Read Rongmei Naga THAUREYMEI 16 Bible Online

THAUREYMEI 16 - Rongmei Naga bible

THAUREYMEI 16

¹Abram now Sarai kamei nah puanc mak khwan e. Izipmei luc kazanc Hagar twna kawmei kabangcpui akhat nai khwan e.

²Kumna neih khat kamei rui Abram khou sa the, “RINGHPOUC rui akhou nah tiilou mak khe. Abangcpui khou tei tatlou lamcbo cho? Ka khou rui akhang nah lungc guang nina khwang di the.” Sarai rui samei tei Abram rui nuhlou the.

³Kumna Sarai rui Hagar ta Abram now khang tii the. (Mi hei Abram kamei Kanaan khou tingkwm ruh lunghmei tangv patmei tuang the.)

⁴Abram rui Hagar khou tatlouna Hagar kapumc nrit the. Kamei kapumc nrit the twmei thay la khou kamei Sarai ta thouh sw mak thau the.

⁵Khoutei Sarai rui Abram khou sa the, “Hagar rui ata thouh sw mak bammei hei nang khuay de. Ai rui kata nang khou tiiloumei tuang e, tiki kamei kapumc nritmei tangv tei rui thauna kamei ata ramh sak mak khe. Nang lev anei kak khou Ravguangc rui latzan sw kan di tho.”

⁶Abram rui daw the, “Zauc lo, nang bangcpui ta thu nang nyng de cho; nang rui kakhou swlou niimei thak tei swlou rap tio.” Hei tangv tei Sarai rui Hagar ta sina sw langv tina kamei pak tat kan the.

⁷Shur chaeng khou naimei sypungramv khou duipuakkai bamv khou RINGHPOUC tuang baanchara rui Hagar ta ariwna

⁸kumna sa the, “Hagar, Sarai bangcpuile, tabui thangc rui tabui twn tat nina tat bam tu cho?” “Ai hei akaipeic Sarai khou rui pak tat bam tu the” twna kamei rui daw the.

⁹RINGHPOUC tuang baanchara tei rui sa dat re, “Kadaeng thangc guang datna kabangc sw dat ro.

¹⁰Meic gaanv khat na rui sini chak ngam lakmei zu nang kikta ai rui tikingckiuclou puni.

¹¹Nang nac nggaanvmei puanc puni, kumna nang rui kazanc Ismael twna kaw puni, kalam thu nang rui ryanrana kapmei khwan tei RINGHPOUC rui chulou the.

¹²Tiki nang nac tei nwmbangc kuanniam kumcna lungc puni; kamei rui meic kathuicna ta zauczih puni khatni meic kathuicna rui kata zauczih puni. Kamei kariang kaluaic guay khou rui ducna lungc puni.”

¹³Hagar rui kumna kakhanh e, “Ai hei Ravguangc ta howna kumna ringc bam dina cho?” Kumna kata kachucmei RINGHPOUC ta tei “Howmei Racguangc” twna kamei rui kaw the.

¹⁴Hei zaeng rui mi duikhunc ta tei “Beer Lahai Roi twna kaw the” hei tei ntaw nganvna Kades lev Beret kak khou nai bam e.

¹⁵Hagar rui Abram nac mpouh akhat puanclou the kumna Abram rui kazanc Ismael twna phuaklou the.

¹⁶Mi ganv khou tei Abram katingkwm 86 tangc the.