Read Rongmei Naga THAUREYMEI 4 Bible Online

THAUREYMEI 4 - Rongmei Naga bible

THAUREYMEI 4

¹Adam kanow ta thaylou the, kumna kanow kapumc nritna nah mpouh akhat puanc the. “RINGHPOUC paan rui anac mpouh akhat nai the,” twna kamei rui kazanc khang Kain twna phuaklou the.

²Kanac mpouh akhat, Abel ni puanc dat re. Abel tei lauziu nruaihmei, khatni Kain rui lautaanhmei sw the.

³Kaganv kanakmei tangv Kain tei katuang phunling laaguangna RINGHPOUC khang kat the.

⁴Abel thu kalauziu pang khou puancreymei lauziunac laaguangna swluai the, kumna mi tuang gayliang liangmei saram guay tei kat the. RINGHPOUC rui Abel ta khatni katuang puatkat ta pianlou the,

⁵tiki Kain khatni katuang puatkat ta thu laa lou mak khe. Kain tei kalungpuamc the khatni kazaw zingc the.

⁶Khoutei RINGHPOUC rui Kain khou sa the, “Tabui swna nang lungpuamc bam tu cho? Tabui swna nang zaw zingc bam tu cho?

⁷Nang rui kat chuyna kat tina laa lou pu lak ge twna cho? Tiki nang rui nchumh makmei taanc tipui zaeng rui paapc tei nang tuang kaimun khou nchwanna bam the. Hei tei rui nang ta sin khang sw bam the, tiki nang mi ta tei ngam nina de.”

⁸Kain rui kakainac Abel ta “Laupuk thangc pat kho” twna kaw the. Kaney laupuk khou bam khou Kain rui kakainac Abel ruc khou baanh keyna swluai the.

⁹Khoutei “Nang kainac Abel tabui thangc bam cho?” twna RINGHPOUC rui Kain khou thanv the. “Ai thay mak ge; ai akainac ta zauc bammeipu dina cho?” twna kamei rui daw the.

¹⁰Khoutei RINGHPOUC rui kumna sa the, “Tabui swna nang hei kumhmei taanv hei taanh tu cho?” Nang kainac zei tei rui kandih khou rui akhou kauc ku bam the.

¹¹“Ntaw thu nang ta sianglou the khatni kamwang hah patna nang kainac zei tei nang baanc khou rui nzuh kanmei kandic khou rui nang ta alay pat the.

¹²Nang rui phunling lingc key bam sini, kandih rui ramhkhat na sini ti-nthai pu lak khe; nang kandih nam ruc khou kakai kalau maekna ruan tatmei sw puni the.”

¹³Kain rui RINGHPOUC khou daw e, “Mi dandi hei phungc ngam lak ge.

¹⁴Nang rui ata kandih khou rui khatni nang hu khou rui nthau pat the, ai hei kakai kalau maekna kandih khou ruan tat bam puni the, khatni ata ariw riwmei rui ata swluai puni the.”

¹⁵Tiki RINGHPOUC rui daw the, “Kiuc hamh e, thowkumhmei rui nang ta swluai e thei kata kiuc kadam chanei khwm khangc puni.” Kumna ariw riwmei rui swluai mak khang RINGHPOUC rui Kain khou madanclou the.

¹⁶Kumna Kain tei RINGHPOUC pamv khou rui tatpat lana Eden neihpat biak thangc naimei “Nod” twna kawmei kandic thangc lungc tat kan the.

¹⁷Kain rui kanow ta thaylouna nah mpouh akhat puanc the, kumna kazanc Enok twna phuaklou the. Kain rui kaidai akhat kasiamh thauna hei tei Enok zanc khou phuaklou the.

¹⁸Enok rui Irat puanc e, Irat hei Mehujael pu e, khatni Mehujael hei Methusael pu e, Methusael hei Lamek pu e.

¹⁹Lamek kanow kanei e, kaney zanc tei Ada lev Zilla e.

²⁰Ada rui Jabal puanc e, kamei hei khouringh nruaihna pheykai khou lungc tat bammei nunc pupouc e.

²¹Kakainac rui Jabal e, kamei hei nrah alim downa lusuanmei nunc pupouc tei e.

²²Zilla rui Tubal Kain ta puanc e, kamei hei tanzinc lev ntanh tuang baansin kasiamhmei nunc pupouc e. Tubal Kain kainacpui hei Naama e.

²³Lamek rui kanow nei khou sa the, “Ada lev Zilla nangney nking o: ata chabwan gaanv khat rui baina swzamloupui zaeng rui kata swluailou kan the.

²⁴Kain ta swluaimei khwm kadam chanei khangc e thei, ata swluaimei ta thu kadam 77 khangc puni.”

²⁵Adam kai nowpucnei khou mpouh akhat tiilou dat re. “Kain rui swluai kanmei Abel phaan Ravguangc rui akhou nah mpouh akhat tiilou dat the,” twna kamei rui kazanc tei Set twna phuaklou the.

²⁶Set kanac mpouh gaanv khat puanc the, kazanc Enos twna phuaklou the. Mi ganv khou tei rui maansei rui RINGHPOUC zanc saancna kalum thau khwan the.