Read Rongmei Naga THAUREYMEI 50 Bible Online

THAUREYMEI 50 - Rongmei Naga bible

THAUREYMEI 50

¹Josep rui kapu zaw khou sow changrwn keyna kapna kapna kapu ta kaput the.

²Hei tangv tei kapu pumc tei taamh mak khang puc teylou khang sa the.

³Pu teymei tei zaeng 40 gut khwan e. Izipmei nunc rui kata zaeng 70 huay the.

⁴Huaymei ganv tei luai pwkhou Josep rui guangh tuang meicdaihmei nunc khou tei sa the, “Mi lat hei guangh khou guang sa tho:

⁵‘Apu kamei theic zaic ni khou kamei rui chamdaanvloumei tarou Kanaan thangc kata mbeihlou khang ata kakhou latdyng tiswlou the. Kumhpui zaeng rui kata mbeih tat khang nuhlou o, mbeihlou tangna ai key dat puni de.’ ”

⁶Pharao rui daw the, “Nang rui nrianhlou kanmei theilayna nang pu ta kiuc mbeih tat tho.”

⁷Kumna Josep kapu ta mbeih khang tat the. Guangh tuang meicdaihmei nunc, guanghkai kumei gaanvthaih nunc, khatni Izip khou kapy swmei nunc, Josep thei lay ngangh the.

⁸Kakai kaikhunc, kachaic nunc, khatni kapu kai kaikhuncmei nunc ni kathei lay ngangh the. Alauc nunc lev khouringh khounah na ta Gosen ramv khou ganclou duc the.

⁹Takuanh gari tuanghmei khatni takuanh tuanghmei meic kangdai ni kathei lay padik tiath tiat ngangh the.

¹⁰Kaniw rui Jordan duithuak daeng khou laudybamv Atat kawmei bamv khou guang tangc pwkhou kaniw kaganv tingsaengc sih kap ranvna huay the. Khoutei Josep tei zaeng chanei huaymei riak tei taanc the.

¹¹Kaniw rui Atat khou huay bammei tei Kanaanmei nunc rui how lana sa the, “O, Izipmei nunc hei adikamv nthukna latlu bam tu cho!” twna mi bamv zanc tei Abel Mizraim twna kaw the.

¹²Heikumna kapu rui saloumei kumcna Jakob nac nunc tei rui taanclou the,

¹³Kanaan kandic khou Mamre tuang neihpat biak khou Makpela tuang khowlangkai, Abraham rui tarou bamv khang Hittimei Ephron khou rui liuloumei bamv khou tei mbeihlou the.

¹⁴Kapu ta mbeihlou tangna, kachana nunc lev kathei lay guangmei guay lev twna Izip khou key dat the.

¹⁵Kaniw pu theic kanpui tangv Josep chana nunc rui sa the, “Aniu rui kakhou sina swloumei khang tei Josep rui aniu ta karaengna khwm khangh dat khang sw puni cho?”

¹⁶Kumna kaniw rui Josep khou meic thouclouna sa the, “Apu kamei theic ni khou aniw khou kumna kadylou duc the,

¹⁷‘Nang chaic nunc rui nang khou sina swloumei tei kuaklou o’ twna nangniw Josep khou sa o. Nang pu Racguangc tuang bangc nunc aniw ta kuaklou tho.” Mi lat hei guang salou pwkhou Josep tei kap the.

¹⁸Hei tangv kachaic nunc tei ni guangna kahu khou nkhum keyna kapna kalum the. “Aniw nang bangc swna nang hu khou guang e twna sa the.”

¹⁹Khoutei Josep rui kaniw khou sa the, “Ping riu, nangniw ta khwm khangh bam khang ai Ravguangc hamh e.

²⁰Nangniw rui sina swmei tei Ravguangc rui gaymei khang tiguanhlouna ntaw hei meic mpeyna tuang panty ta kanlou the.

²¹Nangniw ping nangh e. Ai rui nangniw khatni nangniw nac nunc khang zauclou puni de.” Kumna nzianmei lat rui kaniw tuang lunghgeihmei tei tikuaklou the.

²²Josep tei kapu kai lev Izip khou lungclouna kamei katingkwm 110 khou theic the.

²³Kamei Ephraim nac khatni Ephraim tou ta howlou tangc khwan e, khatni Manase nac Makir nac nunc ta ni howlou tangc khwan e.

²⁴Kamei rui kachaic nunc khou sa the, “Ai thu theic kan ni the tiki Ravguangc rui nangniw ta kadanlou pu diu o kumna Ravguangc kamei rui Abraham, Isak, khatni Jakob khou nthukna nrianhloumei kandic khou nduangh guanglou dat puni de.

²⁵Kumna Ravguangc rui nangniw ta kamei rui nrianhloumei kandic thangc tei nduangh tat pwkhou kiu nangniw rui arou phungc tat ni de twna latdyng swlou o.”

²⁶Kumna Josep kamei tingkwm 110 lungc tangc pwkhou Izip kandic khou theiclou the. Kaniw rui kapumc khou puc teylouna takiu khou lou kan the.