Read Rongmei Naga THAUREYMEI 39 Bible Online

THAUREYMEI 39 - Rongmei Naga bible

THAUREYMEI 39

¹Ntaw thu Josep ta Ismaelmei nunc rui Izip thangc phungc keyna Izipmei guangc tuang meicdaihmei, guanghkai rigaanv tuang rihpy, Izipmeipu Potiphar khang zuanclou kan the.

²RINGHPOUC rui Josep ta nduanghlouna kata tilungcsaengc lungcdaiclou khwan e. Kamei kakaipouc Izipmeipu kai khou tei lungc bam khwan the.

³RINGHPOUC rui kata nkhavlou bam e khatni kamei rui karamhmei kaguayna tei RINGHPOUC rui tiguang tangclou bam e twmei kakaipouc rui how the.

⁴Kumna kakaipouc tei rui kata kalung kwn the kumna kata katuang tamthiwmei tisw the, kamei rui kata kakai kaikhunc khatni katuang naimei kapwm ta kathouc sw khang nsinlou the.

⁵Mi tangv tei rui thauna, Josep paan rui RINGHPOUC rui Izipmeipu kai kaikhunc khou khatni kakai khou ni, kalaupuk khou ni, nai bammei ramh katana khou suaihiamlou the.

⁶Potiphar rui katuang naimei kapwm Josep baanc khou tiilou the. Kumna kamei rui tuzangv bammei na hamhna baihmei khang thu lungh geih dat mak khe. Josep tei kapumpiang gay e khatni kalwn kachav gay e.

⁷Kakaipouc now tei Josep ta kahaw the kumna zip kariu khang nthiam the.

⁸Kamei nuhlou makna kumna sa the, “Zauc lo, ai bam tipui zaeng rui akaipouc tei mi kaikhunc khou naimei kaguayna ruc khou lunghgeih tuang maekna bam tuang e. Katuang naimei kapwmna akhou nsinlou the.

⁹Mi kaikhunc khou hei akhang suangc daic kasuanmei meic baihmei maek khe, nang thu akaipouc now e, kanow nang ta hamhna akhou tiilou mak tuang baihmei maek khe. Akumhna heidikamv si kanmei taanv hei taanc bam nina cho khatni Ravguangc ta liamna paapc taanc bam nina cho?”

¹⁰Kamei rui Josep ta tingmik pum nthiam bam sini kamei nuhlou zat mak ge khatni bam sini bam kariu mak ge.

¹¹Zaeng neih khat thu Josep tei taanvtaanh khang mi kai khou tei gut pwkhou, mi kai khou tei meic baihmei gaanv khat na sini bam mak khwan the.

¹²Mi pui tei rui Josep phey tin zamcna zip kariu khang kaw khwan the. Tiki kaphey tei mi pui baanc khoutei ganclouna kaizaengc thangc pak duak pat the.

¹³Kaphey ganclouna pak pat kan the twmei kamei howna

¹⁴kakai bangcpu nunc ta kawna sa the, “Mi hei zauc tho! Agaanv rui laaguanglou bammei Ibrimeipu hei rui ata tizak khang sw the. Kamei alaeng bamv khou gutna ata nym khang sw puna ai kauc ranvna kauc the.

¹⁵Ai rui kauhmei tei chu lana kaphey ganclou ducna kamei kai khou rui pak tat kan the.”

¹⁶Mipui tei Josep kaipouc tei guang dat mak saanv kaphey tei kadaeng khou lou the.

¹⁷Khoutei mipui tei rui kakhou hei tei kumna sa muay the: “Nang rui laaguangmei Ibrimei bangcpu tei alaeng bamv khou gutna tizak khang sw the.

¹⁸Ai rui kauc rah-ndyna kauc tina kaphey ganclouna pak tat kan the.”

¹⁹Josep kaipouc tei kalungpuamc langvna kareic thau the.

²⁰Kumna Josep ta tei nymna guangh mei nunc ta bangcloupui bamv kangkai khou lou kan the.

²¹Kum khwan sini RINGHPOUC rui Josep ta nduanghlou tina khatni suaihiamlou tina kangkaipouc tei rui kata zauc nzianlou khwan e.

²²Kamei rui Josep ta baihmei kang bammei nunc ta tei zauh khang khatni kangkai khou taanvtaanc bammei guay ta tei kathouc sw khang nsinlou khwan the.

²³Ravguangc rui Josep ta nduanghlouna kamei rui taanhmei guayna tei tiguang nthuihlou bam tina kangkaipouc tei Josep rui kathouc swna kaphianh bam kanmei lungc khou tei thu lunghgeic dat mak khe.