Read Rongmei Naga THAUREYMEI 21 Bible Online

THAUREYMEI 21 - Rongmei Naga bible

THAUREYMEI 21

¹RINGHPOUC kamei rui kalatdyng theilayna, Sara khou suaihiamlouna,

²Sara kapumc nritna Abraham kamei karapouc key pwkhou nggaanvmei nac gaanv khat puanclou the. Ravguangc rui dincloumei ganv khou mi nac tei puanc the.

³Abraham rui kazanc Isak twna phuaklou the.

⁴Isak tei zaeng tachat tangc pwkhou, Ravguangc tuang latdanv theilayna Abraham rui kagic ruamc the.

⁵Isak ta puanh khou tei Abraham katingkwm 100 tangc the.

⁶Sara rui sa the, “Ravguangc rui ata tineihlana tinuiclou the, khatni mi chamv hei chumei kathuic rui ai lev nuic nchamh puni the.”

⁷Kumna kamei rui sa dat re, “Sara rui kanac ta tinoucna lungc puni e twna thow rui Abraham khou sa punina cho? Tiki kamei karapouc key pwkhou akhou rui kanac mpouh akhat puanclou the.”

⁸Mi nac tei daicthau the, kumna kamei nouc taanmei nungc Abraham rui ngay raengc patna ngay the.

⁹Zaeng neihkhat Izipmeipui Hagar rui puanhmei Ismael tei Sara nac Isak kaney palup bam khwan e.

¹⁰Hei tei Sara rui how lana Abraham khou sa the, “Mi bangcpui lev kanac ta thouc ganc tho. Anac Isak rui laa nimei nang tuang lanv tei mipui nac khang hei nzanhlou nuh mak ge.”

¹¹Ismael hei ni kanac timei thu mi hei rui Abraham lung mpeyna tiryanra the.

¹²Tiki Ravguangc rui Abraham khou sa the, “Nang bangcpui Hagar lev mi nac khang tei nang lung ryanra riu. Sara rui samei tei taanclou tio, kalam thu ai rui nrianhloumei nang kikta tei Isak khou rui pat nina de.

¹³Banghpui nac khou hei ni kanac mpouh mpeyna tiilou puni, kaniw tei ni zaatc akhat sw puni. Kamei hei ni nang nac de.”

¹⁴Nthuanh thwanzingh Abraham rui Hagar khang taektw asaekc lev guaihgic khau khou dui liat padiklouna tiilou the. Kamei rui hei tei kabou khou goulouna thouc ganc kan the. Hagar tei tatpatna Beersheba tuang tazikramv khou ruan tat bam khwan the.

¹⁵Duikhau khou dui tei zangv ngam pwkhou kamei rui mi nac ta tei thingphwam bangc khou ganclouna

¹⁶sauhpai kaap tangc biuhmei saanv mi nac khou tei rui duhmei thangc dungcna kumna sa the, “Anac theic nimei ta ai zauc ngam lak ge.” khoutei dungcna kamei kap the.

¹⁷Mi nac tei kapmei khwan tei Ravguangc tingkauh thangc rui chu the kumna Ravguangc tuang baanchara rui Hagar khou sa the, “Nang khang tabui tuang ryanramei naina cho, Hagar? Ping riu. Mi nac tei rui kapmei khwan tei Ravguangc rui chu the.

¹⁸Thau tho, tatna mi nac ta tei puancthauna swmlou tho. Kakikta khou rui ai rui zaatc daihmei kasiamhlou puni the.”

¹⁹Khoutei Ravguangc rui kamik tiraklou the, kumna kamei duikhunc akhat how the. Kamei tat lana guaihgic khau tei zu padiklou the kumna mi nac ta tizangv the.

²⁰Ravguangc rui mi nac ta tei nkhavlouna kamei daicthau the. Kamei Paran tuang tazikramv khou lungcna luh pai sinmeipu sw the.

²¹Kapui rui kanow khang Izipmei luc ta phulou the.

²²Khoutei Abimelek katuang rihpy Phikol ta nduanghna Abraham khou guangna sa the, “Nang rui taanhmei kathuicna khou Ravguangc rui nkhavlou e.

²³Kumna nang rui ata, anac nunc ta, khatni akikta guay ta guat lak ge twmei latdyng Ravguangc hu khou swlou o. Ai nang ta kungcna bam e kumna nang rui ni ata khatni nang lungc bammei kandic ti hei kungcna sw ni twmei latdyng swlou o.”

²⁴Abraham rui sa the, “Ai latdyng sw the.”

²⁵Abimelek bangc nunc rui duikhunc asut kanmei lam khou Abraham rui Abimelek khou raclou the.

²⁶Abimelek rui sa the, “Mi kiu thow rui asut tu cho twmei ai thay mak ge. Nang mi lam khou hei akhou raclou zat mak ge cho, ai mi lam khou hei ntaw na rui chu tu de.”

²⁷Khoutei Abraham rui Abimelek khang lauziu khatni guaih tiina kaney tei latdyng sw the.

²⁸Abraham rui kalauziu pang khou rui lauziunac chanei gaengc langc pat the.

²⁹“Hei tei tabui khang cho?” twna Abimelek rui kakhou thanv the.

³⁰Abraham rui daw the, “Mi duikhunc hei ai rui khiucloumei tuang dyng e twmei lyanmei swna mi lauziunac chanei hei laalou o.”

³¹Mi bamv tei Beersheba twna kaw the, kalam thu mi bamv khou tei kaney gaanv nei latdyng sw the.

³²Kaney mi latdyng hei Beersheba khou swlou tangna, Abimelek lev Phikol tei Philistia thangc tat dat kan the.

³³Abraham rui Beersheba khou tamarisk bang lingclou the kumna tingsaeng Ravguangc, RINGHPOUC ta kalum the.

³⁴Abraham Philistia khou lungcsaengc sihlou khwan e.