Read Rongmei Naga THAUREYMEI 22 Bible Online

THAUREYMEI 22 - Rongmei Naga bible

THAUREYMEI 22

¹Mi tangv tei Ravguangc rui Abraham ta nchanv the. Ravguangc rui “Abraham!” twna kauc the. Abraham rui, “Ai khou hei bam e,” twna mundaw the.

²Ravguangc rui sa the, “Nang rui heidi nzianna bammei, akhat namei nang nac mpouh Isak ta nduanghna Moria ramv thangc tat tho. Hei khou tei chyngbut akhat khou ai rui kabamv dinclou puni, hei bamv khou kiu nang rui Isak ta rawna akhang kat tho.”

³Abraham tei tinggaanc pat pwkhou khaeng nimei thing khang thwanzingh riam thuanna, katuang kuanniam khou tiphungclouna Isak lev kabangc gaanv nei ta nduanghna Ravguangc rui dincloumei bamv thangc tei tat kan the.

⁴Zaeng neih thumhpui nungc Abraham rui mi bamv tei duh thangc rui phaengc how the.

⁵Khoutei Abraham rui kabangc nei khou tei “Nangney khou hei kuanniam ta zaucna bam khwan o. Nggaanvpu launa aney mi bamv thangc tei tatna rav kalum lana aney guang dat puni e” twna kadylou the.

⁶Abraham rui rawna khaeng nimei thingbanv tei Isak ta tipuanc the kumna kamei baengsic lev mai sin the. Kumna kaney luan tat bam khou tei,

⁷Isak rui “Apule!” twna kaw the. “How, tabui cho abungle!” twna kamei rui daw the. “Mai lev thing thu nai the tiki khaeng nimei lauziu thu tabui tei cho?” twna Isak rui thanv the.

⁸Abungle, “Ravguangc kamei kahak rui khaeng khang lauziu kiu tiilou puni de” twna Abraham rui daw the. Kumna kaney tei luan ngangh the.

⁹Ravguangc rui kakhou dincloumei bamv tei guang tangc pwkhou Abraham rui ravchabamv kasiamh thauna thing tei mi khou tei peiclou the. Kamei rui kanac ta tei karak lana thingkhwan ruc khou tei nzilou the.

¹⁰Kumna kanac ta tei chumluai khang katuang baengsic tei khuan thau the.

¹¹Khoutei RINGHPOUC tuang baanchara rui tingkauh thangc rui “Abraham, Abraham!” twna kauc key the. “Ai khou hei bam e” twna Abraham rui daw the.

¹²“Mi nac ruc khou tei nang baanc keylou riu, nang hei Ravguangc ta pingmeipu e twmei ntaw thu ai thay the. Nang hei Ravguangc khang rui nang nac mpouh akhat namei ta sini daek mak bu the,” twna kamei rui sa the.

¹³Abraham rui kathei ziangrih pat pwki lauziuchic akhat kachei luaihbou khou goulouna ding bam khwan the. Abraham rui hei tei nymna kanac phaan rawna khaeng the.

¹⁴Abraham rui mi bamv zanc tei “RINGHPOUC rui tiilou e” twna phuaklou the. “RINGHPOUC tuang chyng khou kamei rui tiilou e” twna meic nunc rui ntaw nganvna sa bam e.

¹⁵RINGHPOUC tuang baanchara rui kaneimei swna tingkauh thangc rui Abraham ta kawna sa the,

¹⁶“Azanc saancna ai rui nrianhlou e- RINGHPOUC rui sa e, ai rui nang khou suaihiam geicna tiilou puni, kalam thu nang rui nang nac mpouh akhat namei ta daek makna akhang mi hei taanclou the.

¹⁷Ai rui tingpuk khou naimei gaanchuangcna zu khatni duipui paengc khou naimei syniang zu nang kikta tigeiclou puni. Nang kikta rui kaniw ta zauczihmei guay ta ngam puni.

¹⁸Nang kikta khou rui kandihmei zaatc kaguayna ta suaihiamlou puni, kalam thu nang alat piu the.”

¹⁹Abraham tei kabangc nei bamv khou tei guang datna kamei bammei bamv Beersheba thangc tei guang dat the.

²⁰Kanakmei tangv, kakai nac Nahor now Milka ni kanac gaanv tachat puanclou the twmei Abraham chu the:

²¹nareimei rui Uz, mi tangv Buz, Aram pu Kemuel,

²²Kesed, Hazo, Pildas, Jidlap khatni Bethuel hei nunc hei e.

²³Bethuel hei Rebekka pu e. Mi Nahor nac gaanv tachat hei kanow Milka rui puanclou the.

²⁴Nahor laamvnow Reuma rui ni Teba, Gaham Tahas, khatni Maaka ta puanclou the.