Read Rongmei Naga THAUREYMEI 3 Bible Online

THAUREYMEI 3 - Rongmei Naga bible

THAUREYMEI 3

¹RINGHPOUC Ravguangc rui damcloumei pang khou nrui hei karouh si liang e. Nrui tei rui ntumei khou tei thanv e, “Pikwan khou naimei tabui bui thai pwni tu nuh mak ge twna Ravguangc rui saloumei tuang nai changhna cho?”

²Ntumei tei rui nrui khou tei daw the, “Pikwan khou naimei thingbang katana thai tu nuh de;

³tiki pikwan kachung khou nai bammei thingbang thai tei thu tu nuh mak ge, kahi sini kahi nuh mak ge; tu rap e thei aney theic puni the, twna Ravguangc rui aney khou kadylou the.”

⁴Nrui tei rui daw the, “Kiuc hamh e; nangney khat sini theic ni tuang hamh e.

⁵Nangney hei tei tu e thei nangney Ravguangc kumc puni the twmei Ravguangc kamei thayna hei tei samei tuang e.”

⁶Kumna mipui tei rui mi thingbang tei adih howgay cho khatni mi thai tei adih tugay ni cho twna zauclou the, khatni ningting pat re thei adih gay ni cho twmei kamei kakhanh the. Kumna kamei rui mi thai tei laana tu the. Kamei rui kagaanv khang ni tii tina kamei ni tu the.

⁷Khoutei kaney mik rak pat the,Kaney gaanvnei tei paliuc the twmei kaney thay the; kumna tadutnuy hui kariu lana nsuay the.

⁸Mi nungc tingzyn nchu nripui ganv khou RINGHPOUC Ravguangc pikwan khou tei tat bammei khwan chu lana kaney thingbang ding khou dup the.

⁹Tiki RINGHPOUC Ravguangc rui maanseipu ta tei kaucna “Nang tabui thangc bam tu cho” twna sa the.

¹⁰Kamei rui sa the, “Pikwan khou tei ai nang khwan chu the; kumna ai nang ta pingna nkamh the. Kalam thu ai paliuc the.”

¹¹“Nang paliuc e twmei thow rui nang khou salou pwna cho? Ai rui nang ta tu riu twna kadyloumei tingthai tei nang tu lana cho?” twna Ravguangc rui sa the.

¹²“Ai lev bam nchamc khang nang rui tiiloumei ntumei tei rui mi tingthai tei tii pwna ai tu the” twna mipu tei rui daw the.

¹³“Tabui swna nang heikumna sw bam tu cho?” twna RINGHPOUC Ravguangc rui ntumei khou tei sa the. “Nrui rui ata duaih pwna ai tu tina the,” twna ntumei tei rui daw the.

¹⁴Khoutei RINGHPOUC Ravguangc rui nrui khou tei sa the, “Mi zaeng rui nang ta dandi tii puni the; khouringh kaguayna pang khou rui nang mi syang hei phungc nina the: ntaw khou rui thauna nang bung rui tuicna tat puni the, khatni ringh saanv nang taniang tuna lungc puni the.

¹⁵Ai rui ntumei lev nangney ta tihowmulou puni the; kakikta khatni nang kikta hei howthou tanh tan bam puni the. Kakikta rui nang py swpiak puni the, kumna nang rui kaphaychwm khou nchow puni the.”

¹⁶Kamei rui ntumei khou tei sa the, “Nang pumc nrit pwkhou nang ramrianra ai rui ti-mbu nlailou puni the khatni ryanrana nah puanc puni the. Kum bam sini nang gaanv ta kahawna lungc puni, kumna nang kabangc khou bam puni.”

¹⁷Kamei rui nggaanvmei khou tei sa the, “Nang now lat chuna ai rui tu riu twna kadyloumei thai tei nang tu the. Hei zaeng rui kandih hei nang zaeng rui syang phungc puni the. Nang panty saanvsaengh nang bung khang ryanrana taancna lungc puni the.

¹⁸Nang khang kandih khou sauh bang puc bang thau padik puni the, nang nwmbangc thingnuy paannu tu puni the.

¹⁹Nang ta kasiamhloumei taniang khou nang hanc gut dat mak saanv nang tuang talanvdui manv rui nang tu puni the. Kalam thu nang hei taniang e, nang taniang khou hanc gut dat nina e.”

²⁰Adam rui kanow ta Evi twna kaw the, kalam thu kamei hei maansei katana pui e.

²¹Kumna RINGHPOUC Ravguangc rui ramhgic phey Adam lev kanow khang kasiamhna kaney khang piulou the.

²²Khoutei RINGHPOUC Ravguangc rui sa the, “Ntaw thu maansei hei aniu kumc the kumna simei gaymei thaymei ningting kaney khou nai the. Kum thena ringhmei thingbang thai tei reituna tingsaengzaeng ringc bam kan khang nuh the.”

²³Hei zaeng rui RINGHPOUC Ravguangc rui kaney ta Eden pikwan khou rui nthau patna kata damcloumei taniang khou tei kailau titaanc kan the.

²⁴Mi ringhmei thingbang daeng khou tei meic gaanv khat na sini guang mak khang mi pikwan tuang neihpat biak thangc kerubim nunc lou the khatni kazat kathuic kahai nuhmei maibwang baengsaeng rui mi ringhmei thingbang chaeng tei rigaanvlou the.