Read Rongmei Naga THAUREYMEI 40 Bible Online

THAUREYMEI 40 - Rongmei Naga bible

THAUREYMEI 40

¹Kaganv asaekc tangv Izipmei guangc khang zouh sinmei kapypu khatni nap sinmei kapypu kaney rui guangh khou taanc nkhuailou khwan the.

²Pharao tei katuang zouc sinmei khatni nap sinmei kapypu nei ta tei lunghpuamcna,

³kaney ta tei Josep ta lou bammei rigaanvmei nunc tuang rihpypu kai khou tei bangclou khwan the.

⁴Kaney kangkai khou tei kaganv tingsaengc sihna bam khwan the, kumna rihpypu tei rui Josep ta kaney tuang siamruaimei tiswlou khwan the.

⁵Neih khat zingbangc kangkai khou bammei zouh sinmei khatni nap sinmei kapypu nei tei mang akhat akhat manv khwan e, kaney mang tei kabah baic baic khwan the.

⁶Mi nungc lauthwan tei Josep kaney daeng khou guang pwki kaney lungh ryanrana bammei ta how the.

⁷“Nangney tabui swna aseic heidi lungh ryanra bam tu cho?” twna kamei rui kaney khou thanv khwan e.

⁸“Aney mang akhat akhat manv khwan e, tiki hei tei kabah dinclou nimei meic maekna the” twna kaney rui daw the. “Mang kabac dinc ngam khang tiiloumei hei Ravguangc rui de. Nangney mang kiu raclou zauc o” twna Josep rui sa khwan the.

⁹Kumna zouh sinmei kapypu tei rui sa the, “Amang thangc kiu kachy kathumhmei drakha luai akhat how khwan e.

¹⁰Hei tei kanuy kasatc patpui lev kapwang puangcna kathai minc the.

¹¹Guangh tuang zouh buangc tei abaanc khou sin bam khwan the; drakhathai reina zouh buangc khou tei sunclouna guangh khang tii bam khwan e.”

¹²Josep rui sa the, “Nang mang kabac kiu mi hei the: kachy kathumh tei zaeng neih thumh the.

¹³Zaeng neih thumh lungc khou guangh rui nang ta kuaklouna mpatlou dat puni the, kumna nang ta nang bamv khou tei lou dat puni the. Nang zouh sinmei douc taanc bammei tei kumcna zouh buangc tei puanc laanv dat puni the.

¹⁴Kumna nang khang ramh guayna gay guang pumei ganv khou kiu ata ningtowlou o, kumna zauc nzianlouna alam khou guangh khou tei sa towlouna mi kangkai khou rui ai pat dat nuh khang nkhavlou o.

¹⁵Ati hei Ibrimei ramc khou rui nym zay patmei tuang the, kumna mi Izip khou hei ni ai nkhuailoumei tuang maekna kangkai khou hei bangclou bam tuang the.”

¹⁶Zouh sinmei kapypu mang tei gaymei dincloumei tei how lana nap sinmei kapypu tei rui Josep khou sa the, “Ai ni mang akhat manv e; ntyan nggiuh kathumh apy khou nsinghna bam khwan e.

¹⁷Karucmei nggiuc khou kiu guangh khang kasiamhloumei ntyan kazaat kaguayna lou bam khwan e kumna hei tei nruayna nunc rui tu bam khwan e.”

¹⁸Josep rui sa the, “Mi mang kabac kiu mi hei the: nggiuh kathumh tei zaeng neih thumh the.

¹⁹Zaeng neih thumh lungc khou guangh rui mpat pat puni kumna nang py dangv tapna nang pumc tei thingbang khou thaengclou tina kauh samhmei nruay rui nang zanc tei thaek tu puni the.”

²⁰Guangh tei zaeng neih thumh tangv kata puanhmei tingmik ngaekna katuang meicdaihmei guay ta nap kaw khwan the, kumna katuang zouc sinmei kapypu khatni nap sinmei kapypu ta mpat pat lana katuang meicdaihmei nunc hu khou tei phungc guang the.

²¹Kamei rui zouh sinmei kapypu ta tei kataanv bamv khou lou dat the,

²²tiki nap sinmei kapypu ta thu swluai the. Josep rui saloumei guay tei kumcna guang tangc the.

²³Tiki zouh sinmei kapypu tei Josep ta ningtow dat mak khe, kamei rui kata amuc the.