Read Rongmei Naga THAUREYMEI 31 Bible Online

THAUREYMEI 31 - Rongmei Naga bible

THAUREYMEI 31

¹“Apu tuang guay Jakob rui laa ngam kan the. Katuang lanv heizumei hei apu tuang de,” twna Laban nac nunc rui sa bammei ta Jakob chu the.

²Laban ni rey khou kumcna kata kachwn keylou mak ge twmei Jakob how pat the.

³Hei khou tei RINGHPOUC rui Jakob khou sa the, “Nangpu nangpouc kandic khatni nang riang nang luaic thangc tat dat tho. Ai rui nang ta zaylou puni.”

⁴Lauziu pang gaengc tat bammei ramvpuk khou tei kata guang ariw khang Rachel lev Lea ta kawlou the,

⁵kumna kaney khou sa the, “Nangpu hei ata reynungc kumcna kachwn keylou mak khe; tiki apu tuang Racguangc rui thu ata mpatlou mak ge.

⁶Apumtan guay tiipatna nang pu khang ai taanclou the twmei nangney rui thay the.

⁷Kum bam tisini kamei rui ata guatna ataanvphy kalaic liang ruh tangc the. Tiki Ravguangc paan rui apumc ta changh thu sw kasiclou mak ge.

⁸‘Tarik-tarouhmei ziuc tei nang khang e,’ twna Laban rui salou pwkhou tarik-tarouhmei rana puanc pat the. Kamei rui ‘nraengmei guay tei nang tuang e’ twna salou pwkhou lauziu pang tei nraengmei rana puanc pat the.

⁹Ravguangc rui khouringh pang tei nang pu khou rui laana akhang tii the.

¹⁰“Lauziu pang tei ganhmei ganv khou ai mang akhat manv khwan e, kumna ganc bammei kachic guay tei tarik-tarouhmei khatni nraengmei rana khwan the.

¹¹Amang thangc Ravguangc tuang baanchara rui ‘Jakob’ twna azanc kawna ai rui daw ti khou,

¹²‘Zauc lo,’ ganc bammei kachic guay tei tarik-tarouhmei khatni nraengmei rana the. Mi hei ai rui swloumei tuang the, kalam thu Laban rui nang khou swlou bammei guayna tei ai how the.

¹³Ai hei nang rui Olive thauc bunlouna ningtow tauc kat gutmei khatni nang rui akhou latdyng swloumei bamv Bethel khou nang khou lyanloumei Racguangc tei e. Ntaw thu nang ta puanhmei kandic thangc tei tat dat khang chamdaanv tho.”

¹⁴Rachel lev Lea rui sa daw the, “Aney pu khou rui ramh laa dat nimei tuang maek khe.

¹⁵Kamei rui aney ta meic baihmei ta kumc swlou the. Kamei rui aney ta zuanc the, aney manv guay ta ni kamei rui sin ngam kan the.

¹⁶Ravguangc rui aney pu khou rui laa tat kanmei lanv guay tei aney tuang de khatni aney nac nunc tuang de. Ravguangc rui nang khou sa samei kiu taanc rap tho.”

¹⁷Kumna Jakob tei kanow khatni kanac nunc ta guaikuan nunc nam khou tiphungclouna,

¹⁸katuang khouringc guay khatni lanv guay Mesopotamia khou rui lungc patmei heizumei guay tei kapu Isak bammei Kanaan kandic thangc ti tat hulou the.

¹⁹Laban tei kalauziu hiw tiap khang tat kanmei dak khou, Rachel rui kapu tuang tampy ravmaengc nunc ta houc the.

²⁰Jakob ni kamei tat kan ni the twmei dinclou makna Laban ta nkamhna tat the.

²¹Katuang naimei kapwmna phungcna kamei katumcna tat kan the. Kamei Euphratis duithuak kaan lana Gilead tuang chyngramv nzwanna tat kan the.

