Read Rongmei Naga THAUREYMEI 28 Bible Online

THAUREYMEI 28 - Rongmei Naga bible

THAUREYMEI 28

¹Isak rui Jakob ta kaw guangna kakhou suaihiamlouna kumna sa the, “Nang Kanaanmei luc ta kaw riu.

²Mesopotamia thangc nangpouc Bethuel kai thangc tatna nangpouc Laban nac aluh akhat ta kaw tho.

³Ngamparymei Ravguangc rui suaihiamlouna nang hei nangkik nangta kingckiuc diu khatni zaatc mpeyna tuang pu sw diu.

⁴Abraham ta suaihiamloumei kumcna kamei rui nang ta khatni nang kikta ta suaihiamlou diu, kumna ntaw nang nggin swna lungc bammei khatni Ravguangc rui Abraham khou tiilou kanmei mi kandic hei nang tuang sw diu!”

⁵Heikumna Isak rui Jakob ta thouc ganclou kan the. Kumna Jakob rui Bethuel nac mpouh Laban kapui chaicbungc daeng thangc tat kan the.

⁶Kapu Isak rui Jakob ta suaihiamlouna kanow phu khang Mesopotamia thangc thouclou kan the khatni Kanaanmei luc ta thu kaw nuh mak ge twna kadylou kanmei ta Esau rui thaylou khwan the.

⁷Jakob tei kapui kapu lat piuna Mesopotamia thangc tat kan the twmei Esau thay the.

⁸Kapu Isak rui Kanaanmei luc ta kahaw mak ge twmei Esau rui thay lana

⁹kamei Abraham nac mpouh Ismael daeng thangc tatna kanac aluhpui Mahalat twmeipui, Nebaiot tanpui ta kaw dat the.

¹⁰Jakob tei Beersheba ta mpatlouna Haran nzwanna tat kan the.

¹¹Neihkey pwkhou kamei kabamv akhat khou guang tangcna khou tei ziplou the. Ntauhbut akhat khou kapy mbanna kamei zipri tat the.

¹²Khoutei kamang thangc kailaak akhat kandih khou rui tingkauh phian tangclouna mi khou tei baanchara nunc key key ku kuna kalw bammei ta how the.

¹³Kailaak twan khou tei RINGHPOUC, ding bam khwan e. Kamei rui sa the, “Ai hei RINGHPOUC, nangpu nangpouc khatni Isak Racguangc e. Ai rui nang zip bammei kandic hei nang khang khatni nang tuang kikta khang tii puni.

¹⁴Kaniw tei kandih khou naimei taniang thw zu lungckingc kiuc pat puni. Kaniw ramv tei kakwn padeih daic pat puni, kumna nang khatni nang tuang kikta paan rui ai rui zaatc kaguayna ta suaihiamlou puni.

¹⁵Zauclo, nang tatloupui bamv kathuic khou ai rui nang ta lamluailou puni khatni gaeklou puni, kumna ai rui nang ta mi kandic khou hei nduangh guanglou dat puni. Ai rui nang khou nrianhloumei guay hei taanclou mak saanv ai rui nang ta mpatlou lak ge.”

¹⁶Jakob rui zip thauna kumna sa the, “Mi khou hei RINGHPOUC bam e! kamei mi bamv khou hei bam e twmei ai thay mak khwan e!”

¹⁷kamei ping the kumna sa the, “Mi hei adihkamv kha meic pingpui bamv cho! Mi hei Ravguangc kai kan di the; mi hei tingkauh raenghmun kan di the.”

¹⁸Jakob tei lauthwan thwanzingh zip thauna katuang pyban tauhbut tei laana kamei rui hei tei ningtow tauc swna lingclou the. Kamei rui mi khou tei Olive thauc liclouna hei tei Ravguangc khou kat gutlou the.

¹⁹Kamei rui mi bamv zanc tei Bethel twna kaw the. (Hei tei rey khou Luz twmei kaidai tei e.)

²⁰Khoutei Jakob rui RINGHPOUC khou latdyng akhat swlou the: “Ai rui tat bammei chaengkaamv khou hei nang rui lamluailouna ata gaeklou e thei khatni tuzangv khang khatni nsuay mbaanv khang tiilou pw e thei,

²¹ai gayna apu kai khou guang dat tangc e thei nang ta aRavguangc sw puni the.

²²Mi ningtow tauc lingcloumei bamv hei nang ta kalummei bamv sw puni the, kumna nang rui akhang tiiloumei kapwm tuang kadam ruh tuang akhat tei nang khang tii puni the.”