Read Rongmei Naga THAUREYMEI 35 Bible Online

THAUREYMEI 35 - Rongmei Naga bible

THAUREYMEI 35

¹Ravguangc rui Jakob khou sa the, “Thauna Bethel thangc lungc tat tho. Nangchaic Esau ta pingna nang pak tat bammei douc nang khou ndauhloumei Racguangc khang mi bamv khou tei ravchabamv kasiamh thau tho.”

²Kumna Jakob rui kakai kaikhunhmei khatni kadaeng khou bammei meic kaguayna khou sa the, “Nangniw khou naimei zaatc baihmei rav guay tei ganc tho; nangniw pumc sw nthan tho kumna pheybaan nthanmei piu tho.

³Aniu mi bamv hei mpatlouna Bethel thangc tat di kho, ai ryanramei ganv khou nkhavloumei khatni ai tatloumei bamv kathuic khou nduanghloumei Racguangc khang hei khou tei ai ravchabamv kasiamh thau puni the.”

⁴Kumna kaniw rui kaniw khou naimei zaatc baihmei rav guay khatni kaniw nu khou mwn bammei tadip guay tei Jakob khou tiilou kan the. Kumna kamei rui mi guay tei Sekem khou naimei mphauhbang bangc khou tei phuplou kan the.

⁵Kaniw tei tat thau pwkhou, kadaeng khou naimei kaidai guay khou bammei guay khou tei pingmei Ravguangc khou rui tiguang khwan e, kum tina meic gaanv khat na rui sini lay nthau mak khwan e.

⁶Jakob kamei nunc lev twna, Kanaan kandic tuang Luz, ntaw Bethel twna kawmei bamv khou guang the.

⁷Kamei rui khou tei ravchabamv kasiamh thau the, kumna mi bamv zanc tei Bethel tuang Racguangc zanc khou El-Bethel twna phuaklou the, kalam thu kamei kachaic ta pingna pak tat bam khou Ravguangc rui kakhou mi bamv khou tei lyanlou khwan e.

⁸Rebekka tuang nachaicpeic Debora theic the kumna Bethel tuang dihba thangc mphauhbang bangc khou tei mbeihlou the. Kumna mi bamv tei “Allon Bakut” twna phuaklou the.

⁹Jakob Mesopotamia thangc rui guang dat pwkhou, Ravguangc rui kakhou ndauhlou datna kata suaihiamlou the.

¹⁰“Nang zanc hei Jakob e, tiki ntaw khou rui thauna Isarael tw dat puni the,” twna Ravguangc rui kakhou sa the. Kumna Ravguangc rui kazanc Isarael twna phuaklou the.

¹¹Kumna Ravguangc rui kakhou sa the, “Ai hei Ngamparymei Racguangc e, nang kikta kingckiuc tho. Nang khou rui zaatc mpeyna pat puni the, kumna nang khou rui guangh mpeyna lungc pat puni the.

¹²Ai rui Abraham khatni Isak khou tiilou kanmei kandic tei nang khang khatni nang kikta khang tii puni the.”

¹³Mi tangv tei Ravguangc tat dat kan the.

¹⁴Ravguangc rui kata kachucmei bamv khou tei Jakob rui ningtowtauc lingclouna drakhadui lev Olive thauc bunlouna kat gutlou the.

¹⁵Kamei rui mi bamv zanc tei Bethel twna kaw the.

¹⁶Jakob tei kakaikhunc ta nduanghna Bethel ta mpatlouna tat dat bammei chaeng dak khou, Ephrat guang tangc khang ramhbiuhdou duhmei bamv khou, Rachel tei nah bam khang naruai guang the, khatni kamei nah bam nimei tei ryanra sih the.

¹⁷Naruimei tei kanganv tangcna sw bammei ganv khou, “Ping riu Rachelle, nggaanvmei nac the” twna nahpuanhpeic tei rui sa the.

¹⁸Kamei theic changh theic kan ni khou (kalam thu kamei theih the) kamei rui mi nac zanc tei Benoni twna phuaklou duc the, tiki kapu rui thu Benjamin twna phuaklou the.

¹⁹Rachel tei theic pwkhou, ntaw Bethlehem twna kawmei Ephrat chaeng daeng khou mbeihlou the.

²⁰Jakob rui khou tei ningtowtauc suamclou the, kumna aseic nganvna Rachel tarou bamv tei madanclou bam e.

²¹Jakob tei tat guangna Eder tuang kauhkai paengc thangc naimei bamv akhat khou zypui kai kasiamh the.

²²Jakob tei mi ramv khou tei lungc bammei douc, Reuben rui kapu now Bilha khou tatlou the; Jakob rui hei tei chu lana kalungpuamc the. Jakob kanac gaanv 12 nai e.

²³Lea nac nunc rui Reuben (Jakob nac mpouh nareimei), Simeon, Levi, Juda, Isakar, khatni Zebulun hei nunc hei the.

²⁴Rachel nac rui Josep lev Benjamin e.

²⁵Rachel bangcpui Bilha nac rui Dan lev Naphtali the.

²⁶Lea bangcpui Zilpa nac rui Gad lev Aser the. Mi nac nunc hei Mesopotamia khou rui puanhmei nac nunc the.

²⁷Abraham lev Isak gin swna lungcloumei bamv Hebron daeng khou naimei Mamre khou kapu Isak ta ariw khang Jakob tat the.

²⁸Isak tingkwm 180 lungclouna

²⁹panty lungsingna theic kan the; kumna kanac Esau lev Jakob rui kata mbeihlou the.