Read Rongmei Naga THAUREYMEI 49 Bible Online

THAUREYMEI 49 - Rongmei Naga bible

THAUREYMEI 49

¹Jakob rui kanac nunc ta kawna sa the, “Nangniw adaeng khou guang kaduai o, nangniw khou guang nimei ganv thangc pat punimei ta ai rui dinclou puni e:”

²“Guang kaduaina nking o, he Jakob nac nunc; nangniw pu Isarael rui samei hei nking o.

³“He Reuben, anac nareimeipu, nang hei apumtan e, apumc tanc kare khou rui lungc guangmei nac mpouh e, nang hei anac mpouh pang khou rui chakhwang lwn khou kauhliang e khatni kapumtan tancliangmeipu e.

⁴Nang hei duithuak dui kumc nang thuat si e; tiki nang hei daic liangmeipu thu sw ni tu hamh the. kalam thu nang pu tuang laamvnow khou kaamclou e, kumna nang pu tuang laeng sw mphuam the.

⁵“Simeon lev Levi hei pui khat nac the. Kaney rui kaney tuang buy-baeng rui meicbiw meicdow e.

⁶Kaney nkamhna lat cham bammei khou tei ai kazauh lak ge, khatni kaney lat kaphianhmei khou tei ai kaphianh kazauh mak ge; kalam thu kaney lungpuam sina meicdow e, khatni kaney dingtaan sina guaih kappai ram e.

⁷Kaney lungpuam simei khoutei syang nai kan di tho, kalam thu hei tei heidikamv kha si kan the. Kaney reic simei khoutei ni syang nai kan di tho, kalam thu hei tei heidikamv kha sina sw e. Ai rui kaney ta Isarael kandic kapwm khou zinphaklou puni, khatni Isaraelmei pang khou zay phaklou puni.

⁸“He Juda, nang chana nunc rui nang ta thuanc puni. Nang rui nang ta zauczihmei nunc guang katun puni. Nang chana nunc rui nang ta kalum puni.

⁹Juda hei khouringh swluai guangna, kakai lungc khou zip ntyngdyng bammei kamangliangpui nac kumh tuang e. Meic gaanv khat na rui sini ntanvlou bauc lak ge.

¹⁰Guangh builwang tei Juda rui sin puni, khatni kakikta rui guangh sw tanh tan bam puni. Zaatc guay rui kakhou dihkhav kat puni, khatni nkhum keyna kalat piu puni.

¹¹Kamei rui katuang kuanniam ta drakha bang khou bangclou e, gay liangmei luai khou bangclou e. Zei kumc haenghmei drakha dui khou kaphey sou e.

¹²Drakha dui rui kamik zangv haengh haeng bam puni, khatni guaihnoudui rui kahuc zangv mphuan phumh phum bam puni.

¹³“Zebulun hei dui daeng khou lungc puni. Katuang duikhuangc tei rungh nthaekc bamv sw puni. Karamv tei Sidon nganv laa tangc puni.

¹⁴“Isakar hei kapumtan tanhmei kuanniam, lauziu kuanc kak khou zip bammei kumh tuang e.

¹⁵Kamei nthaekc pui bamv tei heidikamv gay e, khatni karamv tei gay e twmei kamei thayna, puatrith phungh khang kabou nzuhlou the, khatni bangh taanv taanh khang nuhlou the.

¹⁶“Dan hei Isaraelmei baihmei khwang kumcna kamei nunc ta latzan sw puni.

¹⁷Dan hei chaeng daeng khou bammei nrui, kakhay tanhmei chaengkui khou dup bammei nrui, takuanh tuang thei tan khou nchow tina, tuangc bammeipu ta nganv gancloumei tei kumh tuang e.

¹⁸“Nang rui kanlou khang ai rigwn e, he RINGHPOUC.

¹⁹“Gad ta kwamtumei kang rui akwam puni, tiki kamei rui kaniw ta alay puni.

²⁰“Aser hei tugay zangvgay tu puni, tugay zangvgaymei guangh taektw kamei tiipat puni.

²¹“Naphtali hei nyngswna pak bammei, kanac kalwn gaymei puanclou bammei asanhnay e.

²²“Josep hei duipuakkai daeng khou thau bammei, kathai geicna nthaimei khatni kaluai tei raengh aluai kaan kumei drakha luai kumhmei e.

²³Kata zauczihmei nunc rui reih patna athwng the, kaniw rui sauhpai rui kaapna alay e. khatni sauhpai sinna kata nthau the.

²⁴Tiki Ngamparymei Jakob Racguangc khatni Isarael ta gaengclou gaekloumeipu tuang pumtan paan rui katuang saucpai kalung mak ge, khatni kabaancpwam titanclou e.

²⁵Mi hei nang ta nkhavloumei nang pu tuang Ravguangc, Ngamparymei Racguangc tingpuk thangc rui suaihiam tii keyna, khatni kandih khou rui dui tiipatna, nang tuang kikta khatni nang tuang kiruai tikingc nkiuclouna, nang ta suaihiamloumei Racguangc paan rui e.

²⁶Nang pu tuang suaihiam hei, reynungc chyngbut guay tuang suaihiam guay suangc ni daic e, tingsaeng luanghbut guay khou rui patmei suaihiam suangc ni mbu e. Mi guay hei Josep ruc khou nai diu tho, kachana pang khou rui kadah patmei Josep ruc khou nai diu tho.

²⁷“Benjamin hei nram-nramei angiw e. Lauthwan tingzyn swluaina khatni thaek tuna bam e.”

²⁸Mi hei Isaraelmei kaikhwang 12 kiu the, khatni kaniw pu rui kaniw ta ntamvlou ni khou kakhang khang ziapmei lat salou duhmei lat kiu the.

²⁹Hei tangv Jakob rui kanac nunc khou sa the, “Ntaw thu ai theicna amei nunc bamv nzwan kan ni the. Kumthena ata apu apouc nunc ta phuploupui bamv Kanaan khou Hittimei Ephron tuang ramvpuk,

³⁰Mamre tuang neihpat biak khou naimei Makpela khou tei mbeihlou o. Mi ramvpuk tei Abraham rui tarou bamv khang Ephron twmeipu khou rui liulou tuang e.

³¹Hei tei Abraham lev kanow Sara ta, Isak lev kanow Rebekka ta khatni ai rui Lea ta mbeihloumei bamv the.

³²Mi ramv tei lev mi khowlang kai tei Hittimei khou rui liuloumei tuang the. Mi bamv khou tei ata mbeihlou o.”

³³Jakob rui mi guay hei kanac nunc khou kadylou tang lana zip key datna theic kan the.