Read Rongmei Naga THAUREYMEI 34 Bible Online

THAUREYMEI 34 - Rongmei Naga bible

THAUREYMEI 34

¹Lea rui puanhmei Jakob nac aluhpui Dina tei zaeng neih khat Kanaanmeipui nunc gaanvsaekc ta ariw khang tat khwan e.

²Hivimeipu Hamor nac kazanc Sekem twna kawmeipu, mi ramv khou tei kaipouc swna bammei rui kata nymna sw kasiclou the.

³Mipui tei heidikamv how gay e kumtina kamei rui kata nzian the kumna kata nthiam the.

⁴Sekem rui kapu Hamor khou tei kumna sa the, “Mi tunacpui ta tei anow khang laalou o.”

⁵Kanacpui ta sw kasiclou the twmei Jakob rui thay the, tiki kanac nunc tei guaih gaengcna ramvpuk thangc tat ngam kan tina, kaniw guang dat mak saanv reih reina bam the.

⁶Sekem pu Hamor tei Jakob ta kachuc khang guang the.

⁷Ntaw Jakob nac nunc tei ramvpuk thangc rui guangdat pwkhou mi chamv tei chu the kumna kaniw mpeyna lunghpuamc the kalam thu Isarael khou taanclou nu-neipui thiak Jakob nac aluhpui khou taancna sw zaklou the twna kaniw lungpuamc the.

⁸Hamor rui Jakob khou sa the, “Anac Sekem rui nang nacpui ta kanguihak the; kata zauc-nzianlouna tikawlou tho.

⁹Nang mei nunc lev amei nunc hei khat khat ta kaw laana lungc kho twmei latdyng swlou kho.

¹⁰Kum pw e thei nangniw ni aniw kandic khou lungc kariuna bam puni e. Kumna nangniw lungc nii niimei bamv khou lungc o, nangniw nyng swna lanvguanh lanvdaenghna bam o, nangniw tuang ramvdui ni naina lungc o.”

¹¹Khoutei Sekem rui Dina pu lev kapuningc nunc khou tei sa the, “Nangniw rui mi tuang zauzian taanv na hei thu akhang taanclou o, kum e thei nangniw kahaw hawmei ai tii ni de.

¹²Tabui kaipat laa nii cho salou o, katy kamanv ni nangniw rui khaanc niimei khaanc do; kata anow khang tii rap e thei nangniw rui kahawmei kamv tii rap puni de.”

¹³Sekem rui kaniw tanpui Dina ta sw kasiclou tipui zaeng rui Sekem lev kapu Hamor khou Jakob nac nunc rui sa the,

¹⁴“Gihruamh makmei khang aniw tanpui ta tii ngam mak ge; hei tei aniw khang meiczakmei tuang di the.

¹⁵Kathiak akhat bangc khou aniw nuhlou nuh e mi kiu thu nangniw nggaanvmei guay tei aniw kumcna gihruamh nina de.

¹⁶Kum pwkhou rui aniu kaw laana lungc nina de. Kum e thei aniw nangniw lev lungc kariuna aniu zaatc akhat na sw nuh e.

¹⁷Aniw rui samei nang nei rui nuhlouna gihruamh mak ge thei thu, aniw kata laa tat dat kan ni the.”

¹⁸Mi lat hei Hamor khatni kanacpu Sekem rui pian the.

¹⁹Mi nggaanvpu tei katumcna hei tei taanc the, kalam thu kamei Jakob nacpui ta nzian the. Kamei tei kakai kaikhunc khou ningkungc liangmei khwan the.

²⁰Hamor khatni Sekem kakai punav nei kaidai raengckat khou sanghbamv khou tei tatna meic nunc khou tei sa the,

²¹“Mi nunc hei aniu ta nduangh niina bam e; kaniw ni aniu kandic khou lungc nchamcna nyng swna tatpat tat gutna lungc bam kan diu. Kaniw khang ni aniu kandic hei daicna nai de cho. Aniu rui ni kaniw luc nunc ta kawna khatni aniu luc nunc ta ni kaniw khang tiina lungc kho.

²²Aniu ni nggaanvmei guay hei kaniw kumcna gihruamh tithei kaniw lev aniu hei akhat na swna lungc kariu bam nuh puni the.

²³Kaniw tuang khouringc khatni kaniw tuang naimei kapwmna hei aniu tuang sw pu lakna cho? Kumna kaniw aniu lev lungc nchamc nuh khang mi hei nuh di kho.”

²⁴Sekem kai punav nei rui samei tei mi kaidaimei guayna rui nuh the kumna nggaanvmei guayna tei gihruamh the.

²⁵Zaeng neih thumh tangv kazam tei sucna bam khou, Jakob nac gaanv nei, Dina chaic nei, Simeon lev Levi rui buy-baeng sin lana thay mak daek khou mi kaidai khou tei gutna nggaanvmei kaguayna ta dow luai ngam the.

²⁶Hamor lev kanac Sekem ta ni swluai the. Kumna Dina ta Sekem kai khou rui laaguang dat the.

²⁷Kumna dow luailou ngammei tangv baihmei Jakob nac nunc rui Dina ta sw kasicloumei khwm khangcna mi kaidai tuang puat guay tei asut ngam the.

²⁸Lauziu pang, guaih pang, kuanniam pang, kaidai khou khatni ramvpuk khou naimei katana kaniw rui laa the.

²⁹Kaniw rui kamanv kunghmei puat guay tei laa the, ntu-pangna khatni alauc guay ta nym tat the, khatni kaniw kai khou naimei kaguayna phungc tat the.

³⁰Jakob rui Simeon khatni Levi khou sa the, “Nangney rui ata lungh tiryanralou the; ntaw thu Kanaanmei, Perizimei, khatni baih baihmei mi kandic khou lungc bammei guay rui ata karaeng puni the. Amei hei katitna de; kaniw guay kariu lana adow e thei thu akai kaikhunc hei mut pwng di the.”

³¹Tiki kaney rui daw the, “Kamei rui aniw tanpui ta kapumc zuanhmeipui ta kumc sw bam nuhna cho?”