Read Rongmei Naga THAUREYMEI 25 Bible Online

THAUREYMEI 25 - Rongmei Naga bible

THAUREYMEI 25

¹Abraham kanow baihmei akhat kazanc Ketura twmeipui ta kaw dat re.

²Mipui khoutei rui Zimran, Joksan, Medan, Midian, Isbak, khatni Sua ta puanclou dat re.

³Joksan hei Sheba lev Dedan pu e, khatni Dedan kikta rui Asurimmei, Letusimmei, khatni Leumimmei e.

⁴Midian nac nunc rui Epha, Epher, Hanok, Abida, khatni Elda e. Mi guay hei Ketura khou rui lungc guangmei nunc the.

⁵Abraham rui katuang naimei kapwm Isak khang ganclou duc the;

⁶tiki katuang laamvnow nac nunc khang kaipat tiilou the kumna kamei rui ringc bammei dak khou Isak daeng khou tilungh makna neihpat biak kandic thangc thouc ganclou khwan e.

⁷Abraham katingkwm 175 lungclou e,

⁸kamei tingkwm mpeyna lungclouna gaanvthaih sihna theic khwan e.

⁹Isak lev Ismael kanac nei rui Mamre tuang neihpat biak khou naimei Hittimeipu Zuar nac mpouh Ephron ramv khou Makpela tuang khowlang khou mbeihlou kan the.

¹⁰Mi ramv tei Abraham rui Hittimeipu khou rui liumei ramv e; Abraham lev Sara ta khou tei mbeihlou the.

¹¹Abraham theic tangmei tangv, Ravguangc rui Isak ta suaihiamlou khwan e. Isak tei Beer Lahai Roi daeng khou tei lungc bam khwan e.

¹²Mi hei Sara bangc Hagar, Izipmeipui rui puanhmei Ismael nac nunc, gaanvthaihmei khou rui alaucmei swna chak keymei lwan e:

¹³Ismael nac nunc zanc kiu mi hei e, Nebaiot, Kedar, Adbeel, Mibsam,

¹⁴Misma, Duma, Masa,

¹⁵Hadat, Tema, Jetur, Naphis, khatni Kedema.

¹⁶Kaniw hei Ismael nac mpouh nunc kaikhwang ruhna kanei the. Kumna kaniw zanc hei kaniw namv zanc khatni zypui bamv zanc swna phuaklou the.

¹⁷Ismael tingkwm 137 lungclouna theic the.

¹⁸Ismael kikta nunc hei Izip tuang neihpat khou, Asiria chaeng khou Havila lev Shur kak khou naimei ramv khou lungc the. Kamei kachana nunc lev diang makna lungc khwan the.

¹⁹Mi hei Abraham nac Isak tuang pary e.

²⁰Isak, kamei Mesopotamia thangcmei Aramianmei Laban tanpui Rebekka ta kanow kaw khou tei kamei tingkwm 40 tangc the.

²¹Rebekka tei ngana puanc timakna, Isak rui kanow khang RINGHPOUC khou huayneylou khwan e. Kamei rui huayneymei tei RINGHPOUC rui dawlouna Rebekka kapumc nrit the.

²²Kapui bunglungc khou bammei ngana gaanv nei tei anuay bam khwan e. “Tabui swna mi kumhmei hei akhou guanglou bam tu cho?” twna Rebekka rui kakhanh e. Kumna kamei rui RINGHPOUC khou thanv the.

²³RINGHPOUC rui kumna daw e: “Nang lungc khou hei zaatc kanei nai e, nang khou rui puanhmei zaatc kanei; tei ntamv puni the; gaanv khat tei gaanv khat khang tei suangc tanc puni the, gaanvthaihmeipu tei rui alaucmeipu siamruai sw puni the.”

²⁴Kamei tei nah bam pwkhou nggaanvmei nac gaanv nei puanc the.

²⁵Gaanvthaihmeipu tei haengh haengna kapumc kapwm tei kahiw thungh thungmei phey kumcna puancpat the, kum tina kazanc Esau twna phuaklou the.

²⁶Kaneimeipu tei Esau phaytyang zamcna pat the, kum tina kazanc Jakob twna phuaklou the. Mi nac nei tei puanhmei ganv khou Isak tingkwm 60 tangc the.

²⁷Mi nac nei tei daicthau the, kumna Esau tei suc-zouc mpac thaymeipu sw khwan e kumna kamei ramv thangc rana tatna lungc khwan e. Tiki Jakob hei thu khuimuih muina kai khou na bam khwan e.

²⁸Esau rui suc-zouc mpac guangna tugay zangvgaymei kapu khang kic bam tina kapu rui Esau ta kungc khwan e, tiki kapui thu Jakob ta kungc khwan e.

²⁹Zaeng neih khat Jakob rui ganhuai haenghmei gan suangc bam khou Esau tei ramhchaeng tatna guang dat khwan the. Kamei ndaapc lana kumna

³⁰Jakob khou sa e, “Ai ndaapc the; mi gan haenghmei tei akhang ni asaekc tii o.” (Kum tina kata Edom twna kaw the.)

³¹Jakob rui daw the, “Nang tuang gaanvthaihmei tuang dam tei akhang tii e thei mi hei nang khang tii puni.”

³²“Gay the, ai theic puni the; atuang dam tei rui akhang tabui gaeng tuang nai thena cho?” twna Esau rui daw the.

³³“Nang tuang dam tei akhang tii ni the twmei latdyng akhou swlou rey o” twna Jakob rui sa the. Esau rui latdyng swna katuang dam tei Jakob khang tii kan the.

³⁴Khoutei Jakob rui kakhang ntyan asaekc lev gan asaekc tei tii the. Kamei tuzangv tangv lana ding thauna tat kan the. Heikumna Esau rui katuang dam tei thouh sw mak khe.