Read Rongmei Naga THAUREYMEI 32 Bible Online

THAUREYMEI 32 - Rongmei Naga bible

THAUREYMEI 32

¹Jakob chaeng khou tat bam khou, Ravguangc tuang baanchara nunc rui kata ariw the.

²Jakob rui baanchara nunc ta how lana, “Mi hei Ravguangc bampui bamv de!” twna kamei rui sa the. Kumna kamei rui mi bamv ta tei Mahanaim twna kaw the.

³Jakob rui Edom kandic Seir ramv thangc bammei kachaic Esau khou latdiumei gaanvsaekc thouclou rey kan the.

⁴Heikumna sa khang kaniw khou kadylou the: “Nang bangc Jakob, ai rui kumna sa bu e, Ai Laban daeng khou lungc khanvlouna aseic na rui guang dat tuang the.

⁵Atuang guaic pang, kuanniam pang, lauziu pang, ziuh pang, khatni bangh nunc nai the. Nang rui zauc nzianloumei ta kahawna chamv hei phungc guang tuang the.”

⁶Latdiumei nunc tei Jakob daeng khou guang datna “Aniw nang chaic Esau daeng tat tangc the, kumna kamei meic 400 ta nduanghna nang ta ariw khang chaeng khou tat bam duc kan the,” twna salou the.

⁷Jakob tei ping the khatni kalung ryanra the. Kamei rui nduangh tat bammei nunc khatni kalauziu pang, ziuh pang, guaih pang, khatni guaikuan pang tei kalangv kanei khang tii pat the.

⁸“Esau rui guangna reymei kang ta adow e thei, baihmei kang tei pak duak khang the,” twna kamei kakhanh khwan the.

⁹Khoutei Jakob rui kumna huayney the, “He apouc Abraham Racguangc, apu Isak Racguangc, ai neymei hei chulou o! He RINGHPOUC, nang akhou akandic thangc khatni ariang aluaic bamv thangc tat dat tho, kumna ramh lam kaguayna khou nang rui zauclou puni twna akhou salou the.

¹⁰Nang bangc ata nang rui nzianloumei khatni akhang saloumei guay tei taanclou bammei hei ai thu biuh mak dyng e. Ai abuilwang na hamhna ramhkhat sini phungc makna Jordan duithuak kaanna tat khwan e, ntaw thu mi kang kanei hei nduanghna guang dat the.

¹¹Achaic Esau khou rui ata kanlou khang ai huayney e. Kamei guangna aniw kaguayna ta, ntu-pangna ta nganvna swmaan ngamlou pw khang ai ping the.

¹²Ai rui nang khang gayna swlou puni, geic langvna chak dat thay lakmei duipui syniang zu nang kikta tikingckiuclou puni twna nang rui nrianhloumei latdyng tei amuclou rio.”

¹³Kamei mi nungc zingbangc tei mi bamv khou tei bamlou the, kamei rui kakhou naimei khouringh khounah pang khou rui kachaic Esau khang kaipat tii khang

¹⁴Ziuhkui 200, kachic 20, lauziukui 200 khatni lauziuchic 20,

¹⁵guaikuan kanoudui sunhmeikui kanac kazauhna 30, kuanniamkui 20 khatni kachic ruh kapah the.

¹⁶Mi guay tei kakang kakang swna khaic patlouna kakang akhat akhat khou tei kabangc gaanv khat gaanv khat lou the. “Nangniw tat hu tho, khouringh pang kakak naina tat ro twna kamei rui kaniw khou sa the.”

¹⁷Hu liangmei bangcpu khou tei kamei rui sa the, “Achaic Esau rui ariwna, ‘Nang kaipouc thow cho? Nang tabui thangc tat nina cho? Nang hu khou gaengc tat bammei khouringc nunc hei thow tuang cho?’ twna thanv pw e thei

¹⁸‘mi hei nang bangc Jakob tuang e. Kamei rui mi hei kakaipouc Esau khang kaipat swna tii guangmei tuang e. Jakob kamei kahak nthei khou tat bam e’ twna sa o twna Jakob rui sa the.”

¹⁹Kamei mi lat hei kaneimei, kathumhmei khatni khouringh kang guay sinmei kathuicna khou tei kadylou the: “Nangniw Esau ta ariw pwkhou kumna sa tho.

²⁰‘Ngguay, nang bangc Jakob tei aniw thei khou na tat bam the’ twna nangniw sa nina the.” Kalam thu Jakob tei kumna kakhanh the, “Mi thouclou reymei kaipat hei rui ai kata swm khang di the, mi tangv rui kata ariw ni the, kum e thei kamei ata laalou kho ni nuh e.”

²¹Kamei rui kaipat tei thouclou reyna mi nungc zingbangc tei kamei thu mi khou tei ziplou dat the.

²²Mi nungc zingbangc kahak tei Jakob tei thauna, kanow nei lev kabangcpui nei khatni kanac gaanv 11 ta Jabbok duithuak paengc thangc thouc pat kan the.

²³Kaniw ta thouc patmei tangv, katuang puat kaguay tei ni tiphungc pat kan the,

²⁴karana bam duc the. Khoutei meic gaanv khat guangna tinggaanh mak saanv kata anuay the.

²⁵Mipu tei kamei anuay ngam ni tuang hamh the twmei thay lana, kamei rui Jakob ta kakhii khou kahi the, kumna kalingpeic tiphatlou the.

²⁶“Tinggaanc pat the, ata mpatlou tho,” twna mi pu tei rui sa the. “Nang rui suaihiamlou mak saanv ai mpat lak ge,” twna Jakob rui daw the.

²⁷“Nang zanc tabui cho?” twna mi pu tei rui thanv e. “Jakob e” twna kamei rui daw the.

²⁸“Nang zanc hei Jakob tu dat lak khe. Nang Ravguangc ta ni maansei ta ni athwng the, kumna nang rui ngam the; hei zaeng rui nang zanc Isarael twpuni the,” twna mi pu tei rui sa the.

²⁹“Nang zanc akhou dinclou o,” twna Jakob rui sa tina, “Tabui khang nang azanc thay niina cho?” twna kamei rui daw the. Hei tangv kamei rui Jakob khou suaihiamlou the.

³⁰“Ai Ravguangc ta zaw lev zaw puanc adyangna how the. Kum sini ai ringc bam de,” twna Jakob rui sana; kamei rui mi bamv zanc tei Peniel twna phuaklou the.

³¹Jakob Peniel khou rui tatpat khou tei neih pat the, kalingpeic phatmei tei rui kamei kasai the.

³²Ntaw nganvna Isaraelmei kalingpeic ryan khou zanctei tu mak ge, kalam thu Jakob ta mi bamv khou tei kahilou the.