Read Rongmei Naga THAUREYMEI 33 Bible Online

THAUREYMEI 33 - Rongmei Naga bible

THAUREYMEI 33

¹Esau kamei nunc 400 ta nduanghna keymei ta Jakob how lana, kanac nunc ta tei kapui pui khou nzanhlou the.

²Kumna kamei rui kabangcpui nei ta kaney nac nunc tei lev twna hu khou lou the, hei tangv Lea lev kanac nunc, thei liang khou Rachel lev Josep ta lou the.

³Jakob tei tat hu patna kachaic daeng khou guangna kandih nkhum key tangcna kalumliang chanei the.

⁴Esau rui pak guangna kata pamcna kaput the. Kaney gaanv neimei kap the.

⁵Esau tei zauc ngguic guicna meicpui nunc khatni alauc nunc ta how lana, “Mi nang thei lay guangmei nunc hei thu thow thow cho?” twna kamei rui thanv the. “Mi nunc hei Ravguangc rui zauc nzianna nangbangc akhang tiiloumei nac nunc the,” twna Jakob rui daw the.

⁶Hei tangv banghpui nei tei kaney nac nunc lev twna guangna nkhum keyna kalum the;

⁷hei tangv Lea tei kanac nunc lev guang the, kumna nkhamh liang khou Rachel lev Josep tei guangna nkhum keyna kalum the.

⁸“Ai rui hu swangna ariwmei kang tei tabui swmei kang cho? Hei tei tabui kabac cho?” twna Esau rui thanv the. “Akaipouc, nang rui zauc nzianlou pw diu khang mitei tiiguangmei tuang the,” twna Jakob rui daw the.

⁹“Akainacle, akhang biucna nai de; nang khang lou rap do,” twna Esau rui daw the.

¹⁰“Kiuc hamh e, nang rui ata nzian e thei, atuang kaipat hei laalou na ro. Nang zaw howmei hei akhang thu Ravguangc zaw howmei kumh tuang di the, ntaw nang rui ata heidikamv nzianlou the.

¹¹Ai rui nang khang phungc guangmei mi kaipat hei laalou na ro; Ravguangc rui ata heidikamv nzianlouna akhang kage naimei kaguayna tiilou the,” twna Jakob rui sa the. Kamei rui heikumna sana bam tina Esau rui laalou the.

¹²“Guang di kho. Ai nang hu khou tat puni the,” twna Esau rui sa the.

¹³Khoutei Jakob rui daw the, “Akaipouc, alauc nunc hei suan e twmei nang thay e, kanac nduanghmei lauziu pang khatni guaih pang khang kakhanh mak nuh mak ge. Zaeng neih khat na sini hac ranvna tat tithei, khouringh guay hei theic ngam kan pwng e.

¹⁴Kum thena akaipouc nang guang hulou tho, nang bangc ai nzaengna lay guang puni the, khouringh pang khatni alauc nunc ta kapuyna Edom khou akaipouc nang ta lay tangh khang ntaanv guang puni the.”

¹⁵“Kum e thei, amei nunc gaanvsaekc ta ganclou duc puni the,” twna Esau rui sa the. “Apoubauhmei rui ai kumhmei ta heidikamv kha kadan bam ni cho twna Jakob rui daw the.”

¹⁶Kumna mi nungc tei Esau tei Edom thangc hanc dat kan the.

¹⁷Tiki Jakob thu Sukkot thangc tatna khou tei kakai khang khatni khouringh nunc kai khang kasiamhlou the. Kum tina mi bamv ta tei Sukkot twna kaw the.

¹⁸Mesopotamia thangc rui guang dat khou Jakob tei Kanaan kandic tuang Sekem kaidai gayna guang tangclou the, kumna mi kaidai daeng khou ramvpuk khou zypui kai kasiamh khwan e.

¹⁹Kamei mi khou tei ramvpuk akhat Hamor kikta, Sekem pu khou rui daandi paek 100 khang liu the kumna mi khou tei pheykai katingh thau khwan the.

²⁰Khoutei kamei rui ravchabamv kasiamh thau the, kumna mi ta tei El-Elohe Isarael twna kaw the.