Read Rongmei Naga THAUREYMEI 23 Bible Online

THAUREYMEI 23 - Rongmei Naga bible

THAUREYMEI 23

¹Sara tingkwm 127 ringclouna

²kamei Kanaan kandic khou Kiriatharba twna kawmei bamv khou theiclou the, kumna Abraham rui kakhang latluna huay the.

³Abraham rui kanow theihmei pumc nzilou bammei tei ganclouna Hittimei nunc khou tatna kumna sa the,

⁴“Ai hei nangniw pang khou gin swna lungc bammei tuang e; anow ta mbeihloumei bamv khang na ramv katitna zuanclou o.”

⁵Kaniw rui kumna daw the,

⁶“Nang hei aniw pang khou kaipouc daihmei akhat re; aniw khou naimei gay liangmei tarou khou tei nang now ta mbeihlou o. Kata ryloumei bamv khang meic kathuic rui tii nii puni de.”

⁷Khoutei Abraham rui kaniw hu khou nkhumkeyna kalumna

⁸kaniw khou sa the, “Ai rui anow ta mi khou hei mbeihlou khang nuh e thei Zohar nac Ephron ta

⁹katuang laupuk tin khou naimei Mekpela khowlang tei akhou zuanclou khang salou o. Hei tei tarou bamv khang na kamanv biuhmei nangniw mav khou rui akhang zuanclou khang salouna ro.”

¹⁰Mi kaidai tuang sanghbamv khou Hittimei nunc rui lat kaphianh bammei bamv khou tei Ephron ni kazauh bam khwan e. Kamei rui meic guayna mav khou kumna sa the,

¹¹“Akaipoucle, laupuk tei lev khowlang tei nang khang tiipat the. Nang now ta mbeihlou khang hei tei ai mathiuc hu khou hei nang khang tiipat the.”

¹²Abraham rui Hittimei nunc meic geihna mav khou nkhumkeyna

¹³Ephron khou kumna sa the, “Ai rui sa nimei lat hei nkinglou o, laupuk kapwm kiu ai liu ni the. Kamanv haamvlou tho, kumna khoutei ai anow ta mbeihlou ni the.”

¹⁴Ephron rui daw the,

¹⁵“Akaipoucle, mi ramv tei daandi paek 400 na manv de, anei kak khou hei tei ramhkhat sini hamh e. Nang now ta kiuc mbeihlou tho.”

¹⁶Abraham rui hei tei nuh the kumna Ephron rui meic guayna mav khou sa pat kanmei, lanvguanhmei nunc tuang tat bammei dath theilayna daandi paek 400 tei tiilou the.

¹⁷Mamre tuang neihpat khou naimei Ephron tuang ramv Makpela tei Abraham tuang sw the. Hei tei laupuk, mi khou tei naimei khowlang mi tuang ramvpuk khou naimei thingbang guay tei ni kazauh the.

¹⁸Heipui lat kaphianhmei bamv khou guang bammei Hittimei guay tei mi ramv tei Abraham tuang dyng the twmei thaylou the.

¹⁹Kumna Abraham rui kanow Sara ta Kanaan kandic khou mi khowlang khou tei mbeihlou the.

²⁰Kumna Hittimei tuang ramvpuk khatni mi khou naimei khowlang tei Abraham tuang theih mbeihmei bamv khang sw the.