²²Jakob pak kan the twmei zaeng neih thumh tangv Laban khou dinclou the.

²³Laban rui kamei nunc ta nduanghna zaeng chanei nthau tatmei tangv Gilead tuang chyngramv khou Jakob ta lay tangc the.

²⁴Mi nungc zingbangc tei Ravguangc rui Aramianmei Laban mang khou guangna, “Nang Jakob ta tabui bui pwni kapin la riu,” twna salou the.

²⁵Jakob rui Gilead tuang chingcramv khou zypui kai katinghlouna bammei bamv khou tei Laban lay tangh the. Laban ni kakaimei nunc lev twna mi bamv khou tei zypui kai katinghlou the.

²⁶Laban rui Jakob khou sa the, “Nang tabui swna ata guat bam tu cho khatni rih nymmei kumcna tabui swna anac nei ta nduangh tat kan tu cho?

²⁷Tabui swna ata guatna, nkamhna tat tu cho? Nang rui akhou dinclou bam khwan e thei nkhuangh nrah sinna lu suanna neihlana suanclou ni tuang e.

²⁸Nang rui atou nunc ta ni tikaputlou nangh mak khe, anac nei khou ni kady kanavloumei lat ni tisalou mak khe. Mi hei mbamei taanv de cho!

²⁹Ai nang ta sw kasiclou khang ngam de, tiki zingbangc tei nangpu tuang Racguangc rui guangna nang ta kapin mak khang salou the.

³⁰Nang nangpu kai thangc tat zaic nii lana tat tu the twmei ai thay the, tiki tabui swna akai tampyrav maengc nunc thu houc tat tu cho?”

³¹Jakob rui daw the, “Nang nac nei ta asut dat kan pwng e twmei ai pingna the.

³²Aniw mei pang khou nang kai tuang tampy ravmaengc nunc kiu phu pat patmei ta tei thu swluai rap puni. Akai mei guay hu khou, nang tuang aniw khou naimei guay kiu phuna laa tho.” Laban tuang tampy ravmaengc nunc tei Rachel rui houc the twmei Jakob thay mak khwan e.

³³Laban rui Jakob tuang pheykai khou phu the; hei tangv Lea tuang pheykai khou khatni banghpui nei tuang pheykai khou phu the, tiki kamei rui tampy ravmaengc nunc tei phutow mak khe. Mi tangv Rachel tuang pheykai khou gut the.

³⁴Rachel rui tampyrav maengc nunc tei laa lana guaikuan khou loumei bamv bangc khou rylouna dungc bin bam khwan the. Laban rui pheykai lungc kapwm tei phu the, tiki hei tei phutow mak khe. “Lunghpuamhlou rio apule, ai nang hu khou ding thau ngam mak khe;

³⁵ai bw chaeng tat bamna the,” twna Rachel rui sa the. Kumna Laban rui phu the, tiki kakai tuang tampyrav maengc nunc tei phutow mak khe.

³⁶Khoutei Jakob kalungpuamc the, “Ai rui tabui tuang nkhuailoumei tuang nai thena cho?” twna kamei rui kalungpuamcna sa the. “Nang rui ata heidi lungpuamcna nthau tat bam khang ai rui tabui taanc maanvloumei tuang nai thena cho?

³⁷Ntaw nang atuang puat kaguayna khou phu the, nang kai tuang puat kiu tabui tei phutow thena cho? Nang kaimei khatni akaimei kaguayna hu khou hei mi kiu laa pat tho, thow rui nchumh cho kaniw zauc kan di tho.

³⁸Ai nang daeng khou tingkwm 20 bamlou the; nang tuang lauziu khatni ziuh kingckiuc pat kan the, ai nang tuang lauziuchic akhat na sini dow tuloumei tuang maek ge.

³⁹Khouringh rui lauziu ta swmaan tuang nai pu sini, maan kanmei khang tei ai rui khangclou dat bammei tuang de. Maan kanmei tei ai rui hamh e twna charumc tei khuaicna ai nang khou guang lyan bam mak ge cho. Zingbangc houc kanmei ni, kalaanv houc kanmei ni ai khangc dat bam de cho.

