Read Rongmei Naga THAUREYMEI 47 Bible Online

THAUREYMEI 47 - Rongmei Naga bible

THAUREYMEI 47

¹Josep rui Pharao daeng thangc tatna sa the, “Apu lev achana nunc kaniw tuang lauziu pang, kaniw khouringc pang khatni kaniw tuang naimei guay phungcna Kanaan thangc rui key the. Ntaw kaniw Gosen ramv khou bam the.”

²Kamei rui kachana pang khou gaanv panguh ta Pharao hu khou nduangh guang the.

³“Nangniw tabui taancna lunghmei nunc cho?” twna Pharao tei rui kaniw khou thanv the. Kaniw rui daw the, “Guanghle, aniw pupouc nunc rui sw guangmei kumcna nang bangc aniw hei lauziu nruaihmei nunc e.

⁴Kanaan kandic khou alun ranv langv tina aniw tuang lauziu pang mpac tuloumei bamv khang sini maek khena mi kandic khou hei lungc khanvlou khang keymei tuang di the. Kumna Gosen ramv khou lungc khanvlou khang nuhlou pu diu khang zaenghuaymei tuang the.”

⁵Guangh tei rui Josep khou sa the, “Nang pu lev nang chana nunc kiu guang bu the,

⁶Izip kandic hei nang hu khou nai bam the. Mi kandic khou ramv gay liangmei Gosen khou tei kaniw lungc kan di tho. Kaniw pang khou ngam diwmei nai e thei atuang khouringc nunc ta zauhmei nunc khang haaplou o.”

⁷Hei tangv Josep rui kapu Jakob ta guangh hu khou nduangh guang the. Jakob rui guangh khou suaihiamlou the.

⁸“Nang tingkwm azu tha?” twna Pharao rui Jakob khou thanv the.

⁹Jakob rui daw the, “Lungc ruanna tat bammei apanty hei 130 tangc the, atingkwm azuh mak ge lungc ruanna tat bammei apu apouc nunc tingkwm lungc tangh mak ge, tiki ryanrana lungc e.”

¹⁰Jakob rui guangh khou tei suaisamhlouna tat pat dat the.

¹¹Guangh lat theilayna Ramesi kaidai daeng khou naimei ramv gay liangmei tei tiilouna Josep rui kapu khatni kachana nunc ta Izip kandic khou tilungclou the.

¹²Josep rui kapu khang, kachaic nunc khang khatni kapu kai kaikhuncmei guayna, ngngana khang nganvna taektw tii the.

¹³Nap nkowmei tei ranv langv tina tuzangv khang naimei bamv akhat na sini maek khe, kumna Izipmei nunc khatni Kanaanmei nunc tei ndaapcmei rui tancpat ringczaek mak khe.

¹⁴Meic nunc tuang napmanv guay tei Josep rui khuam kaduaina guangh kai khou laaguang the.

¹⁵Izipmei nunc khatni Kanaanmei nunc tuang syan guay tei piu ngam pwkhou Izipmei nunc tei Josep khou guangna sa the, “Aniw khang nap tii tho! Tabui swna aniw nang hu khou theic bam nina cho? Aniw tuang naimei syan guay piu ngam the.”

¹⁶Josep rui sa the, “Nangniw syan maek ge thei khouringh khounah sini phungc guang e thei nap akhiaklou puni the.”

¹⁷Kumna kaniw rui takuanh, lauziu, ziuh, guaih, khatni kuanniam phungc guangna Josep khou rui nap khang akhiak the. Mi kwm tei khouringh khounah lev nap akhiakna nap nzanh khum guang the.

¹⁸Nkun guang dat pwkhou kaniw tei Josep khou guangna sa the, “Nang khou aniw ramh nkamh mak khe, kaipoucle, aniw tuang syandui guay piu ngam the, aniw tuang khouringh khounah guay nang tuang sw ngam kan the. Aniw pumc lev aniw tuang ramv na hamhna nang khang tii nuhmei aniw khou ramh akhat na sini maek khe.

¹⁹Nang hu khou aniw ni, aniw tuang ramv ni amaan kandiuna cho? Aniw khatni aniw ramvpuk hei taektw khang akhiak di kho.” Aniw ramvpuk lev twna guang bangc sw ni the. Aniw tu ringh khang taektw khatni napphwn tiilouna aniw tuang kandic hei tilungc taeklou rio.

²⁰Josep rui Izipmei ramv guay tei guangh khang liulou the. Nap tei nkow ranv langv tina Izipmei kaguayna tei kaniw ramv tei zuanh mak ngam makna zuanc the; kumna ramvpuk guay tei guangh tuang sw the.

²¹Izip kandic kapwm tei Josep rui guangh bangc tiswlou the.

²²Kamei rui liu makmei kiu amuh nunc tuang ramv na di the, kalam thu guangh rui amuh nunc khang tei thu kaniw ringc nuh khang tiilou tina kaniw tuang ramv tei zuanh mak khe.

²³Josep rui meic nunc khou tei sa the, “Zauc lo, ntaw thu ai rui nangniw khatni nangniw ramv guay ta guangh khang liuloumei tuang di the. Nangniw laupuk khou lingh khang napphwn nai the.

²⁴Lautay pwkhou kadam panguh tuang akhat tei Pharao khang tii nina the. Baihmei guay tei napphwn khang sin tho khatni nangniw kai kaikhunc tu khang lou tho.”

²⁵Kaniw rui daw the, “Kaipoucle, nang rui aniw ta tiringclou dyng the; nang rui aniw ta heidikamv nzianlou the, kumna aniw guangh bangc kiu sw puni the.”

²⁶Kumna laupuk tuang thai kadam panguh tuang akhat thu guangh khang tii nina the twmei riak hei Izip kandic riak khang Josep rui kasiamhlou the. Mi riak hei ntaw nganvna tat bam e. Guangh tuang hamhmei kiu amuh nunc tuang ramv na di the.

²⁷Isaraelmei nunc tei Izip kandic khou, Gosen ramv khou lungcna lungcgay thau the khatni lungc kingc lungckiuc thau the.

²⁸Ntaw thu Jakob rui Izip khou key lunghmei tingkwm 17 tangc the, kumna katingkwm rui 147 tangc the.

²⁹Kamei theic nimei ganv ana guang pwkhou kamei rui kanac Josep ta kaw guangna sa the, “Nang rui ata pian e tw e thei ata Izip kandic khou phuplou lak ge twna nang baanc akhukak khou louna latdyng swlou o.

³⁰Kalam thu apu apouc nunc ta phuploumei bamv khou tei ata ni phuploumei ta laa nii e; ata Izip khou rui phungcna kaniw ta phuploumei bamv khou tei phuplou o.” “Nang rui samei kumcna ai taanclou puni e” twna Josep rui daw the.

³¹“Latdyng swlou o” twna Jakob rui sa the. Josep rui mi latdyng tei kakhou swlou the, kumna Jakob tei kalaeng py khou nkhum keyna kalum the.