Read Rongmei Naga THAUREYMEI 12 Bible Online

THAUREYMEI 12 - Rongmei Naga bible

THAUREYMEI 12

¹RINGHPOUC rui Abram khou sa the, “Nang kandic, nang riang nang luaic khatni nang pu kai ta ganclouna ai rui nang khou lyanlou pw nimei kandic thangc tat tho.

²Ai rui nang kikta tikingc nkiuclou puni the, kaniw tei zaatc daihmei sw puni the. Nang hei suaihiam sw diu khang ai rui nang ta suaihiamlou puni the khatni nang zanc tidaiclou puni the.

³Nang ta suaihiamloumei nunc ta tei ai rui ni suaihiamlou puni, nang ta siangloumei nunc ta tei ai rui ni sianglou puni, khatni nang paan rui kandihmei zaat, kaikhunh kaguayna ta ai rui suaihiamlou puni.”

⁴Abram katingkwm 75 tanghmei kwm, Ravguangc rui saloumei theilayna kamei Haran khou rui tatpat the; kumna Lot ni kathei lay tat khwan e.

⁵Abram rui kanow Sarai khatni kasuangc alaumei nac Lot ta nduanghna Haran khou rui lungc patmei kasyan kalanv, khatni katy kabangc guay ta phungcna Kanaan kandic nzwan khang tatpat the.

⁶Abram tei Kanaan kandic guang tangcna, Sekem ramv khou naimei More kawmei bamv khou thingbang daihmei khou tei guang tangh mak saanv Kanaan kandic tei tat ruan key the. Mi douc mi kandic khou tei Kanaanmei nunc lungc bam khwan e,

⁷RINGHPOUC kamei Abram khou guangna sa the, “Ai rui nangkik nangta khang tii punimei kandic kiu mi hei the.” Khoutei kakhou guangna lyanloumei RINGHPOUC ta kalum khang hei bamv khou tei Abram rui ravchabamv kasiamh the.

⁸Hei tangv tei kamei dihba biak thangc keyna Bethel kaidai tuang neihpat biak thangc naimei chyngramv khou zypui pheykai katinghlou the. Hei tei neihkey biak thangc Bethel khatni neihpat biak thangc Ai kaidai kaney kak khou e. Hei khou tei ni kamei rui ravchabamv kasiamh thauna RINGHPOUC ta kalum the.

⁹Hei tangv tei kamei rui kabamv kalaic kalaicna tatna Kanaan tuang dihba biak thangc tat key the.

¹⁰Kanaan kandic khou tei nap nkowmei guang khwan e. Kumna mi kandic khou tei nap nkowmei tei ranv langv tina Abram tei matat khat lungc khanvlou khang Izip khou key the.

¹¹Kamei Izip guang tangc zaic ni khou kamei rui kanow Sarai khou sa the, “Nang hei meiclwn meicchav gaymeipui e.

¹²Izipmei nunc rui nang ta how pwkhou nang hei anow e twna ning e thei kaniw rui ata swluai kan puni e, kumna nang rana ringc bam duc puni e.

¹³Nang hei atanpui de twna kaniw khou sa o; kum ti thei nang zaeng rui kaniw rui ata mpatlou puni khatni ata kungcna swlou puni e.”

¹⁴Abram tei Izip khou gut the kumna Sarai tei lwnchav gay e twmei Izipmei nunc rui how the.

¹⁵Guangh kai tuang meicdaihmei nunc rui kata how lana kamei kalwn kachav adih gay cho twmei guangh khou raclou tina kata guangh kai thangc nduangh tat kan the.

¹⁶Kumna kazaeng rui guangh rui Abram khang swchuyna swlouna kakhang lauziu khatni ziuh, kuanniam, guaikuan khatni banghpui banghpu mpeyna tii the.

¹⁷Guangh tei rui Sarai ta laa mei zaeng rui, RINGHPOUC rui kakhou akhatni guangh kai khou bammei nunc khou tei si sihmei ravpyan tiguang the.

¹⁸Kum tina guangh tei rui Abram ta kaw guangna sa the, “Nang rui akhou swlou bammei hei tabui tuang cho? Kamei hei nang now de twna tabui swna nang akhou sa mak tu cho?

¹⁹Tabui swna kata nang tanpui de twna sana ata tikaw bam tu cho? Nang now ta nduangh tat dat tho!”

²⁰Guangh rui kamei nunc khou latdanv tii tina kaniw rui Abram tei kanow ta nduanghna katuang puat guay phungcna tat dat kan khang thouc ganclou kan the.