Read Rongmei Naga THAUREYMEI 15 Bible Online

THAUREYMEI 15 - Rongmei Naga bible

THAUREYMEI 15

¹Mi tangv tei ndawman khou Ravguangc rui Abram khou guangna sa the, “Abramle, ping riu. Ai hei nang ta gaekloumei nggih e, kumna nang khang swan daicna nai e.”

²Tiki Abram rui daw the, “He Daic liangmeipu Ravguangc, ai anac maek ki nang rui tii nimei swan kiu rui akhang tabui tuang gaeng punina cho? Atampy luak nimei kiu Damaskasmei Eliezar hei di the.

³Nang rui akhang nah tiilou mak ge kumna abangc gaanv khat rui atampy luak puni e.”

⁴Khoutei RINGHPOUC rui kumna kakhou sa guang dat re, “Nang bangc Eliezar rui nang tampy laa ni tuang hamh e; nang nac kahak rui nang tuang tampy laa puni de.”

⁵RINGHPOUC rui kata kaizaengc thangc nduangh patna sa the, “Tingpuk thangc zauc thauna gaanchuangcna ta kasing pacngam puni ny pac zauc o; nang tuang kikta hei tei kumc lungc pat puni.”

⁶Abram RINGHPOUC ta lwm e, kum tina RINGHPOUC rui kata ravchaptatmeipu twna chaklou the.

⁷Khoutei RINGHPOUC rui kakhou sa the, “Ai hei mi kandih hei nang khang tii khang nang ta Babilon tuang Ur khou rui nduangh patmei RINGHPOUC tei the.”

⁸“He Daic liangmeipu Ravguangc, mi hei atuang sw puni e twmei akumhna ai thay nina cho?” twna Abram rui thanv the.

⁹Ravguangc rui kakhou heikumna mundaw the, “Tingkwm kathumhmei guaituamnay akhat, ziuhkui akhat, lauziuchic akhat, akhouhna lev aphyna akhat akhat twna akhou laaguang tho.”

¹⁰Abram rui mi khouringc guay hei Ravguangc khou phungc guangna mi guay tei kapaek raekna kapaek tei baanzat baandau lamc suaklou the. Tiki nruayna ta tei thu kapaek raek mak ge.

¹¹Kumna moucphow nunc hei tei tu khang samc guangmei ta Abram rui alay gancna bam khwan e.

¹²Neihkey zaic ni khou Abram tei theihmei kumcna zip key the. Khoutei zingcmiuh miumei meicpingmei ramzing kakhou zingc guang the.

¹³Khoutei RINGHPOUC rui kakhou sa the, “Mi hei nang thay o twmei thu nang kikta nunc tei ginramc thangc gin swna lungc tat puni, hei khou tei kaniw bangh mbaih puni kumna tingkwm 400 rairiumei akhaengvna lungc puni.

¹⁴Tiki kaniw ta kaniw bangc tiswmei zaat ta kiuc ai rui dandi tii puni, kumna kaniw mi ginramdic tei ganclouna tat dat pwkhou kaniw lanv mpeyna phungc tat puni.

¹⁵Nang thu panty lungsingna lungc puni, nchu-nzaenghna theic puni khatni mbeihlou puni.

¹⁶Kaniw tei meickin padeihmei rui mi kandic khou hei guang dat puni. Kalam thu Amormei nunc tei heidikamv kha sina kaniw ta dandi tii biuh mak saanv ai rui kaniw ta tei alay ganc ni tuang hamh e.”

¹⁷Neih key kanmei tangv zingc guang pwkhou thay mak daekna maikhou katungh buih buimei mailai akhat lev maibwang chuangc bammei mairam patna khouringh paek mbaeng suaklou bammei kaney kak khou tei tatpat the.

¹⁸Mi khou tei RINGHPOUC rui Abram khou kumna latdyng swna sa the, “Izip tuang ramvrei khou rui Euphratis baek nganvmei khou naimei kandic twmei thu

¹⁹Kenmei ramv, Kenizmei ramv, Katmonmei ramv,

²⁰Hitimei, Perizimei, Rephaimmei,

²¹Amormei, Kanaanmei, Girgasmei, khatni Jebusimei tuang ramv guay hei nang kikta khang ai rui tii puni the.”