Read Rongmei Naga THAUREYMEI 43 Bible Online

THAUREYMEI 43 - Rongmei Naga bible

THAUREYMEI 43

¹Ntaw thu Kanaan kandic khou nap nkowmei tei charit sih guang the.

²Kaniw rui Izip thangc rui law guangmei nap tei tu ngam guang pwkhou nap law tat dat khang Jakob rui kanac nunc khou tei sa the.

³Juda rui daw the, “Aniw rui Benjamin ta nduangh key mak ge thei kata ariw dat nuh mak khe twna mipu tei rui sana the.

⁴Nang rui akainac ta aniw thei thouclou pw e thei aniw tatna nang khang nap law guang ni the.

⁵Tiki nang rui kata aniw thei thouclou nii mak ge thei aniw tat lak ge; Benjamin ta nduangh key mak ge thei kata ariw dat nuh mak khe twna mipu tei rui sana di the.”

⁶“Tabui swna ata tiryanra khang nangniw kainac baihmei akhat nai e twna dinc bam tu cho?” twna Jakob rui sa the.

⁷Kaniw rui daw the, “Nangniw pu ringc bam di hai? Nangniw chana baihmei ni nai heh ny? twna mipu tei rui thanv bam rapna daw mak nuh makna aniw hei tei saloupui tuang de. Aniw kainac ta nduangh key o twna sa pwng e twmei thow thayna cho?”

⁸Juda rui kapu khou sa the, “Kata tei athei thouclou tho, aniw, nang khatni alauc nunc hei ndaapcna theih mak khang rui aniw katumcna tat kan ni the.

⁹Ai apanty hei sindaanclou puni the, kakhou si suaimei tuang pat nangc pw e thei mi rith guay tei ai phungc puni the. Ai rui kata nduangh guang datna nang hu khou tidinglou tangh mak ge thei mi nwan tei aruc khou tingsaengzaeng nai bam kan di tho.

¹⁰Aniw ta sw chanah bam mak ge thei ntaw thu hanc guang dat kanei bam kan nimei tuang di the.”

¹¹Kapu rui kaniw khou sa the, “Hei kumc sihmei tuang nai e thei thu, mi kandic khou rui patmei gay liangmei puat guay: drakha thai kang, puc-huay asaekc, nkhuaihdui asaekc, maruai asaekc, pistakio thai bang asaekc, khatni almon thai hei guay hei dihsinpouc khang kaipat khang phungc tat tho.

¹²Syan ni kadam kanei phungc tat tho; nangniw khau khou tinc binlou bam datmei syan tei ni phungc tat dat tho. Maanvna lou bam tuang kho ni nuh e.

¹³Nangniw kainac ta kiuc nduanghna mipu daeng thangc kiu tat tho.

¹⁴Ravguangc rui mipu khou kiu nangniw ta zauc nzianlou khang tiilouna nangniw chana bamduc kanmei lev khatni Benjamin ta nangniw khou tiilou dat pwng e. Anac nei tei maan kan e thei akhang thu atuang machun guay amaanmei kiu di the.”

¹⁵Kumna kaniw rui kaipat khatni syan kadam kanei phungcna Benjamin ta nduanghna Izip khou keyna kaniw Josep hu khou guang the.

¹⁶Josep tei rui Benjamin ta kaniw rak khou how lana kamei rui kabangc khou sa the, “Mi nunc ta akai thangc nduangh guanglou o. Kalaanv ai kaniw lev napkuak puanc tu nchamc puni, kumna khouringh swluaina chamdaanv tho.”

¹⁷Josep rui samei tei kabangcpu rui taancna kaniw ta Josep kai khou nduangh guang the.

¹⁸“Kaniw ta mi kai khou tei nduangh guanglou tina kaniw puat khou nai bam datmei syan zaeng khou tei rui khwang di the, kumna kaniw ta baina, bangh khang nymna kaniw tuang kuanniam guay tei asut ngam kan pwng di the” twna kaniw ping the.

¹⁹Kumna kaniw rui Josep kai tuang tamvthiwmeipu daeng khou tei guangna chaengmun khou kachucna sa the.

²⁰“Kaipoucle, neih khat luan aniw keymei tei nap law khang keymei tuang e.

²¹Aniw hanc dat nungc zypui khou aniw nap khau laanc pat pwki aniw meic kathuicna katuang katuang khau khou syan tei ntanghna nai bam khwan the. Hei tei aniw aseic nang khou phungc key datmei tuang the.

²²Aniw aseic luan ni asaekc liu dat khang syan asaekc phungc haap key dat re. Thow rui syan tei aniw khau khou lou dat tina cho twmei aniw thay mak khe.”

²³Kabangcpu tei rui sa the, “Lunghgeic nangh e; ping nangh e. Nangniw Racguangc, nangniw pupouc Ravguangc rui mi kiu nangniw khang nangniw khau khou lou tina khwang e. Nangniw tuang syan tei ai laalou de.” Khoutei kamei rui Simeon ta kaniw daeng khou nduangh pat the.

²⁴Banghpu tei rui mi kai chana nunc ta tei kainung khou nduangh gut the. Kaniw phay khiu khang dui tii the khatni kaniw tuang kuanniam nunc ta titulou the.

²⁵Kalaanv kiu Josep rui nangniw ta nap tu nchamc puni e twna salou tina kaniw tuang kaipat tei mi ganv khou kiu tii khang chamdaanv the.

²⁶Josep tei guang pwkhou kaniw rui kaipat tei sin lana kainung khou gutna kandih nkhum key tangcna kata kalum the.

²⁷Kaniw akumhna lungc bam tu cho twmei thanvna Josep rui, “Nangniw sa bammei nangniw pu karapouc kiu ringcna gayna bam dai? Kamei kakhang gayna lungc bam di ny?” twna thanv the.

²⁸“Nang bangc aniw pu gayna bam de, kamei ringc bam de,” twna kaniw rui daw the. Kaniw tangkhunghna nkhum keyna kalum the.

²⁹Josep rui kakainac Benjamin ta how lana sa the, “Mi hei nangniw rui sa bammei nangniw kainac alauc liangmei kiu tha? Ravguangc rui nang khou suaihiamlou pu diu o, abungle.”

³⁰Khoutei Josep tei kakainac ta how lana kazaengsi the; kamei akhaengv ngam mak khe, kainung thangc gutna kap the.

³¹Kazaw phi lana kamei pat dat the, kazaengsi akhaengvna, tuzangv khang kasiamh khang kamei rui sa the.

³²Josep kuakpaeng akhat kasiamhlou the khatni kakai chana nunc khang kuakpaeng baihmei akhat kasiamhlou the. Mi khou tei tu nchamcmei Izipmei nunc khang kuakpaeng kasiamh baiclou the, kalam thu Izipmei nunc rui Jihudimei nunc ta tu kariu khang karaeng khwan e.

³³Kakai chana nunc ta tei tingkwm liang swna Josep biak thangc kaniw zaw karihlouna tidungclou the. Kaniw ta tidungcloumei thiak tei howna hahlahlana kaniw khat khat ta zauc bam the.

³⁴Josep kuakpaeng khou rui kaniw khang damc pat the, meic baihmei khang tei suangc Benjamin khang kadam panguh mbuna damclou the. Kumna kaniw tuzangvna kamei lev neihla nchamc the.