Read Rongmei Naga THAUREYMEI 13 Bible Online

THAUREYMEI 13 - Rongmei Naga bible

THAUREYMEI 13

¹Abram Kanow ta nduanghna kapuat kachei kaguayna phungcna Izip khou rui Kanaan Negeb ramv khou ngangh dat the. Lot ni kathei lay tat bam khwan e.

²Abram tei lauziu, ziuh, guaih bangh, khatni daandi kachaekc mpeyna nai khwan e.

³Abram Negeb khou rui tat thau datna Bethel nganv ngangh the, thaurey khou Bethel lev Ai kaney kak khou zypui kai katinghloumei bamv

⁴khatni ravchabamv kasiamh thauna RINGHPOUC zanc saancna kalumrey kanmei bamv e.

⁵Lot ni katuang lauziu, ziuh, guaih bangh, kakai kaikhunc khatni kabangc nunc nai geic khwan e.

⁶Kumna kaney tuang kiruai guay tei geic langvna kataek mpacloumei bamv khang maek khe.

⁷Kumna Abram lev Lot tuang kiruai gaenghmei nunc tei agay the. (Mi douc tei Kanaanmei lev Perizimei mi kandic khou tei lungc bam khwan e.)

⁸Abram rui Lot khou sa the, “Kaikhunh akhat namei swna nang lev anei kak khou khatni nang tuang mei nunc lev amei nunc kak khou agi agay bam nuh mak ge.

⁹Kumhpui zaeng rui anei bam ntamv di kho. Nang rui kahaw hawmei ramv tei kapah do. Nang baanzat thangc tat kan e thei ai baandau thangc tat kan puni, nang baandau thangc tat kan e thei ai baanzat thangc tat kan puni.”

¹⁰Lot tei zauc kari-kariangna zauc pwki Jordan nzaengc kapwm, Zoar tanghmei nganvna RINGHPOUC tuang pikwan kumc, Izip kandic kumc dui gay the twmei how the. (Mi hei RINGHPOUC rui Sodom lev Gomora ta swmaan mak khou e.)

¹¹Kumna Lot rui Jordan nzaengc kapwm kakhang kapah the kumna mi neihpat biak thangc tei kamei tat kan the. Hei tei kumcna kaney lungc ntamv the.

¹²Abram rui Kanaan kandic khou bam duc the, Lot rui nzaengc khou kaidai pang naimei bamv khou Sodom daeng khou lungc the.

¹³Sodommei nunc tei meicgay makmei khatni RINGHPOUC hu khou paapc geicna taanc bammei nunc khwan e.

¹⁴Lot tat kanmei tangv, RINGHPOUC rui Abram khou sa e, “Nang bammei bamv khou tei rui dihpy dihba, neihpat neihkey zaucmincna zauc o.

¹⁵Nang rui howmei ramv guay hei nang khang khatni nang kikta khang tii puni, kumna mi hei tingsaengzaeng nangniw tuang sw puni the.

¹⁶Ai rui nang kikta ta tei kandih taniang thw zu tigeiclou puni the, kumna kandih taniang thw sing chak ngam lakmei kumc nang kikta sing chak ngam pu lak khe.

¹⁷Tatna ramv kapwmna tei zauc tho, mi kaguayna hei nang khang tii puni the.”

¹⁸Kumna Abram rui lunghbamv kalaicna Hebron ramv khou Mamre twna kawmeipu tuang mphauhbang ding daeng khou guang lungc the. Hei khou tei kamei rui RINGHPOUC ta kalum khang ravchabamv kasiamhlou the.