauc ntei di kho.” Kaniw rui ntauh phaan taniangtauc khatni ntauh-tamc phaan khi rui piu the.

⁴Kaniw rui sa the, “Guang tho, aniu kaidai akhat kasiamh di kho, khatni kai kauhmei katwan tingpuk twng tanghmei akhat kasiamh di kho, kumna aniu zanc titat di kho, kum mak ge thei aniu hei kandih pwm khou zinlik tat kan puni the.”

⁵Mi kaidai tei khatni mi khou bammei nunc tei rui sw bammei kauhmei kai tei zauh khang RINGHPOUC key the.

⁶Kamei rui kumna sa the, “Zauc lo, kaniw hei zaatc akhat na, lat akhat na re; kaniw rui taancpw nimei taanv hei thu ntaw thu kahouhmei di he; kaniw rui taanc nii niimei tei taanc ngam lakpui tuang nai dat pu lak khe.

⁷Kaniw akhat khat lat thay mak khang aniu keyna kaniw lat tikaguakclou di kho.”

⁸Kumna RINGHPOUC rui kaniw ta kandih kapwm khou zinphaklou the, kum tina kaniw mi kaidai raanvthaumei taanv tei taanc nthaekc the.

⁹Kumna mi kaidai zanc tei Babel twna kaw the, kalam thu RINGHPOUC rui hei khou tei rui lat tibaiclou the khatni kaniw ta kandih kapwm khou zinphaklou the.

¹⁰Mi hei Shem kikta nunc the. Duidai tangv tingkwm kaneimei khou, Shem katingkwm 100 tangc pwkhou kanac mpouh gaanv khat Arpaksad puanc e.

¹¹Mi tangv tei kamei tingkwm 500 lungclou datna mpouh aluh baih baihmei ni puanclou e.

¹²Arpaksad katingkwm 35 khou nah mpouh gaanv khat, Shela ta puanclou e;

¹³mi tangv tei kamei tingkwm 403 lungclou datna mpouh aluh baih baihmei ni puanclou e.

¹⁴Shela katingkwm 30 khou kamei nah mpouh gaanv khat, Eber ta puanclou e;

¹⁵mi tangv tei kamei tingkwm 403 lungclou datna mpouh aluh baih baihmei ni puanclou e.

¹⁶Eber katingkwm 34 khou nah mpouh gaanv khat, Pelek ta puanclou e;

¹⁷mi tangv tei kamei tingkwm 430 lungclou datna mpouh aluh baih baihmei ni puanclou e.

¹⁸Pelek katingkwm 30 khou kanac mpouh gaanv khat, Reu ta puanclou e;

¹⁹mi tangv tei kamei tingkwm 209 lungclou datna mpouh aluh baih baihmei ni puanclou e.

²⁰Reu katingkwm 32 khou kanac mpouh gaanv khat, Seruk ta puanclou e;

²¹Mi tangv tei kamei tingkwm 207 lungclou datna kanac mpouh aluh baih baihmei ni puanclou e.

²²Seruk katingkwm 30 khou kanac mpouh gaanv khat, Nahor ta puanclou e;

²³mi tangv tei kamei tingkwm 200 lungclou datna kanac mpouh aluh baih baihmei ni puanclou e.

²⁴Nahor katingkwm 29 khou kanac mpouh gaanv khat, Tera ta puanclou e;

²⁵mi tangv tei kamei tingkwm 119 lungclou datna kanac mpouh aluh baih baihmei ni puanclou dat re.

²⁶Tera katingkwm 70 tangv Abram, Nahor, khatni Haran ta puanclou e.

²⁷Mi hei Abram, Nahor khatni Haran ta puanhmei Tera kikta the. Haran hei Lot pu e.

²⁸Haran hei kapu Tera ringc bam khou kamei lungc bammei Kaldimei kaidai Ur khou theiclou the.

²⁹Abram lev Nahor tei kaney now kaw the; Abram now zanc rui Sarai khatni Nahor now zanc rui Milka e. Kamei hei Haran nac aluhpui e. Haran rui Milka khatni Iska ta puanclou e.

³⁰Sarai tei nakamcpeic khwan e.

³¹Tera rui kanac Abram, Kamauc Sarai, khatni Haran rui puanhmei katou Lot kaniw ta nduanghna Kanaan kandic thangc tat khang Kaldimei tuang kaidai Ur khou rui tatpat the. Kaniw Haran twna kawmei bamv tat tangcna khou tei kaniw lungc the.

³²Tera katingkwm 205 tangcna Haran khou tei theiclou the.