Read Rongmei Naga THAUREYMEI 29 Bible Online

THAUREYMEI 29 - Rongmei Naga bible

THAUREYMEI 29

¹Jakob kachaenglwan tei tat keyna neihpat kandic guang tangc the.

²Kamei rui zauc pat pwki kadaeng khou lauziu pang kathumh rui zip nkuay bammei duikhunc akhat ramvpuk khou how the. Mi duikhunc khou tei rui lauziu pang tei zangv bam khwan e. Hei tei ntauhpaek daihmei rui gum binlou khwan e.

³Lauziu pang guay tei guang kariu pwkhou, lauziu gaenghmei nunc tei rui ntauhpaek tei kalat patna dui tizangv tang e thei natauhpaek tei rui kalat thingclou dat rap rap bam khwan e.

⁴“Champanv nuncle, nangniw tabui thangc rui guangmei nunc cho?” twna Jakob rui lauziu gaenghmei nunc khou tei thanv the. “Haran thangc rui e,” twna kaniw rui daw the.

⁵“Nahor nac Laban ta nangniw thay bw cho?” twna kamei rui thanv the. “Ngguay, aniw thay e” twna kaniw rui daw the.

⁶“Kamei gayna bam dai cho?” twna kamei rui thanv the. “Kamei gayna bam de, kanacpui Rachel kalauziu pang ta gaengcna guang pu the” twna kaniw rui daw the.

⁷Jakob rui sa the, “Ntaw neih kauh di he, lauziu gaengc guangmei ganv tangh mak ge, dui tizangvna kataek titu tat dat lam bw cho?”

⁸“Lauziu pang guay guang kaduai pwkhou ntauhpaek hei kalatc patna dui tizangv nina de,” twna kaniw rui daw the.

⁹Kumna Jakob rui kaniw ta kachuc bam khou, Rachel kapu tuang lauziu pang gaengcna guang tangc the. Kalam thu kamei lauziu gaenghmeipui e.

¹⁰Jakob rui Rachel ta khatni kapui puningc Laban tuang lauziu pang tei how pwkhou kamei rui duikhunc gumloumei ntauhpaek tei kalat patna lauziu pang ta tizangv the.

¹¹Kamei rui Rachel ta kaputna kap the.

¹²“Ai hei nang pu tanpui Rebekka nac e,” twna kamei rui sa the. Khoutei Rachel tei pak tatna hei tei kapu khou poulou the.

¹³Laban tei katanpui nac Jakob chamv tei chu pwkhou, kamei kata ariw khang pak guangna kata pamc lana kaput the, kumna kakai thangc nduangh guang the. Pat kanmei rwanry guay tei Jakob rui Laban khou raclou pwkhou

¹⁴“Ngguay, nang hei azei di the azanc di the” twna Laban rui sa the. Jakob mi khou tei bw akhat bamlou the.

¹⁵“Nang ariang aluaic the tiki akhang nsa changh thu taanclou nangh e. Nang kaphy kadam azu dou sih laa nii cho?” twna Laban rui Jakob khou thanv the.

¹⁶Laban nac aluh gaanv nei nai khwan e; gaanvthaihmeipui zanc rui Lea, khatni alaucmeipui zanc rui Rachel twna kaw e.

¹⁷Lea tei kamik paan key khwan e, tiki Rachel thu kalwn kachav gay e khatni kapumclwan nthuih e.

¹⁸Jakob rui Rachel ta nzian the, kumna kamei rui sa the, “Nang nacpui alaucmei Rachel ta akhang tii ni tw e thei ai tingkwm chanei nang taanv taanclou ni the.”

¹⁹“Meic baihmei khang tiimei suangc thu ai kata nang khang tii ni de; adaeng khou lungc bam tho,” twna Laban rui daw the,

²⁰Kumna Jakob rui tingkwm chanei siamruai sw the tiki Rachel ta nzian tipui zaeng rui mi ganv tei zaeng katit na kumc the.

²¹“Kaganv luai the; nang nacpui ta kiuc ai kaw kan ni the,” twna Jakob rui Laban khou sa the.

²²Laban rui meic guayna ta kaw lana nowsuanh ngai ngay the.

²³Tiki mi nungc zingbangc tei, Rachel ta hamhna Lea ta Jakob khang tii the. Kumna Jakob rui kakhou tatlou the.

²⁴(Laban rui kabangcpui Zilpa ta kanacpui Lea bangcpui khang tii the.)

²⁵Tinggaanc pat pwki hei tei Lea bam khwan the, kum tina Jakob rui Laban khou sa the, “Nang rui akhou swlou bammei hei tabui tuang cho? Ai Rachel khang rui now-mangh bam tu hamhna cho? Tabui swna nang ata guat bam tu cho?”

²⁶Laban rui daw the, “Gaanvthaihmei mih mak khou alaucmei mic rey khang thu mi kandic riak rui nuh makna the.

²⁷Nang rui akhang tingkwm chanei taanvtaanclou dat ni tw e thei mi now suanh ngay zaeng chanei hei luai kan e thei Rachel ta kiu ni tii dat puni de.”

²⁸Hei tei Jakob nuh the, kumna mi now suanc ngai tei luai pwkhou, Laban rui Rachel ta Jakob now khang tii dat the.

²⁹(Laban rui kabangcpui Bilha ta Rachel bangc khang tii the.)

³⁰Jakob rui Rachel khou ni tatlou the, kumna kamei rui Rachel ta Lea ta suangc nzian mbu the. Kumna kamei Laban taanv tingkwm chanei taanclou dat the.

³¹Rachel ta suangc Lea ta nzian rau the twmei RINGHPOUC rui thayna kamei rui Lea nacbamv laanclou the, kumna Rachel tei nakamcpeic sw the.

³²Lea tei kapumc nritna nah mpouh akhat puanc the. “RINGHPOUC rui aram ryanra thaylou the, ntaw thu agaanv rui ata nzian dat pwng di the” twna kamei sana mi nac zanc tei Reuben twna phuaklou the.

³³Kamei kapumc nrit datna nah mpouh akhat puanc dat the. “RINGHPOUC rui mi nac mpouh hei ni tiguang the, kalam thu ata nzian mak ge twmei kamei how lana the,” twna kamei rui sana mi nac zanc tei Simeon twna phuaklou the.

³⁴Kapumc nrit datna nah mpouh akhat ni puanc dat re. “Ntaw thu agaanv hei akhou phaytaan baanhguayna bam pwng di the, kalam thu ai rui kanac mpouh gaanv thumh puanclou the”; twna kamei rui sana kazanc Levi twna phuaklou the.

³⁵Mi tangv tei kamei kapumc nrit datna nah mpouh akhat puanc dat the. “Ntaw thu ai RINGHPOUC ta thuancku the,” twna kamei rui sana mi nac zanc tei Juda twna phuaklou the. Mi tangv tei kamei nac puanc taan kan the.