Read Rongmei Naga THAUREYMEI 37 Bible Online

THAUREYMEI 37 - Rongmei Naga bible

THAUREYMEI 37

¹Jakob tei kapu nggin swna lungcloumei kandic khou lungc bam khwan e.

²Mi hei Jakob kai lwanry e, tingkwm 17mei nggaanv launa Josep hei nkhamhmei swna kapu laamvnow Billa khatni Zilpa rui puanhmei kachaic nunc lev lauziu pang gaengc tat bam khwan e. Kachaic nunc rui simei taanc bammei guay tei kamei rui kapu khou poulou khwan e.

³Jakob tei karapouc key khou puanhmei nac Josep ta kanac baihmei nunc ta suangc kungc mbu khwan e. Kumna kapu rui kakhang kahiak gaymei thiula saenghmei kasiamhlou khwan e.

⁴Kaniw pu rui kaniw ta suangc Josep ta kungc e twmei kachaic nunc rui how pwkhou kaniw Josep ta heidikamv karaengna kata lat gay kachuclou mak bam khwan e.

⁵Neih khat Josep tei mang akhat manv khwan e, kumna kamei rui mi mang tei kachaic nunc khou raclou pwkhou kaniw kata karaeng ranv khwan the.

⁶“Amang hei nkinglou o.

⁷Kamei rui heikumna sa khwan e. Aniu meic guayna laupuk khou napchu bang bam khou atuang napchu ding thau khwan the. Kumna nangniw tuang kiu atuang daeng khou guang ding nkuayna nkhum keyna mi ta tei kalum bam khwan e,”

⁸“Nang guangh swna aniw ta sin me twna nang ningna cho?” twna kachaic nunc rui sa the. Kamang zaeng khou tei rui khatni mi lam khou tei kamei rui samei zaeng khou tei rui kaniw rui kata karaeng hay hay khwan the.

⁹Mi tangv Josep tei mang akhat manv dat khwan e. Hei tei kachaic nunc khou raclou khwan e, “Ai mang akhat manv dat re. Mi mang khou kiu neih, bw, khatni gaanchuangcna 11 rui nkhum keyna ata kalum bammei ta ai how khwan e.”

¹⁰Kamei rui mi mang tei kapu khou raclou tina “Mi kiu tabui kumhmei mang lana cho? Nang pui, ai khatni nang chaic nunc rui nang khou guangna nkhum keyna nang ta kalum puni e twna ningna cho?” twna kapu rui kata luh khwan e.

¹¹Kachaic nunc rui Josep ta mamav khwan the tiki kapu thu mi lam khou tei kakhanh bam khwan e.

¹²Zaeng neih khat Josep chaic nunc tei kaniw pu tuang lauziu pang gaengh khang Sekem thangc tat kan the.

¹³“Nang chaic nunc rui lauziu pang gaengc bammei Sekem ramv thangc tei tat ro,” twna Jakob rui Josep khou sa khwan e. “Nuh de” twna Josep rui daw khwan e.

¹⁴“Nang chaic nunc khatni lauziu pang tei gayna bam di ny tatna zauc lana akhou guang poulou dat ro” twna kapu rui kakhou kady khwan the. Kumna kapu rui kata Hebron nzaengc khou suanc patlou khwan the. Josep tei Sekem guang tangcna

¹⁵mi ramv khou tei ruan bam khou meic gaanv khat pu rui kata howna “Nang tabui tuang ta phu bam tu cho” twna kakhou thanv tina

¹⁶“Lauziu pang gaengc tat kanmei achaic nunc ta phu bam tu e. Kaniw tabui thangc bam cho twmei nang thay bw cho? twna kamei rui thanv the.

¹⁷“Kaniw mi bamv khou rui tat dat kan the. Dothan thangc tat ni twna kaniw sa bammei ta ai chu e” twna mipu tei rui daw khwan e. Kumna Josep tei kachaic nunc ta suic nganghna Dothan khou kaniw ta ariw khwan the.

¹⁸Josep ta duh thangc rui kaniw how lana kata swluai khang kaniw chamvbui the.

¹⁹“Mang manvmeipu tei guang pu the.

²⁰Kata swluaina khunh khou phaiclou di kho. Khouringh rui kata swluailouna the twna sa nuh de. Kum e thei kamang kiu tabui pat puni cho twmei aniu zauc di kho” twna kaniw rui kaphianh the.

²¹Hei tei Reuben rui chu lana Josep ta gulou khang karamc the. “Aniu swluaimei changh thu swluai nangh e,”

²²“Mi tazikramv khunckai khou hei phaiclou di kho, karuc khou changh baanh keylou nangh e” twna kamei rui sa the. Kata kaniw baanc khou rui gulouna kapu daeng thangc thouclou dat khang rui kachaeng phuna kamei rui mi hei samei tuang e.

²³Josep tei kachaic nunc daeng khou ngangh tangc pwkhou, katuang thiula saenghmei tei kathangv ganc the.

²⁴Kaniw rui kata nym lana dui maekmei khunhkai khou phaiclou the.

²⁵Kaniw tuzangv khang dungc key bam khou zauc pat pwki Ismaelmei kang akhat Gilead thangc rui Izip thangc tat keymei ta how khwan e. Kaniw tuang guaikuan pang tei maruai, puc, khatni agaw rui puatc sw khwan the.

²⁶Khoutei Juda rui kachaic nunc khou sa the, “Aniu kainac ta swluaina nkamh bammei ruina aniu khang tabui tuang gaengmei naina cho?

²⁷Aniu baanc changh karuc khou keylou nangh khe; Ismaelmei nunc khang hei zuanclou di kho. Tabui bui sw bam sini kamei hei aniu kainac de, aniu zanc de khatni aniu zei de.” Kachaic nunc tei nuh the.

²⁸Kumna Midianmei lanvguanhmei nunc tat ruan guang pwkhou, kaniw rui Josep ta khunh khou tei rui zay patna Ismaelmei nunc khang tei daandi paek 20 khang zuanclou tina Izip thangc phungc tat kan the.

²⁹Reuben tei khunh khou tei guang zauc dat pwkhou Josep tei bam timak khena kazaengsina kaphey siatkaek the.

³⁰Kamei kachana nunc daeng khou guang datna “Josep tei bam mak khe! Ai akumh nina cho ni!” twna sa the.

³¹Kaniw rui ziuh akhat swluaina zei khou tei Josep tuang thiula saenghmei tei kani the.

³²Kaniw rui thiula saenghmei tei kaniw pu khou phungc guangna sa the, “Mi hei aniw khuaictow tuang e. Mi hei nang nac tuang cho?”

³³Kamei hei tei kalwn thay lana “Ngguay, mi hei anac mpouh tuang the. Nwm khouringc rui kata swluai lana khuan the. Anac Josep ti hei siat puat paruat key lana bu di the ni!” twna sana

³⁴kazaengsina Jakob tei kaphey siatkaek gancna zaengsiphey nsuayna kaganv tingsaengcna kanac ta huayna bam khwan e.

³⁵Kanac mpouh nunc khatni aluh nunc rui guangna kata swm the tiki swmgay ngam mak khe. “Huayna huayna theihmei dic thangc anac daeng thangc key kan nina di the” twna sana Josep ta huayna kap bam the.

³⁶Mi ganv khou tei Josep ta Izip khou phungc guangna Izipmei guangc tuang meicdaihmei, guanghkai ricmei rihpy Potiphar khang Midianmei nunc tei rui zuanclou kan the.