⁴⁰Ai kaganv geih khou kalaanv neih ndaengna khatni zingbangc tingsik akhaengvna taanclou kan tu e. Ai zip sui zip mangna sini zip mak ge.

⁴¹Kumna ai nang daeng khou tingkwm 20 bamloumei tuang e. Tingkwm 14 ai nang nac aluh nei khang khatni tingkwm charuk rui nang khouringc khang ai taanclou the. Kum sini nang rui atuang taanvphy kalaic liang ruh lou the.

⁴²Apu apouc tuang Racguangc, Abraham khatni Isak tuang Racguangc rui tiilou mak ge thei, nang rui thu ata pumtang mpatlou dat kan punimei tuang de. Aram ryanra khatni ai rui taanclou kanmei taanv tei Ravguangc rui how louna zingbangc tei kamei rui nang ta luhloumei tuang the.”

⁴³Laban rui Jakob khou daw the, “Mi aluh nei hei anac aluh nei e; kaney nac nunc hei atuang e, mi khouringh pang hei atuang e. Kaling thu, khou hei nang how bammei kapwmna hei atuang de. Tiki anac aluh nei hei lev atou nunc ta adaeng khou lou dat bam ngam makmei thu,

⁴⁴nang lev anei kak khou latdyng akhat sw di kho. Anei latdyng tei ningtow bam khang tausuam akhat suamc di kho.”

⁴⁵Kumna Jakob rui ntauh akhat laana hei tei suamc thaulou the.

⁴⁶Jakob rui kamei nunc ta ntauh tikhuaic guangna taukhuan khuan the. Mi taukhuan daeng khou tei kaniw napkuak puanctu nchamc the.

⁴⁷Mi ta tei Laban rui Jegar Sahadutha, khatni Jakob rui Galeed twna kaw the.

⁴⁸“Mi tausuam hei rui anei ta tiningtow bam khang the,” twna Laban rui Jakob khou sa the. Kumtina mi bamv zanc tei Galeed twna phuakloumei tuang the.

⁴⁹“Anei khat khat ta ntamv bam sini RINGHPOUC rui anei ta zauc bam diu o,” twna Laban rui sa the. Kum tina mi bamv zanc tei Mizpa twna ni kaw the.

⁵⁰Laban rui sa dat re, “Nang rui anac aluh nei ti hei sina sw pwkhou hamh e thei nang rui ntumei baihmei ta kaw dat pwkhou, hei tei ai thay mak sini, Ravguangc rui anei ta zauc bam e twmei nang ningtow o.

⁵¹Laban rui Jakob khou sa dat re ai rui anei kak khou suamcloumei tausuam kiu mi hei the, mi hei ningtow bam nimei tauc the.

⁵²Mi tausuam lev taukhuan hei rui tiningtow dat dat bam khang e. Ai rui mi taukhuan hei tat twanna nang ta adow lak ge, khatni nang ni mi taukhuan hei tat twanna ata adow lak nina e.

⁵³Abraham Ravguangc khatni Nahor Racguangc khatni kaniw pupouc Ravguangc rui anei kak khou latzan swlou diu o.” Khoutei, mi latdyng tei ngaek khang Jakob tei kapu Isak rui kalummei Racguangc zanc khou rui ntipmei latdyng sw the.

⁵⁴Jakob rui chyngbut ruc khou tei Ravguangc khang khaeng the kumna kakai kaikhunhmei guay ta kaw lana tu nchamc zangv nchamclou the; khatni kaniw tuzangvna zingbangc saanvsaengh chyngbut khou tei bamlou the.

⁵⁵Laban tei lauthwan thwanzingh thauna katou nunc khatni kanac aluh nei ta kaputna kaniw ta suaihiamlou the. Kumna kamei kai hanc dat kan the.