Read Rongmei Naga THAUREYMEI 45 Bible Online

THAUREYMEI 45 - Rongmei Naga bible

THAUREYMEI 45

¹Khoutei kazaeng simei rui Josep akhaengv ngam mak khe, kadaeng khou bam nkuay bammei nunc ta “Kapaengc pat kan o” twna kauc ranvna kauc pat the. Kamei thow cho twmei kachana nunc khou kamei rui sa pat khou tei meic baihmei gaanv khat na sini bam mak khwan the.

²Kamei kap ranv sihna kap the, kum tina Izipmei nunc hei tei chu the, khatni mi lam tei guangh kai chu tangc kan the.

³Josep rui kachana nunc khou kumna sa the, “Ai Josep the, apu tei ringc bam dai cho?” Kachana nunc hei tei chu pwkhou peyna ping the kumna kaniw lat daw ngam mak khe.

⁴Khoutei Josep rui kachana nunc khou sa the, “Guang ana maih o.” Kaniw tei guang ana the, khoutei Josep rui sa the, “Ai hei nangniw rui Izip khou zuancloumeipu Josep tei the.

⁵Nangniw rui ata khou hei zuancloumei zaeng nangniw lung kabiu nangh e khatni nkham kary bam nangh e. Meic nunc tuang panty ta kanlou nuh khang rui Ravguangc rui ata nangniw hu khou thouc keylou reymei tuang de.

⁶Mi kandic khou nap nkowmei hei aseic kwm rui kaneimei kwm di he; lautaanc-lauruai tu nuh makmei tingkwm panguh guang puni the.

⁷Nangniw ta kanlou khang khatni nangniw kikta mut mak khang charynmei thak khou Ravguangc rui ata thouc hu keymei tuang de.

⁸Kumna mi bamv khou ata thouc keymei hei kaling thu nangniw rui hamh e, Ravguangc rui de. Kamei rui ata Pharao tuang daic liangmei meicdaihmei tiswlou the. Ai hei mi kandic kapwm tuang kaipouc sw the, ai hei Izip tuang dihsinpouc the.

⁹“Ntaw thu katumcna apu daeng thangc tei tat lana mi hei nang nac Josep rui kadyloumei lat the twna nganghna dinc tho: Ravguangc rui ata Izip tuang dihsinpouc tiswlou the; katumcna adaeng khou key tho.

¹⁰Nang Gosen ramv khou, adaeng ana khou key lungc tho. Khoutei nang, nang nac nunc, nang tou nunc, nang tuang ziuc nunc, nang tuang lauziu nunc, nang tuang kiruai guay khatni nang tuang baihmei naimei kaguayna keylou tho.

¹¹Nang Gosen khou bam e thei ai nang ta zauc bam nuh the. Tingkwm panguh nap nkow puni he; nang, nang kai kakhunc khatni nang tuang kiruai ndaapc bammei ta ai laa nii mak khe.”

¹²“Nangniw meic guayna, akainac Benjamin nang ni ai hei Josep kahak the twmei how the cho.

¹³Ai Izip khou adih ngamv naina bam cho twmei khatni alam khou nangniw rui howmei kaguayna hei apu khou raclou ti tho. Kumna katumcna kata khou hei nduangh key tho.”

¹⁴Kumna kamei rui Benjamin ta pamcna kap the, Benjamin ni kata pamcna kap the.

¹⁵Kamei kapna kapna kachana guayna ta pamcna kaput the. Hei tangv tei kachana nunc tei kata kachuc thau the.

¹⁶Josep chana nunc guang e twmei Pharao kai khou tei chu guang tangc pwkhou guangh tei khatni guangh tuang meicdaihmei nunc tei neihla the.

¹⁷Pharao tei rui Josep khou sa the, “Nang chana nunc ta tei kaniw tuang kuanniam nunc puat tei sw lana Kanaan kandic thangc ngangh datna

¹⁸kaniw pu khatni kaniw kaikhunc guay ta khou hei nduangh key khang sa ti tho. Ai rui kaniw khang Izip kandic gay liangmei ramv tii puni the, kaniw mi kandic thav tei tuna lungc puni the.

¹⁹Kaniw nownac nunc khatni kaniw pu ta phungc key khang puatc phunghmei tuang takuanh gari pang Izip khou rui phungc tat tho twna sa tio.

²⁰Hei thangc tei ramh guayna ganclou duc khang nza riu twna sa tio, Izip kandic tuang gay liangmei ramv tei kaniw khang tii puni the.”

²¹Jakob nac nunc tei kaniw khang samei tei kaniw piu the. Guangh lat theilayna Josep rui kaniw khang puatc phunghmei tuang takuanh gari pang khatni kaniw chaeng khou tuzangv khang kaphianhlou the.

²²Kamei rui kaniw kathuic khang pheythanh akhat akhat tii the, tiki Benjamin khang thu daandi paek 300 lev phey baan saplai thanh panguh tii the.

²³Kamei rui kapu khang Izip tuang gay liangmei puat kuanniam puat ruh, nap, ntyan, khatni kapu tuang puktaek khang kuanniam kui puat ruh tii guang the.

²⁴“Chaengkui chaeng dak khou agay agi tat bam riu de” twna kadylouna kaniw ta thouclou kan the.

²⁵Kaniw tei Izip kandic ganclouna kaniw kai Kanaan kandic khou kaniw pu daeng khou guang dat the.

²⁶“Josep tei ringc bam de! kamei Izipmei guanghkhyn sw bam the!” twna kaniw rui kakhou salou ti khou kapu Jakob tei mangh mang the, kaniw lat lwmthau lwmguang khang thay mak khe.

²⁷Josep rui kaniw khou kadyloumei lat guay tei kaniw rui kakhou raclou pwkhou, khatni kata Izip thangc phungc key khang Josep rui thouc nganghmei puatc phunghmei takuanh gari guay tei how pwkhou, kachwn mphaengv patna kaluan thau dat the.

²⁸“Anac Josep tei ringc bam bu e! Ai lwm the! Ai theih mak khou tatna kata zauc ni the,” twna kamei rui sa the.